2009年11月20日 星期五

旅行前一晚都要釣番轉

20-11-2009  (農曆十月初四)  生流
今日聽日去旅行嘅野,無所事事,都係要落主場止吓痕先至得,拿拿聲攞埋D架生,買好魚餌,就向主場進發喇!
19:15落到去,己經見師傅偉喺度釣緊,同佢傾咗幾句就喺樁頭開竿,擺好個架步,就同D老友吹吓水,好快又到咗21:00,依然未有魚訊,D風吹埋黎都有D凍,過咗一陣,枝竿頭彎咗一吓,嗯!有料到,立即攞起枝筏仔,感覺到係有魚食餌,特然比佢拉咗一野,感到係大野黎,但係又唔係中喎~等咗一陣,又冇勿動靜,就收番上黎睇吓,噢!隻蝦比佢搶咗,連喺同一位置,再落過餌,唔到一分鐘條友仔又黎偷野食喇,竿頭又係輕輕一吓一吓咁彎,特然見條魚絲走向左面,我就向反方向輕輕一帶,佢就向番右面走番過黎,但呢次嘅速度比較快,我順勢提高之竿,條魚卒之知道賴野喇!想發力過石,我有準備,點會比佢得程,一揪竿跟住連七八吓,己經離開危險地帶,佢再向下衝,我就比兩三呎佢囉,跟住輪到我發力喇,一頂幾收,唔使一分鐘就將條友仔拖上水面,只見漆黑嘅海中,銀光一閃,兩斤幾嘅大黑牛就好乖咁入咗撈箕喇!上咗水,嗱嗱聲叫老友呀海同我地影相,跟住落埋生扣。
再釣多一陣,偉哥話好凍,又冇魚訊,22:15拾埋架生,清理好釣場,一齊揸車去宵夜喇喂!

睇吓幾大餅牛屎,中咗魚個人即刻唔覺凍。

番到屋企,三公主未瞓,就同我地影番張合照先!

肥美大黑牛兩斤六。


2009年11月13日 星期五

天寒地凍中細鱗

13-11-2009  (農曆九月廿七)  東北風  生流
今日食咗晚飯,成七點幾先到主場,都幾大風吓,好彩著咗件比較厚嘅風褸,所以唔覺凍,開好竿,坐定定等運到,須然有流,但係唔算急,諗住飲啖水,沉底枝竿頭特然一彎,又彈番起,唔似蟹喎!係有魚試餌我除即攞起枝竿,收緊多餘嘅絲,過咗成十秒,竿頭又傳來魚訊,呢次食得好密,感到一吓強而有力嘅拉竿,我就往上一揪,連攪七八野,覺得佢有D力水喎!咁就慢慢頂一陣,將條友仔帶離危險地帶先,跟住一頂一收,半分鐘就上水面,啊!又係細鱗,落撈箕上水,費事落生扣,直接入冰箱。
再釣咗個零鐘,都冇動靜,剩係喂蟹,D流又開始轉急,都係拾埋D架生,早D去潤記食宵夜好過喇!拜拜!
等叔叔抱抱。

佢有夜視眼


2009年11月11日 星期三

呢次我知尼條係叫大眼海鰱喇!

11-11-2009  (農曆九月廿五)  大東風
今日一早起身,同架老爺車去驗車,買保險,又去運輸處攞埋行車証,攪咗大半日,見晚上得閒,就落主場玩番轉!
19:20落到主場,嘩好大風喎,心諗今次多數都係龜啦。開好晒竿坐定定等運到,點知全程落流都冇魚訊,剩得D蟹喺度偷食。停咗流我就轉個位,又過咗幾刻鐘,釣半水果枝竿有幾吓輕微嘅魚訊,我就拎起之竿準備,佢好快就有反應,一吓強而有力嘅魚訊,我就往上一提,中呀!但感覺唔係咁重,條友仔飛快出海,初初我重以為係小鱸魚,同佢玩番兩轉先,但好快佢就冇勿力,咁我就收佢埋黎一睇,咦!唔係鱸魚喎,係大眼海鰱喎,一野就飛佢上岸,費事洗撈箕,影好相,放入冰箱,繼續釣。
23:30都好!有一咀過吓,見再冇魚訊,就埋架生,清理好釣場走人,去食埋宵夜就番屋企喇!
條海鰱斤零重,但冇勿力水。

同佢影番張合照先得。

昇盤比例照都唔少得。

清蒸大海鰱,須然多骨,肉質較淋,但勝在有魚嘅鮮香味,一個字~~正!!


