2012年5月16日 星期三

又係一條到尾

16-5-2012  (農曆四月廿六)
今日喺屋企食埋飯,他他條條成六點幾先落到主場,開好竿啱啱太陽落山,娟入碼頭底揾個靚位釣金古,一連落咗三四十口餌,都係比泥鯭咗,天都黑齊喇,D泥鯭都仲未收口嘅!呢個時候師傅偉又到咗,佢就開兩枝竿添喎!泥鯭收埋口,大家三枝竿郁都未郁過。
21:15我枝竿有動靜喇,食咗兩三吓,跟住震震吓咁輕輕向下拉,係金古喇,我快速往上一抽,中咗!一中就係咁攪,好快就收咗佢上黎,解鈎落生籠;跟手再落餌,諗住D金古開口,點都有多一兩咀掛,可適一路釣到22:00都冇魚訊,咁我地就唯有執野走人,留力第日再釣過。

好努力咁不停換餌,都係得一條,真係疏口到不得了。

半斤十両都好過冇。


2012年5月13日 星期日

好疏口

13-5-2012  (農曆四月廿三)
今晚都係主打金古,不過早到咗,D泥鯭未收口,好彩我早有準備,帶定盒千年蝦仁,釣吓沉底,攝吓時間。
天色開始暗落黎,我就即刻收起枝沉底竿,再開番枝竿釣金古,全晚只得一吓清楚嘅魚訊,一抽就中,上黎係磅頭金古,跟住一路釣到十一點都毫無動靜,又打破唔到一條到尾嘅宿命,都係執野鬆人去宵夜好過喇!


須然一條就少咗D,好彩都有磅頭。

用13年嘅老陳皮蒸,好食到頂呱呱。


夾埋又夠餐餸喇。



2012年5月8日 星期二

到時候轉吓牌頭

8-5-2012  (農曆四月十八)
呢輪釣鱸釣到悶,今次走去買半磅麵包($4.5又貴咗五毛),落主場釣吓金古,睇有冇運行先至得。
18:30落到去,開好竿,縮入橋底,揾個比較大嘅窿(大約四吋乘十五吋)落餌;當泥鯭一收口,就即中一條手板大嘅金古,好小心咁由條(喇)收佢上黎,即入冰箱,點知一路釣到慢流先再中多條,跟住轉埋流都冇魚訊,只有早D執野走人,聽日再黎釣過。


釣成晚先至有兩條。

劏好放入冰箱先。


9-5-2012  (農曆四月十九)
 今晚嘅魚訊仲少過上一晚,只係喺入黑前泥鯭收口果吓,先至有條中吓,跟住全晚得D零星魚訊,毫無金古就餌,我睇釣金古都未開季,下次都係玩番鱸魚好過。

釣足成晚都係一條到尾。


2012年5月2日 星期三

都仲有兩條鱸仔玩吓

2-5-2012  (農曆四月十二)
去咗幾日旅行,尋晚先至番黎,抖足精神,今晚又去主場過吓先!
買好餌,19:00落到去,開好竿就坐定定等運到,釣咗一陣,師傅偉又黎到,佢一落餌就先拔頭籌,中條斤頭花鱸,我都不甘示弱,刻起番條冇咁失威,跟住落黎就水靜河飛,連流都停埋。
10:00都係唔好磨爛蓆喇,齊齊執野走人去宵夜好過。

都仲有D鱸釣吓。

磅頭加斤頭花鱸一孖。