2012年4月26日 星期四

獨鬥三斤紅鮋

26-4-2012  (農曆四月初六)  大東南風
今晚我嘅釣友師傅偉有飯局,咁我就單拖落主場;去街市執廿隻生蝦,落到去都未夠18:30。
啱啱起流,出面又大風,咁我就喺躉頭擺陣,落餌冇奈釣鱸枝竿比魚拉咗一吓,我即刻攞埋撈箕過去,一執起枝竿條魚以經中咗,順勢攪幾吓,唔係大野,好快就撈箕上水喇,係斤幾嘅小鱸,解勾落埋生扣,一腳踢,勾隻生蝦再釣過。
20:40見D流慢咗D,咁我就放番枝沉底竿搏吓符碌先;坐低唔夠三分鐘,釣沉底果枝竿個鉸〝烈烈〞響咗一吓,我坐喺則邊,好快就拎起枝竿,說時遲那時快,條魚拖咗兩吓就發力搶餌喇,我就狠狠咁往上一抽,中咗!慣性動作連攪七八吓,嘩!!有D斤両喎~條魚想標番落底,我就頂到行,一路頂一路往上提竿,發覺條魚冇
力果吓,又快速收佢十吓八吓,仲要將條魚帶離樁柱位,一出咗黎條魚見光就發哂茅,開尾向外面衝,喺呢個位置我就定當喇,唔再夾硬頂,咁就放番幾呎繩佢走吓,當佢一慢落黎果吓,我就左頂左收,右頂又收,幾招就將條魚拉到上水面,嗯!!紅鮋黎喎,都有兩三斤,速落撈箕上水,落埋生扣,即刻落餌睇仲有冇先!
一路釣到21:30,D風好似越吹越勁咁,海面都起哂湧,既然都以經有收穫喇,咁見好就收,執齊架生同魚獲,早D去宵夜喇喂!

番到屋企又向大人耀武揚威一番。

而花鱸係每次嘅釣胆黎

又準備劏魚~紅鮋兩斤十三X1
花鱸斤幾X1      



2012年4月24日 星期二

大鱸轉過頭又番黎

24-4-2012  (農曆四月初四)
今日臨去釣魚果時,烏天黑地,好似想落雨咁,不過未落出,唔理三七廿一喇,有理冇理,執埋架生,落渣華道街市攞蝦,跟住就直跴主場。
一到主場,流水剛起,即刻喺躉頭開竿,19:10先中一條四斤花鱸,過咗冇奈再中條斤零嘅;呢個時候,師傅偉又到咗,佢開好竿就行過黎同我吹水,佢話依家咁行流,唔方有魚開口喇,話口未完,佢枝竿就響鉸喇,佢三步
埋兩步過番去執起技竿,一抽就中,上黎係唔夠半斤嘅花鱸,解勾揼番落海,等養大D先再釣番佢。
又過咗一陣,我就悶到行行企企,望過去師傅偉度,見佢喺度搏緊命,嗯!!中大野喎~咁我就攞埋撈箕過去幫拖,行到過去見佢停哂手嘅,但係見枝竿仲係彎哂喎,哈哈!!條魚包咗樁,佢就鬆吓收吓,條魚此終都唔肯番出黎,我就梗係比D鼓勵性嘅說話佢喇~比D耐性,條魚一日唔走,實會比你拉番出黎嘅,講完我就行番去自已果邊;大約過咗十幾分鐘,見佢企番起身頂魚喎!卒知比佢拉番出黎,我做魚僮,撈箕上水又係四斤花鱸,落好生扣攪掂哂,又回復番平靜。
一路釣到轉埋流,幾枝竿都冇再郁過,22:15執野走人,早D去宵夜好過喇。
番到屋企兩隻貓咪咪咁叫,嘈醒咗大人,咁就順便同我影幾幅相先喇。


兩條都差唔多大喎!

