28-2-2012 (農曆二月初七)
今日買到靚蝦喇，落到去北角渣華道街市先至有絮絮跳嘅蝦買，可能師傅偉熟嘅關係，仲可以任簡添，買咗餌我就直跴落主場先，師傅偉有Ｄ事要遲Ｄ先至黎。
到咗主場，開好三枝竿，一枝沉底搏符碌，兩枝半水釣鱸；落咗餌成個鐘，只有兩隻蝦比雞泡咬瓜咗，其餘時間郁都未郁過；呢個時候師傅偉又到咗，佢就開兩枝竿釣鱸，釣咗一陣佢就叫我攞撈箕，咁快就有料到，佢話頭威頭勢，須然條魚唔大(兩斤度)，不過揾陣起見，都係落撈箕好，咁梗係我做魚童喇，撈魚、解勾、落生扣一腳踢。
又過咗十幾分鐘，呢次就輪到我中魚喇，一抽以經知係細野，一直係咁攪，跟住成條飛佢上黎，落埋生扣就換餌繼續；呢個時候見師傅偉爬咗落橋底解勾，因為佢剛才收隻蝦上黎果陣，比Ｄ鐵網勾住咗，我就喺上面同佢收繩，收收吓聽到響鉸聲喎，完來係佢另外枝竿響，我就即刻放低Ｄ野，撲埋去執起佢枝竿先喇，佢果陣又喺橋底，唯有我同佢收喇，佢係用右手揸竿嘅，而我就用開左手揸竿，所以好似雞手鴨腳咁先至收到條魚上水面，佢就啱啱爬番上黎，呢次佢做魚童喇，撈箕上水，直入冰箱，睇睇個錶，又到十點，大東風又吹勁咗，而我地又有魚中到，都係執埋Ｄ架生，齊齊去宵夜好過喇！
有兩條花鱸釣吓都好開心喇，大人未瞓，同我影張先。
大東風都中兩條兩斤嘅花鱸。
今晚收穫都唔錯吖。
24-2-2012 (農曆二月初三)
23-2-2012 (農曆二月初二)
今日二公主黎同我地去飲下午茶，飲完送埋佢去金鐘，番到屋企都五點幾；執埋Ｄ釣魚架生，落街市買咗廿蚊基圍蝦(十二隻)，跟住就直晒落主場。
師傅偉今日有飯局唔黎得，所以今晚我就單打獨鬥喇！18:30一到埗就開兩枝竿半水釣鱸，再開多枝沉底搏大霧，釣鱸枝竿一落餌唔夠三分鐘，就以經比魚拉咗幾吓，跟住又冇咗動靜，收上黎睇吓，原來條魚咬屎咗隻蝦就走咗，真係比佢激鬼吏！為有再勾過隻蝦落去喇！
成晚都好大霧，海中間Ｄ船都睇唔到，仲落咗一陣雨添，如是者左搬搬，右釣釣，走雲Ｄ得食位都係冇魚訊，時間一分一秒咁過，好快又到十一點幾喇；算啦！我睇今晚都係龜架喇，咁就慢慢咁執野，但係雙眼都有望住幾枝竿架！特然見到啱啱換咗隻蝦落去果技竿彎咗一吓，跟住再拉到響鉸添，我嗱嗱聲擺低Ｄ野，飛撲埋去執起枝竿，一拎起枝竿條魚以經發力，我順勢一頂，結結實實咁中咗，感覺力度唔大，我就好順咁係咁收，唔使一陣就上到水面，見都係斤頭魚，費事落撈箕，一野就掟佢上岸，解勾直入冰箱，唔再落餌咯，再執埋Ｄ架生走人番屋企喇！
磨咗成晚爛蓆先中番條斤頭鱸；咁夜先番黎，梗係要自拍喇！
斤頭鱸夠嫩滑至好食。
肥美嘅花鱸仔
22-2-2012 (農曆二月初一)
食咗晚飯，又落主場玩吓，今次我唔使買蝦，因為師傅偉一早來電，話以經買咗餌，叫我直落去就得咯喎！
18:20落到去以經見師傅偉喺度釣緊，Ｄ流仲係好急吓，咁我就去埋便Ｄ躉頭釣吓，睇有冇符碌先！釣咗一陣，特然聽到師傅偉大叫撈箕，原來佢中咗條起碼六斤嘅鱸，但係條魚線又比Ｄ棚架鐵網勾住，好彩以經見魚，我就速落撈箕，喺棚面將條魚撈起，跟住解勾落生扣一腳踢。
