2012年9月16日 星期日

釣下價野都爭

16-9-2012  (農曆八月初一)
今日18:00落到去釣魚,我睇都係釣得果兩個鐘度,因為睇過天聞台話21:30D水會漲到兩米,米八都濕腳喇,仲話兩米添。
捐咗入去橋底,啱啱擺好個陣,Uncle就到喇,開頭大家落竿嘅位置都有兩三呎距離,點知我果邊開始有魚訊,跟住仲起咗條小烏添,當我再落餌,又有魚食餌,而佢果枝竿郁都未郁過,佢即刻收起枝竿,走埋過黎用手繩拍住我釣,點知D魚都係冇食佢嘅餌,但係我枝竿就好明顯食過不停,當我中第二條小烏嘅時候,佢又換番枝竿黎釣喇,今次唔止拍住釣,跟本兩條魚線距離唔夠三寸,點釣呀!跟住我又中第三條小烏喇,兩條魚線拍咁埋,一中咗魚緊係〝Q〞埋一齊喇,收到上黎,我都費事解勾,用較剪剪鬼斷條魚線,即刻收埋D架生,我話:「我唔釣喇,比你釣埋佢喇」!跟住捐番上橋面,掟浮波出去,睇有冇大海烏釣吓,一路都冇魚訊;過咗一陣D水都漲到浸腳喇,呢個時候見〝茅王Uncle〞上番黎喇,仲笑笑口抽住兩條烏頭,我心諗,唔係識你咁奈,真係一腳伸你落海;跟住我冇彩佢,執埋架生走人去宵夜喇!


烏頭仔都有幾條釣吓 ,過釣得谷鬼氣囉!

細細地,用黎蒸蒜頭豆鼓都幾好味

2012年9月14日 星期五

勾都拉直

14-9-2012  (農曆七月廿九)
今日攞埋幾條魚去D公主度,一番屋企,即刻執架生落主場,落到去以經見D隱膽釣腳係度釣緊,佢地以經有魚中咗,咁我都唔好執輸,速速開竿,點知可能我黑仔,落咗餌之後,兩三個鐘,幾枝竿郁都未郁過;九點幾Uncle走先,剩得我同師傅偉喺度吹水,踎到十點,D流開始慢咗D,我枝竿頭就輕輕比魚拉咗幾吓,黎料喇!當佢再較為大力D拉嘅時候,我就快速抽竿,中咗~嘩!!好猛嘅拉力,攪咗兩吓以經再攪唔郁,唯有屎頂,磅頂又發出叮叮聲,頂咗四五秒諗住再收,噢~輕哂#開頭以為比佢飛埋樁Hi斷繩,點知收番上黎睇,原來隻勾比條魚拉直咗;等咗幾個鐘先有魚中,可惜又走魚,嬲到手都震埋,震都要挷過隻勾落去,今次換隻大少少嘅勾落去,睇佢點拉得直;呢個時候,師傅偉又中魚喇!上黎係條磅頭金古,即刻比捧場客打劫;過咗十零分鐘,我又有魚食餌喇,今次食得仲細力,師傅偉就話梳羅仔啫,但係我就唔敢大意,對眼望實竿頭,特然枝竿頭彈起咗,我就一抽即中,又係好重手,頂吓收吓幾個回合,見魚喇,睇住條魚高速喺水中打轉,你個心都米話唔十五十六,收到埋黎好彩有師傅偉幫拖,撈箕上水,條魚睇落都過斤;走咗一條,好彩又中番條,師傅偉就話:「你今晚唔洗瞓唔著喇」!
跟住再釣多陣就執埋D架生,有魚留番聽日釣,兩個傻佬就一齊去宵夜喇!

呢輪中親D金古都係斤頭 ,力水猛都不得了。

今季D金古同上季嘅釣法又唔同咗,唔通D魚都會進化嘅!