呢條就細咗DD。

又有排劏喇。


2012年4月23日 星期一

沉底中獎

23-4-2012  (農曆四月初三)
今日心大心細,去唔去釣魚呢!卒支師傅偉來電,問今晚制唔制,比佢一問,我嘅答案當然係制喇;一手攞起D釣魚架生,跟住去街市攞埋蝦就直跴主場喇。
19:10落到去,流水都幾急吓,咁我就喺躉頭開竿,過咗冇奈師傅偉都到咗,佢就例牌喺橋面釣鱸,擺好個陣就喺度吹水,特然我沉底枝竿響鉸,我即刻執起枝竿,等佢再食深D果吓就抽竿,中咗!我就快速攪咗五六吓,嗯!有D力喎,唔似牛屎,咁我就唯有頂幾秒先喇,跟住再攪幾野,又頂一陣,條魚想向樁柱衝,我就邊頂邊拉,追返幾手,一見條魚出番黎就唔客氣喇,又使出絕招「無敵風火輪」,一路將條魚攪上水面,唔怪得片得咁犀利喇,原來係斤幾重嘅牙點,師傅偉己經落咗撈箕一野就上水喇,將條魚落好生扣就繼續。
一路釣到21:20,師傅偉連起兩條鱸,我見橋面咁好魚,速速轉陣上埋橋面搏殺,搬咗上去冇幾奈又比我中多條鱸喎,呢次即入冰箱,因為時間都差唔多喇,見好就收,有魚留番聽日釣,執埋D架生就去宵夜囉!
番到屋企,三公主啱啱去完台灣番黎,咁就揾佢同我影將相。


今晚釣沉底中獎,牙點斤幾。

大人話:「係囉,釣多D呢D魚吖嘛」!
佢以為釣魚可以簡黎釣喎,真係比佢笑鬼屎。


又牙點又花鱸今晚都算大豐收。

日日有咁好魚就正喇~   牙點斤幾X1
花鱸斤幾X3


21-4-2012  (農曆四月初一)
登埋前晚中果兩條爛鬼鱸魚(大人話)先。

2012年4月17日 星期二

三三不盡

17-4-2012  (農曆三月廿七)
今日師傅偉來電,問我去唔去釣魚,呢輪咁旺,梗係應承佢喇,咁就等佢去簡定蝦先,我就煮埋飯,嗱嗱聲執架生落渣華街市攞蝦,19:15就落到主場。
D流仲係好急吓,慢慢開好竿,坐定定等運到,點知一坐就坐咗個幾鐘,流都轉埋,三枝竿郁都未郁過,呢個時候,師傅偉就到咗喇,佢就開好兩枝竿,跟手上番車做其〝睡夢羅漢〞;過咗一陣,我枝竿郁攞喎,竿頭彎哂落去,我一抽就中,好快上到水面,喺斤零兩斤嘅花鱸,頭威頭勢實落撈箕嘅,落埋生扣一腳踢。
21:10望吓師傅偉,佢仲喺車度瞓到流哂口水,而我就悶到擔天望海,呢個時候,特然佢由車度跳出黎,一手就執起枝竿,跟住就係咁攪,好快就將條魚收埋上黎,磅頭花鱸,都唔使我攞撈箕過去幫拖,佢自己解咗魚,我就攞住條魚準備落生扣,又聽見響鉸喎,佢都未放低中魚果枝竿,第二枝竿又有魚食餌喇,三步夾埋兩步就標咗埋去,執起枝竿一抽就中,呢次我唔理佢喇,攪掂扣埋條魚先去攞撈箕,佢就〝鄧〞住條魚喺度等我,最後都係撈箕上水,又係斤零兩斤嘅花鱸,今次直入冰箱喇,因為都成十點喇,比佢連起兩條,過足
,好彩我都有一條中吓,冇咁瘀,跟住我地執埋D架生,走人番屋企食飯喇。

今晚冇大野,費事嘈醒大人,靜靜雞玩自拍。

今晚又有三碌, 好彩雪柜個冰箱夠大啫,唔係就擺唔落D魚穫喇。

2012年4月16日 星期一

剩係轉流果吓先開口

16-4-2012  (農曆三月廿六)
兩日都落雨,今日較為好天,即刻走去買十零廿隻蝦,18:30落到主場,見以經有三四個釣友喺度釣緊,咁我就揾個靚位開好竿,呢個時候D流開始慢落黎,過咗一陣,見枝竿頭拉咗一吓,我一執起枝竿就抽,中咗,好細條,幾吓手腳就將條鱸仔上水,費事洗撈箕,一野就掟佢上黎,半斤鱸仔,落好生扣,落餌繼續。
又過咗一陣,行過去睇吓枝沉底隻蝦有冇比蟹化餌先,當我攪緊上黎嘅時候,聽到剛才中魚果枝竿響哂鉸,我就立即放低枝沉底竿,飛埋去執起響鉸果枝竿,點知條魚好快咁包咗樁,開頭仲感覺到佢喺度,三四秒之後就郁都唔郁,噢!!〝斷咗〞唯有屎屎氣收番D線上黎,手震震咁挷過勾再釣過。
落咗餌唔夠五分鐘,竿頭又拉咗吓,我執番起枝竿先,再慢慢收線,一緊條魚就發力喇,順勢一抽,中咗!呢條都有D力喎,攪咗幾吓,就就佢又攪幾吓,唔使一分鐘,條魚就比我拉到上水面,我見條花鱸都有兩斤幾,都係落撈箕揾陣D,上咗水落好生扣,落餌繼續。
跟住落黎就到「蛇仔明」中斤頭細鱗,「呀廖」又中條斤幾花鱸,跟住落黎流水已轉,D魚又收哂口,兩個鐘郁都未郁過,我釣到22:30就執野走人去宵夜喇。