又过咗一陣，見Ｄ流慢咗，即刻搬出橋面搏殺；一出去落餌唔夠三分鐘，睇住枝竿彎咗兩吓，即刻拎起枝竿，一抽就中，今次輪到我中魚喇，感覺都幾大條吓，一路係咁攪都冇停過喎，直至見光佢先鐘咗一吓水，咁順灘嘅，可能Ｄ水凍都未定，條魚都冇乜反抗就比師傅偉同我撈咗上黎，又落埋生扣，我就落餌繼續！
又釣咗一陣，Ｄ霧又大咗囉喎，仲好似有少少雨粉添，望吓個錶，咁快又十點嗱，既然兩個人都有魚中，都係齊齊執埋Ｄ架生去宵夜好過，霖走果時仲比咗一條鱸比奉場客，跟住我地就開車走人喇！
番到屋企，嘈醒咗大人添，仲同我影相，佢話條花鱸好似魚雷咁樣喎！
又一條五六斤嘅花鱸
18-2-2012 (農曆正月廿七)
今日本來冇打算去釣魚架，晏晝同大人去咗銅鑼灣行街街，行行吓師傅偉來電，問我今晚釣唔釣魚，我比佢一問，條釣魚蟲又共共吓喇，大人見我依依哦哦就話:「今晚冇咩你米去釣囉」！咁呀~咁我地去食野先囉。
食完野就即刻番屋企，打個電話比師傅偉，話比佢聽我買蝦，跟住執起Ｄ架生，標落街市買卅蚊蝦，19:30落主場，啱啱趕到流水漲盡轉落，嗱嗱聲開兩枝竿，落咗餌就金睛火眼恰到實；大約過咗廿分鐘度，見到枝竿好唔噚常咁彎咗，黎料喇!!我即刻攞起枝竿，慢慢收緊Ｄ繩，等到第二吓彎落去果時我就往上一抽，中咗!!人魚大戰立即展開！
我一抽中就快攪六七吓，感覺冇Hi樁喎，佢屎咧，順勢一帶，將條魚再帶出Ｄ先，頂咗幾秒，趁佢未回氣我就發力攪到佢上水面，條魚例牌用飛出水面洗鰓呢一招，咁就啱喇，趁佢一飛上黎我就拉緊條繩，反方向一拉，再黎多一次，條魚即時比我拉到佢暈跎跎，反肚投降，跟住我先慢慢落撈箕，上咗黎睇吓都有兩斤喎！唔錯，將條魚落埋生扣，再落餌繼續。
啱啱攪掂哂師傅偉先黎到，開埋竿就齊齊等運到，點知一路落黎都冇魚訊；今晚都幾凍吓，又大風，望吓個錶又到十點喇，跟住執埋Ｄ架生，去宵夜喇喂！
番到屋企大人瞓咗，咁為有自拍喇！
呢條花鱸聽日起肉切片用黎打邊爐。
條花鱸都幾肥吓，有兩斤幾。
17-2-2012 (農曆正月廿六)
今日天色咁好，梗係要去釣番轉魚喇，食咗晚飯，執埋Ｄ釣魚架生，落街市買廿蚊蝦，今日Ｄ蝦仲貴，賣成八十蚊斤，仲係屎吓屎吓果Ｄ，冇法喇，希望養番幾隻生，夠釣就算數！
19:10落到主場，開好竿諗住簡隻生蝦做餌喇，點知簡來簡去，都係得一隻比較生Ｄ嘅，咁就為有釣住先喇！呢個時候師傅偉又到咗，好彩佢喺禾富街市買到生猛嘅蝦，咁就可以開多枝竿囉！
20:40首先師傅偉開齋先，不過條魚勾住咗個鐵網，唔上唔落，我就嗱嗱聲換對水靴，爬落橋底，解番開條繩，好彩條魚得半斤十両，好容易就釣咗上去；跟住我上番黎，過咗一陣，今次到我中番條喇，不过都係磅頭鱸仔；Ｄ鱸又細番喎，解咗勾直入冰箱。