2009年11月9日 星期一

中完牛屎再中馬屎

9-11-2009  (農曆九月廿三)  慢流
今日諗住喺屋企抖吓,點知中午時高橋雪也來電,想今晚去南丫玩轉,我立即就比佢挑起條釣魚根,一口就答應咗佢。
呢次我揸車接埋佢,17:30己經入到香港仔,買好魚餌,再過鴨脷洲泊好車見時間尚早,就喺附近食埋飯,大家傾吓釣魚計,19:15到咗約定艇家時間,就行開去碼頭上艇,向南丫島進發。
20:10到咗目的地煤橋,我簡咗上大樁,點解我鐘意上大樁釣呢?為果度地方夠大,舒服D,高橋就鐘意上六樁。
上到去開好竿,照例兩枝筏仔沉底,一枝半水釣鱸。過咗差唔多兩個鐘,都係D零星小魚偷食,咁我就轉一轉位睇過點,見口渴就飲啖水先,呢頭放番低枝水,果頭就響鉸,呢次唔係一枝響,係兩枝一齊響,我一手攞起枝筏仔,另一枝就用腳踏實個鉸唔比佢出繩,手中枝竿就已成弓形,條魚已開始發力,我往上一提,跟住咗六七吓,條魚已受控制,再望吓腳下果枝筏仔,巳經比條魚拉到幾乎炸竿,為有將隻腳鬆一鬆佢,點知係咁出繩,我見佢慢番落黎,又踏番實佢喇,跟住嗱嗱聲番手中枝筏仔,將條魚狂收上水面,見都係斤頭牛屎,撈箕都費事用,成條飛佢上黎,都唔得閒攪佢喇,又攞起用腳踏實果枝竿,頂咗幾野,已經知佢包咗樁,唔敢太用力,但係我唔用力,條魚就發力想衝斷條繩,我只好放幾米繩比佢啦,希望條魚游番出黎,見佢停咗我又收番幾手,如是者來回四五次,跟住見佢冇晒動靜,我咕已經走魚喇,咁就放低枝竿,快手快腳,將之前上水嘅牛屎落生扣,攪惦晒再攞起枝竿,吓!條魚仲喺度卒知攪咗半粒鐘,我宣報投降放棄喇!收緊條繩用手大力一拉,咁就結束咗一場大戰!(算佢好彩)
收拾好心情,再釣過,呢次輪到釣半水果枝竿郁啦。開頭以為有鱸食餌,但係點解食得咁細力嘅?我就輕輕一帶,中呀!條魚飛得好快,但感覺好輕身,兩三個回合,已經見魚,原來係一條磅頭嘅馬友,都好!係我第一次中嘅魚種,又係將佢飛上岸,呢次唔落生扣啦,而係放入冰箱。
00:40開始埋D架生,清理好釣場,遠遠望到來接我地架艇嘅大光燈,佢好快埋到黎,我就攞埋D戰利品(魚),過六樁接埋高橋,上艇踏上回程。01:45埋到鴨脷洲攞車,再落香港仔食宵夜,送埋高橋番屋企,自己番到屋企都成兩三點喇。
好奈冇中過嘅牛屎。

呢條牛屎都算靚仔喇!有D勁樣衰。

條馬友係我第一次釣到嘅魚種

全晚嘅魚穫:牛屎斤頭×1,馬友磅頭×1,芝麻仔幾両×2,石九×3