D爛鬼鱸魚(大人話)係食轉流果吓。

花鱸X3,(兩斤半、斤半、半斤)


2012年4月13日 星期五

破自己主場記錄中十一斤花鱸

13-4-2012  (農曆三月廿三)

噚晚咁早走,今日一於約埋師傅偉去釣過,佢就去簡蝦先,跟住我去攞,今次佢買咗50蚊蝦,都唔知買咁多黎做,實釣唔哂,霖走實倒落海餵魚,嘥哂D野!
我就18:30到主場,D流水好慢,開好竿,坐定吹吓海風真係舒服;等到20:00師傅偉都黎埋,我三枝竿郁都未郁過,過咗一陣,D流停哂,咁我就將D架生搬入去躉頭位,即係噚晚中八斤花鱸果度,睇有冇運行先。
過咗一陣就開始行流喇,我就金睛火眼咁
到實幾枝竿,其中一枝好快咁比魚拉咗一吓,我即刻執起枝竿,條魚想發力,我比佢更快,一抽就即攪咗五六吓,好順喎!再一頂就直收上水面,跟住撈箕上水,係兩斤嘅花鱸仔,落埋生扣,再落餌繼續;喺呢個時候,師傅偉又中條兩斤嘅花鱸仔,靜咗一陣,我枝竿又有魚訊喇,拉咗兩吓,我執起枝竿條魚已經發力,順勢一抽,中咗!!但係感覺又Hi住樁,唔怕~頂陣先,跟住鬆一鬆繩,條魚就出番黎,我就把握呢個机會,個人向後行咗幾步,將條魚由樁柱位拉出黎,再收繩,嘩!!好重嘅拉力,机乎攪唔郁,〝大野〞!我只好再靠邊住後行,好彩枝竿夠力,卒之比我拖咗出黎,見魚喇,好巨型嘅魚影,即刻叫師傅偉過黎幫拖,條魚一見光就想開尾,我唯一可以做嘅就係放繩,放咗七八呎,又收番佢上黎,佢又標番落去,如是者都有三四個回合,最後佢知走唔甩喇,反肚投降,今次好彩有師傅偉幫手撈魚,上咗水睇清楚,條魚又肥又大,起碼十斤,我同佢落兩個生扣。
時間過得真快,咁快就23:00點嗱,我地都有中魚,咁就執埋D架生,一齊去宵夜喇。

番到屋企專登大大聲嘈醒大人,等佢同我影相。

抽高D唔會摭住塊面。

越拎越攰,要兩隻手抽住先至得。


哈哈!!仲有兩條兩斤小鱸。

今晚嘅收穫都唔錯,尤其是條十一斤嘅花鱸,因為係破咗我自己喺主場嘅記錄,真開心。

長度係 88Cm



2012年4月12日 星期四

力拼八斤大花鱸

12-4-2012  (農曆三月廿二)
今晚食過番尋味,買咗蝦就直跴主場,師傅偉唔得閒,所以今次我要單打獨鬥!
19:00落到去見係流尾,嗱嗱聲開好竿,諗住D魚會開口,點知等到轉哂流,三枝竿原封不動;見D流水開始大咗,咁就唯有將架生搬番去入面D躉頭度釣;今日天氣開始熱,攪惦哂都成身汗,坐低想話飲啖水,特然聽到鉸響,我就用九秒九嘅速度標埋去執起枝竿,呢個時候枝竿以經比條魚拉到彎哂,我就即刻往上一抽,諗住先攪幾吓,但感覺到條魚線Hi住樁,咁我就唔敢收繩,唯有頂陣先喇,頂咗四五秒,咁都唔係辨法過喎,跟住改變戰畧,鬆番D比佢,一鬆之下,果然條魚就轉頭游番出黎,咁我就順勢快速攪咗十幾吓,條魚亦不甘示弱,又發力向D樁柱間標埋去;我開頭以為條魚都係兩三斤啫,但係條魚喺呢一衝,我就知係大野喇,即時打醒十二分精神,同一時間就鬆番幾呎佢走吓,跟手就連頂帶攪,又將條魚帶番出黎,出咗黎我就定喇,一路上上落落幾回合,卒之見魚喇,〝幣加伙〞...枝撈箕唔喺旁邊添,點樣上魚呢,慢一慢又比條魚鐘番落去,又要費一輪功夫先至將條魚再拉番上水面,〝唔怕!有辨法〞我即刻將條魚,沿住個躉邊,一路帶過去,途中條魚都有兩三次嘅反抗,我好小心咁帶到埋放撈箕果度,仲要伸長隻手先至〝O〞到,一落撈箕就上水,嘩!!睇落都有七八斤喎!將條魚落好生扣,我就坐低抖順條氣飲番啖水先,跟住剪去Hi花咗果D魚線,挷過勾,再落餌繼續。
望吓個錶已經21:00,番到屋企呢條魚都有排攪,都係早D執野走人去宵夜好過囉!


