2014年9月29日 星期一

釣魚要釣呢D

29-9-2014  (農曆九月初六)
外圍烽煙四起,都係執盒千年虾仁,落主場踎吓好過喇!
18:30落到主場,D流行到嘭嘭聲,都係唔好釣咁出,行番埋D躉頭度開竿,照舊平時咁一枝筏仔釣腳邊,一枝小磯竿開D釣魚仔,一路釣到21點幾,小磯竿中咗條斤頭細鱗同一條小黃腳,枝筏字郁都未郁過,只有D坑簾喺度攪攪震;低唔住頸轉位!呢個缺定原來係啱嘅,落餌唔夠五分鐘,枝筏竿頭點咗幾吓,我即刻嗱起枝竿,說時遲那時快,條魚以經大力搶餌,我順勢一抽,中咗!好重手,知係大野,頂咗一陣,快攪幾吓,條魚又衝,我再頂,成枝筏仔彎哂,心諗炸就炸喇,一寸都唔比佢,如果鬆少少比佢,肯定難以收科,所以一路控制住條魚,等佢開唔到尾,佢一鬆我就收,跟住條魚改變策略,想向樁柱標埋去,我就即刻駛出乾坤大羅移嘅步法,向右行兩三步,一路扯到行,再駛出左右野馬分鬃,一左一右,條魚即刻比我拉到佢暈酡酡,冇哂方向感,我趁呢個机會再用一招無敵風火輪,好快咁就將條魚收到水面,啊!唔怪知得咁好力喇,原來係條兩斤幾嘅紅鮋,跟住撈箕上水,剪線落生扣,換鈎落餌繼續;再釣多半個鐘都冇料到,望吓個錶,差唔多22點,既然有收獲,費事磨爛蓆,又係時候講拜拜喇。

中番條紅鮋,D信心番哂黎。

 又紅鮋又細鱗,仲唔威番次。
紅鮋兩斤幾,細鱗斤頭。

2014年9月26日 星期五

細細條都算係目標魚吖

26-9-2014  (農曆九月初三)
噚日老友攪咗個退休晚宴,我同大人都有去赴約,所以冇去釣魚,今日得閒,攞盒虾仁就直跴主吩場釣番夠本。
落到去都費事路釣金古喇,一便心玩沉底釣目標魚(細鱗),開好兩枝竿,一枝筏仔釣腳邊,一枝小磯釣一竿出;到開始慢流果吓,我金睛火眼望實枝筏仔,果然有魚食餌,執起枝竿等佢大力拉果吓我就順勢一抽,中咗!不過感覺唔係大野,可以玩陣,收到水面見條細鳞得果半斤十両,撈箕都費事落,成俘條就咁抽上黎,解鈎落生扣,落餌繼續;一路釣到轉落流都冇第二口中,換過位置,用枝小磯竿掟遠D,果然又比我執多幾條劃仔喎!其間好多坑簾喺度攪攪震,釣到十一點就執野走人去食宵夜喇!

呢條真正係細鱗。
 細鱗就細咗D,加埋幾條劃又夠一餐。

2014年9月21日 星期日

有D魚仔玩吓

21-9-2014  (農曆八月廿八)
今晚落到主場,D水漲到横樁,須然未至到濕脚,但係一有大船過,肯定連底衭都濕埋,所以放棄釣金古,專心釣吓沉底好過。
落餌釣咗唔夠十五分鐘,即中條斤頭細鱗,再落又中,可惜大意比佢包樁,斷咗!跟住就只有細魚,先中條沙立,再中多三條黃腳仔,喺呢兩三年,主場都未有過黃脚,今年開始有番,係好嘅開始;一路釣到成十一點,都係執野走人喇!

沉底都有幾條魚仔玩吓。
細鱗斤頭,仲有沙立同黃腳。

2014年9月18日 星期四

都係金古最老友

18-9-2014  (農曆八月廿五)
颱風海鷗襲港,加上落咗幾日雨,攪到成十日都冇去釣魚,今日天氣唔錯,又得閒,咁就係雪柜摷番盒千年虾仁,攞埋兩塊麵包就直跴主場。
落到去見D水開始漲,嗱嗱聲娟入橋底釣陣金古先,又好彩喎,釣到天開始黑以經中咗四條,有兩條仲係磅頭;D水又漲到脚邊喇,即刻執架生轉位,番上橋面釣沉底,一路釣到十點幾都冇郁過,好彩之前執番幾條金古,如果唔係今晚又龜,時間都差唔多,都係執埋D架生,走人去宵夜好過喇~

好彩執番兩條磅頭金古!





好彩有佢,唔係又龜!

2014年9月10日 星期三

中目標魚

10-9-2014  (農曆八月十七)
話說噚晚比條魚KO咗,我睇都係細鱗多,今晚一於再去捕佢。
喺雪柜摷番盒千年虾仁就直跴主場,19:00落到去,見仲係行緊大流,慢慢開好兩枝竿,一枝係小磯竿掟去去釣吓魚仔,另外一枝係筏仔,釣腳邊直落沉底;一路都冇料到,釣到21:30,D流開始慢,我即刻換個靚位,今日係十七,好快開始轉落流喇,呢個時候見到枝笩仔竿頭好輕力咁點點吓,我即刻揸起支竿,條魚跟住發力搶餌,我順勢一抽,成個人企高一路頂起枝笩仔,跟住追番六七吓再頂,一吋都唔鬆比佢,全部壓力喺哂枝竿度,再追、再收,睇住就快上到水面,點知條魚發狂咁標入脚底D橫樁度,如果再同佢抖力就實聽斷繩收,咁就唯有焗住比番幾手佢走吓,跟手帶番順佢出黎,再攪幾吓就到水面喇,真係細鱗,睇落都有兩三斤,即刻撈箕上水,落好生扣之後又繼續;又釣咗一粒鐘,都係冇乜料到,嘅然目的以達,22:30執哩架生番屋企食飯囉!

嘈醒大人同我影相。













中目標魚細鱗。
 三斤細鱗好野喇掛。
 噚晚斷一口,今晚冇得走!

2014年9月1日 星期一

中大野

1-9-2014  (農曆八月初八)
呢排要攪呢攪路,週身唔得閒,成半個月都冇去釣魚,今晚見冇咩做,落商場買半磅麵包就直跴主場。
落到去天開始黑,冇泥鯭化餌,釣咗半個鐘度就開始有魚訊喇,換咗三次餌,魚訊越來越強,睇住竿頭震震吓咁拉落去,我即抽,中咗!收幾野以知條魚有D斤両,就一就佢再攪幾吓,條魚發力,拉到磅頂都叮叮聲,見佢一慢就連攪六七吓,見魚喇,條金古真係好大餅,安全起見,用撈箕上水,解鈎落生籠,換餌繼續,一落就有魚接,食得好輕口,條魚大極有限,由得佢食,卒支食到拉竿先至起佢,兩三吓手勢就上咗黎,係條幾両嘅金古,即落埋生籠,呢個時候D水開始上泊喇,有船一過實濕腳,都係收竿嘅時候囉,跟手執埋D架生走人去宵夜好過喇!

斤半金古终於出現喇。
 中咗條斤半金古,今晚釣住兩條先。