白果魚神(釣魚當番工): 7月 2010

2010年7月30日星期五

今季烏頭第一條

30-7-2010 (農曆六月十九)

今日接到師傅偉來電報料，佢話前晚中咗條烏頭，咁我就即刻約佢今晚落主場玩吓！呢次除咗攞Ｄ千年虾仁做餌，重帶多兩塊方包釣烏頭。

18:00落到主場，見末天黑，就開枝筏仔鈎半粒虾仁釣吓雜魚先，點知Ｄ泥鯭化餌化得好利害，一落餌唔夠十秒就比Ｄ泥鯭偷晒，而我就不停咁餵，一陣間以經化咗我一半餌，不过都冇所謂喇，橫掂至在捱時間等天黑啫！

18:45當我餵到Ｄ魚仔瘋狂食餌之際，特然Ｄ魚訊停咗落黎，幾秒之後，我感覺到又有魚食埋黎喎！但呢次食得大力Ｄ，第二咀以經拉竿喇，我下意式就將枝筏仔往上一抽，中呀!!連攪幾野，條友仔都有Ｄ力水喎！可昔水淺，大約得十零呎，頂兩野就上到水面，見係磅頭嘅黃立倉，撈箕都費事落，一野就掟佢上黎，落好生扣，此時師傅偉剛到，我就轉釣組，過去同佢一齊釣烏頭。

沉底中魚特別開心。

20:00左右師傅偉將個泡放到冇雷公咁遠揾魚，但我個攪唔夠線出，去到都係五六十呎。當我地喺度坐定定担天望地之際，眼尾見我個浮泡郁咗幾吓，跟住一野水花，個泡就消失喺漆黑嘅海中，我枝竿當然彎晒喇，好有手感。我就一路收，一路帶條魚出海中心，嘩！烏頭嘅速度真係快得驚人，一吓調頭，直向我嘅方向冲埋黎~~冇得玩添，焗住收線，埋到腳邊，見都唔係大野，又係一野掟佢上黎，解鈎落冰箱，嗱嗱聲落餌再流過去中魚嘅位置。
又釣咗唔知幾奈，轉流添，咁我地就反方向再繼續釣，但係一Ｄ動靜都冇，磨到23:30都係執野走人，走去消夜好過喇。

番到屋企成點幾鐘，唔敢嘈醒大人，為有較個時間制自拍囉！

再影多張昇盤相就開始劏魚喇！

2010年7月14日星期三

颱風前先至中紅鮋，仲起雙飛添。

14-7-2010 (農曆六月初三)

今日約咗師傅偉落主場，睇有冇烏頭釣。見時間仲早，我就出發前喺屋企個雪柜度，攞咗盒千年雪虾，搣好Ｄ虾殼，準備用虾仁釣魚仔玩吓！

18:30落到主場，剛剛開始起流，我就剩係開一枝筏仔，鈎粒虾肉放落去，坐定定等運到！

19:15釣咗一陣，特然記得有個師兄曾經教過我，落咗餌，久唔久拉起佢，引吓Ｄ魚埋黎咁話！咁我就試吓喇，我就慢慢提起枝竿，等粒餌離地，又慢慢放番低佢，如是者兩三次，個心諗...得唔得架!!點知話口未完，感到竿頭郁咗幾吓，我就即刻靜止動作，當佢大力一拉果吓我就揪竿，跟住連攪幾野，嘩！好好力水喎，一頂一收，兩三個回合就上水面喇，嗯!!紅鮋黎喎！自已用撈箕撈埋條魚，落埋生扣一腳踢。

呢個時候師傅偉啱啱到，佢就開竿釣烏頭，我就繼續用我嘅虾仁釣沉底。

放餌落去唔夠十分鐘，又用番之前咁嘅動作，果然又有魚訊，當佢用力搶餌果吓，我就揪竿，又中呀！都係好好力水，咁我就知又係紅鮋喇，快手快腳將佢上水，跟住落好生扣，再鈎過餌放落去。