咁早番到去,大人仲未瞓,仲同我影埋相添。

咁大條花鱸,好野呀呢!

過磅八斤四、80Cm



2012年4月10日 星期二

水口暖番些少D大鱸先肯開口

10-4-2012  (農曆三月二十) 
幾日冇釣魚,手都痕埋,約咗師傅偉,跟住就落街市買蝦。
19:15到主場,流水剛起,嗱嗱聲開好竿,坐定定等運到;一路D流水都好急吓,過咗兩個鐘,三枝竿郁都冇郁過,呢個時候師傅偉黎到喇,佢就開一枝竿釣鱸,仲要喺車上面
眼瞓,特然見佢由車度跳出黎,執起枝竿,一抽跟住就中魚,好順咁攪到上黎,斤零花鱸,我同佢撈魚,當我將條魚落緊生扣果時,佢又話中魚喎,我又要同佢撈魚;攪掂哂想話坐低抖抖,呢次輪到我枝竿郁喇,我快手執起枝竿,條魚以經發力,我順勢往上一頂,跟住快速攪咗四五吓,條魚有番D力水,一慢落黎就比佢鐘頭落番去,咁我梗係放番多少比佢走吓,點知好好彩,條魚係咁向外標,我就住再放多野繩比佢,跟手開始收繩喇,收吓放吓條魚都係喺出面飛,足足玩咗成分幾鐘,師傅偉已經揸定個撈箕喺度等,仲話快D收佢上黎喇,玩爆咀今晚又瞓唔著喇,我唯有收佢埋黎,上咗水,落埋生扣,望吓個錶,我地中三條魚都係廿分鐘度咋,跟住落黎又靜哂;22:00見大家都有魚中,咁就齊齊執埋D架生走人去食宵夜喇。

開始有回頭花鱸釣喇!

其實成晚都係釣果廿分鐘。

呢兩條鱸仔都有斤幾重

廿分鐘嘅收穫:大鱸X1四斤半。
鱸仔X2斤幾。



2012年4月2日 星期一

花鱸牛屎兩相依

2-4-2012  (農曆三月十二)
今日師傅偉來電,話佢去炳記簡定蝦先,叫我到時到候去攞,咁我就唔使咁趕,食埋飯,它它條條去攞埋D蝦,直跴主場。
落到去啱啱轉流,都係照舊兩枝釣鱸,一枝沉底有
乜就
;釣咗個半鐘度,以經釣咗兩條磅頭鱸仔喇,呢個時侯師傅偉先至黎到,我就比個靚位佢,而佢都係剩釣鱸;同佢喺度吹緊水,特然佢個鉸響,咁佢就飛撲埋去,執起枝竿,我見佢枝竿頭只係輕微咁點點吓,佢就話條鱸好細喎,唔拉竿嘅!我就叫佢唔好抽竿,等佢拉竿先至好抽,呢頭講完,果頭佢就抽竿喇,見佢頭幾吓都收得好順,跟住見條魚一發力,另到師傅偉要鬆繩比佢走,嗯!!原來係大野喎,佢就話唔係好大啫!不過我都去攞定撈箕先,一路攪到上水面一睇,原來係條牛屎,咁我就將條魚撈咗上黎,入埋生籠。
又到10:00點喇,兩個人都有魚中,都係執野走人囉。

到依家先知,原來個海係得呢兩種魚~

師傅偉釣鱸釣到嘅牛屎,益埋我喇!

牛屎兩斤X1
花鱸磅頭X2