2012年9月13日 星期四

獨孤一味

13-9-2012  (農曆七月廿八)
釣魚虫咬,今晚食咗飯先落主場,落到去Uncle同大師傅以經喺度釣緊,我準備落竿,大師傅就中魚,同佢撈埋條魚上黎,都有斤頭;攪掂哂我就落餌喇,一落就有魚食餌,抽咗兩竿都唔中,跟住D流就行急咗,D魚就收哂口;都要釣架,餌落餌上,原封不動。
過咗個幾鐘,D流開始慢番,即刻就有番D輕微魚訊,D魚食得好精,食一口就要等十幾秒先番再食一口,冇話連食嘅動作;我即刻改變戰畧,勾粒細D嘅餌落去,當佢食得較為大力果吓就抽竿,一抽即中,上黎係條幾両金古,須然細咗D,不過戰畧成功,落餌繼續;又過咗一陣,D魚又係咁食餌,我又用番剛才咁嘅戰術,果然又中,今次呢條就有D力喇,我攪咗幾吓,條魚就扯到行,磅頂即時又叮叮聲,頂咗三四秒,即刻再收,今次就好順收到上水面,睇落好大餅,唔敢直上,大師傅就同我撈魚,中咗條大野,個人即刻精神哂!將條魚落埋生籠,下餌繼續;呢個時候,大師傅同Uncle都各中一條,我亦都唔弱,一抽又中,上黎都係斤頭金古,跟住Uncle再中多條D魚就收哂口喇!望吓個錶,原來咁快又成十一點嗱,今次就齊齊執野,鬆人去宵夜喇!

又中斤幾嘅金古 。


換個角度都係咁大餅 。

兩條都係差唔多咁大條 。


金古越釣越大 。




2012年9月10日 星期一

唔聲唔聲嚇你一驚

10-9-2012  (農曆七月廿五)
今日打開個雪柜,發覺冇哂貨,咁就梗係要落主場攞番D貨喇;到咁上吓就起架生,落商場買半磅麵包,直跴主場。
落到去以經見師傅偉、Uncle、大師傅三個喺度釣緊烏頭,仲釣咗幾碌添,我就嗱嗱聲揾個位開竿,一落餌即刻有魚食,發覺唔係烏頭果種食法,我靜靜雞收番舊餌上黎,換過金古釣組落去,唔夠半分鐘,見竿頭一彎,我就抽竿,好大嘅拉力,快手收幾吓,磅頂又發出叮叮聲,再追番幾手以經見魚,嘩!!一大餅野喺水面度片水,片到啪啪聲,佢地即刻望哂過黎,金古一離水就唔郁,我就好小心用撈箕由條〝喇〞果度攞條魚上黎,條金古喺今季都算大野,望落去都有斤頭過外,解勾落生籠,即刻落餌繼續;呢個時候,各人都換哂釣組,跟住幾枝竿好似彈鋼琴咁,又彈下上又拉吓落,中完又中,各人都中幾條,有D仲爆咀、斷勾,總之未得閒過,仲有一兩吓係中老烏,將幾條魚線炒埋一碟,媽媽之聲四起,卒之釣足兩個鐘先至停口,一冇魚訊就攞D水出黎飲吓,大家正在有講有笑之祭,特然大師傅大聲叫:「你枝竿呀」!我以經見之竿頭即時飲水,即刻快手抽竿,都唔係好勁啫,幾吓就收條魚上黎,原來係條大眼喺度攪攪震,解勾即入冰箱;見佢地仲喺度釣緊,我就執埋D架生,同佢地講拜拜喇!

呢條算係近期最大架喇,都係斤鬆D !

