今日天氣暖番Ｄ，即刻約埋師傅偉去釣番轉；魚餌店成個星期都冇蝦仔賣，所以落去街市睇有冇生蝦賣先，今次又有喎，不过好貴，要73蚊斤，我就要咗三十蚊，其實都係釣唔哂嘅，一半都夠，不過唔好意思買得少啫！
18:30落到主場，今次都係開兩枝竿算喇，一枝沉底搏符碌，一枝就梗係半水釣鱸喇；一路都冇魚訊，只有一次枝竿彎咗兩吓，我攞起枝竿佢就放口，收隻蝦上黎睇吓，比佢咬屎咗添，橫惦咁多餌，再換過隻落去睇吓點；20:10師傅偉又到咗，呢個時候Ｄ流水開始加快，過咗一陣，我枝竿又向下彎咗一吓，呢次我就輕輕力咁攞起枝竿，由得條魚食深Ｄ，乜鱸都食得咁精口，大約拉咗五六吓我先至慢慢將枝竿提起，感覺到條魚係咬哂隻蝦喇，我就快速往上一抽，中呀！人魚大戰即刻開始。
果度中魚，冇得同佢玩，一抽就連攪七八吓，老虎都頂到行，再攪五六吓，見魚喇，嘩！睇落都有五六斤喎，更加要小心Ｄ，師傅偉同我撈魚，第一吓撈唔到，比佢標番落去，我焗住鬆番多少比佢，再黎第二次上水，呢次冇得走喇，撈箕上水，影相落埋生扣，再勾隻蝦落去搏殺！
22:00一路都冇魚訊，Ｄ東風又吹猛咗，都係時候執野走人，去宵夜好過囉！
奈冇中大鱸，中咗就零舍開心嘅！
驚影唔到，叫師傅偉影多幅保飛。
咁早番到屋企，梗係向大人耀武揚威一番架喇！
呢條鱸都算幾肥喎！過磅足六斤，長77Cm。
沒有留言:
張貼留言