又釣咗一陣，睇吓個錶，嘩咁快又十點幾拿，見都冇勿起色，可能Ｄ蝦大而Ｄ魚又細，算喇！下次買Ｄ蝦仔黎再釣過，跟住就齊齊執野去宵夜喇。
Ｄ鱸又細條番。
14-2-2012 (農曆正月廿三)
今晚食過番尋味，五點幾就食咗飯，嗱嗱聲臘埋Ｄ架生出發，師傅偉一早買定蝦落咗去釣緊，所以今次我就唔使去買餌，18:30就落到主場，見Ｄ流水好靚，咁我就快手快腳開好竿，放番喺噚晚中大鱸個位等運到。
釣咗個零鐘度，我枝竿連續彎咗幾吓，嗯!!大鱸黎喇！咁我就快速執起枝竿，輕輕收緊Ｄ繩，條魚知賴野，想搶先發力，點會有咁順野吖，我順勢一抽，結結實實咁中咗！跟手連攪七八吓，再向樁柱外帶順，再攪七八吓，見魚喇，嘩!!都有噚晚果條咁大喎！幣~你詁咩事呢？撈箕唔喺附近添！咁我就唯有叫師傅偉过去攞撈箕，點知條鱸見光就發狂，一野跳出水面洗鰓，咁我就要就一就佢喇，比番多少佢走吓，咁就出事喇！條魚向下一衝，比佢開到尾，再標埋條樁度，我拉都拉唔切，條繩啪!!一聲~枝竿即時輕哂！人魚大戰即時結速。
我抖順條氣，定一定神，手震震咁再挷過勾，落餌繼續，今次我再開多枝竿同佢屎過；又釣咗一陣，師傅偉中條斤頭小鱸，佢話同我報仇喎！真係比佢笑屎；說時遲那時快，我新開果之竿響鉸喇，一手執起枝竿，一抽就順住咁攪，唔使廿秒就收到上水面，見唔係大野(兩斤樓下)，撈箕都費事落(唔使洗撈箕)，一野掟佢上黎，解勾直入冰箱。
22:00Ｄ霧越黎越大，而我地又有魚中到，須然條大嘅上唔到，不過都有兩條安慰獎吖，二比一都係人類勝，跟手執埋Ｄ架生，齊齊去宵夜喇！
(好食)嘅花鱸仔！
13-2-2012 (農曆正月廿二)
今日天氣暖番Ｄ，即刻約埋師傅偉去釣番轉；魚餌店成個星期都冇蝦仔賣，所以落去街市睇有冇生蝦賣先，今次又有喎，不过好貴，要73蚊斤，我就要咗三十蚊，其實都係釣唔哂嘅，一半都夠，不過唔好意思買得少啫！
18:30落到主場，今次都係開兩枝竿算喇，一枝沉底搏符碌，一枝就梗係半水釣鱸喇；一路都冇魚訊，只有一次枝竿彎咗兩吓，我攞起枝竿佢就放口，收隻蝦上黎睇吓，比佢咬屎咗添，橫惦咁多餌，再換過隻落去睇吓點；20:10師傅偉又到咗，呢個時候Ｄ流水開始加快，過咗一陣，我枝竿又向下彎咗一吓，呢次我就輕輕力咁攞起枝竿，由得條魚食深Ｄ，乜鱸都食得咁精口，大約拉咗五六吓我先至慢慢將枝竿提起，感覺到條魚係咬哂隻蝦喇，我就快速往上一抽，中呀！人魚大戰即刻開始。
果度中魚，冇得同佢玩，一抽就連攪七八吓，老虎都頂到行，再攪五六吓，見魚喇，嘩！睇落都有五六斤喎，更加要小心Ｄ，師傅偉同我撈魚，第一吓撈唔到，比佢標番落去，我焗住鬆番多少比佢，再黎第二次上水，呢次冇得走喇，撈箕上水，影相落埋生扣，再勾隻蝦落去搏殺！
22:00一路都冇魚訊，Ｄ東風又吹猛咗，都係時候執野走人，去宵夜好過囉！
奈冇中大鱸，中咗就零舍開心嘅！
驚影唔到，叫師傅偉影多幅保飛。
咁早番到屋企，梗係向大人耀武揚威一番架喇！
呢條鱸都算幾肥喎！過磅足六斤，長77Cm。
