水口暖番些少Ｄ大鱸先肯開口

10-4-2012  (農曆三月二十) 
幾日冇釣魚，手都痕埋，約咗師傅偉，跟住就落街市買蝦。
19:15到主場，流水剛起，嗱嗱聲開好竿，坐定定等運到；一路Ｄ流水都好急吓，過咗兩個鐘，三枝竿郁都冇郁過，呢個時候師傅偉黎到喇，佢就開一枝竿釣鱸，仲要喺車上面恰眼瞓，特然見佢由車度跳出黎，執起枝竿，一抽跟住就中魚，好順咁攪到上黎，斤零花鱸，我同佢撈魚，當我將條魚落緊生扣果時，佢又話中魚喎，我又要同佢撈魚；攪掂哂想話坐低抖抖，呢次輪到我枝竿郁喇，我快手執起枝竿，條魚以經發力，我順勢往上一頂，跟住快速攪咗四五吓，條魚有番Ｄ力水，一慢落黎就比佢鐘頭落番去，咁我梗係放番多少比佢走吓，點知好好彩，條魚係咁向外標，我就住再放多野繩比佢，跟手開始收繩喇，收吓放吓條魚都係喺出面飛，足足玩咗成分幾鐘，師傅偉已經揸定個撈箕喺度等，仲話快Ｄ收佢上黎喇，玩爆咀今晚又瞓唔著喇，我唯有收佢埋黎，上咗水，落埋生扣，望吓個錶，我地中三條魚都係廿分鐘度咋，跟住落黎又靜哂；22:00見大家都有魚中，咁就齊齊執埋Ｄ架生走人去食宵夜喇。

開始有回頭花鱸釣喇！

其實成晚都係釣果廿分鐘。

呢兩條鱸仔都有斤幾重架。

廿分鐘嘅收穫:大鱸X1四斤半。
鱸仔X2斤幾。