今晚我嘅釣友師傅偉有飯局，咁我就單拖落主場；去街市執廿隻生蝦，落到去都未夠18:30。
啱啱起流，出面又大風，咁我就喺躉頭擺陣，落餌冇奈釣鱸枝竿比魚拉咗一吓，我即刻攞埋撈箕過去，一執起枝竿條魚以經中咗，順勢攪幾吓，唔係大野，好快就撈箕上水喇，係斤幾嘅小鱸，解勾落埋生扣，一腳踢，勾隻生蝦再釣過。
20:40見Ｄ流慢咗Ｄ，咁我就放番枝沉底竿搏吓符碌先；坐低唔夠三分鐘，釣沉底果枝竿個鉸〝烈烈〞響咗一吓，我坐喺則邊，好快就拎起枝竿，說時遲那時快，條魚拖咗兩吓就發力搶餌喇，我就狠狠咁往上一抽，中咗！慣性動作連攪七八吓，嘩!!有Ｄ斤両喎~條魚想標番落底，我就頂到行，一路頂一路往上提竿，發覺條魚冇乜力果吓，又快速收佢十吓八吓，仲要將條魚帶離樁柱位，一出咗黎條魚見光就發哂茅，開尾向外面衝，喺呢個位置我就定當喇，唔再夾硬頂，咁就放番幾呎繩佢走吓，當佢一慢落黎果吓，我就左頂左收，右頂又收，幾招就將條魚拉到上水面，嗯!!紅鮋黎喎，都有兩三斤，速落撈箕上水，落埋生扣，即刻落餌睇仲有冇先！
一路釣到21:30，Ｄ風好似越吹越勁咁，海面都起哂湧，既然都以經有收穫喇，咁見好就收，執齊架生同魚獲，早Ｄ去宵夜喇喂！
番到屋企又向大人耀武揚威一番。
而花鱸係每次嘅釣胆黎架！
又準備劏魚~紅鮋兩斤十三X1
花鱸斤幾X1
沒有留言:
張貼留言