詁唔到斤頭金古依家先至出現 。


豐收嘅一晚 ,四條金古,加一條大眼




2012年9月8日 星期六

失魂魚

8-9-2012  (農曆七月廿三)
今日星期六,早半個鐘落主場喂泥鯭;天未黑,D泥鯭多度舊餌未到釣層就以經比佢地化咗,係咁落餌,都唔知換過幾多口餌喇,我諗冇五十都有四十口!
收太陽喇,早幾晚都係喺呢個時候,D烏頭大軍就會出現,我就打雀咁眼睇住竿頭,有冇烏頭嘅魚訊,過咗一陣,師傅偉又到咗,佢開好竿坐定定,兩個儍佬喺度等運到,我地兩枝竿都有輕微嘅魚訊,較為大力D嘅我地就抽竿,只係釣上黎嘅唔係泥鯭就係梳蘿,仲釣到條雞泡添;天都黑齊都未有一咀似樣D嘅魚訊,我地就喺度天南地北咁吹水,特然間師傅偉之竿比魚拉到幾乎跌落水,佢好快手一抽,中咗魚,跟住我枝竿又比魚拉到彎哂,我一攞起枝竿都唔使抽,以經知道中咗喇!佢又攪,我又攪,好彩兩條魚分開走,好快大家都由條〝喇〞度收咗兩條魚上黎,兩條都係大眼
,放入生籠,落餌繼續,一路釣到水漲到腳先至娟番上橋面,見時間尚早,就用浮波掟出去睇有冇烏頭玩,點知都係得過等字,釣到十一點,兩個浮波都未郁過,都係執埋D架生,齊齊去宵夜好過喇!

又有大,都幾大條吓 。

麵鼓醬蒸黎食~正 

2012年9月6日 星期四

樣樣有

6-9-2012  (農曆七月廿一)

今日同大人約埋大姨,落筲箕灣「東盛」飲下午茶,三個人都係食咗百零蚊,仲好飽飽添,大人就話今晚都唔食飯囉,我即刻打蛇隨棍上,咁我去釣魚喇,佢就話你米去囉!哈哈~得咗。
番屋企執埋架生直跴主場,落到去居然冇人係度喎,咁我就開好竿,落餌喂泥鯭,喂咗十幾口餌,終於比我釣條金古,解勾落生籠一腳踢!落餌繼續;天開始黑,泥鯭收口,又冇金古魚訊,正想攞枝水飲吓,見到枝竿比魚拉住落,好彩仲有隻手,一手拿起枝竿,往上一抽,連攪七八吓,見魚喇,原來係大眼,跟手入埋生籠,再落餌又中,都係大眼;心諗唔通有成基大眼喺度,嗱嗱聲再落餌!過咗一陣,又有魚食餌喇,震震吓咁我就以為係金古,一抽竿我就知賴野喇,好重手,連攪四五吓,磅頂又響,叮叮叮叮...,一路收一路響,再睇佢標水嘅速度,唔使問梗係烏頭喇,上到水面想話攞撈箕,攞得黎條魚又爆咀!收番條魚線上黎,見到隻勾直咗,而家知點解我話賴野喇,因為釣開金古,隻勾丁屎咁細,鐘條大烏頭埋黎,你話點頂!嘅然有烏頭,我就即刻換釣組,勾過舊餌落去,呢次我落一噚水,過咗半分鐘度就有魚埋黎食喇,食到咁上吓我就將枝竿輕輕一提,即刻就有鼓拉力往下沉,順勢一抽即中,又係好重,雖然磅頂都有響,過我一手都唔放比佢,連攪咗十幾吓就將條魚收到上水面,我先將條烏頭離水一半,以免佢有機會鐘頭,再小心由條〝喇〞果度伸枝撈箕落去,呢次佢冇得走喇,喺條〝喇〞度抽上黎,條魚機乎都唔夠過,呢條烏頭足足有三斤,解勾即入冰箱,落餌繼續;又釣咗陣,D流開始急,冇魚開口喇,跟住執好架生,收埋D魚穫,跟住去宵夜喇!

今季第一條過三斤嘅烏頭 。

又係食麵包孖寶 。

仲釣多兩條大眼倉添 。

今晚樣樣有 。


「同場加影」5-9-2012  (農曆七月二十)
噚晚釣嘅兩條金古仔,見冇勿驚喜,所以冇寫Blog。


2012年9月4日 星期二

下價野黎喇

4-9-2012  (農曆七月十九)
今日倍大人食埋晚飯先至去釣魚,所以落到主場都好晏,所謂晏其實都係六點鐘度;一落到去以經見D鐵腳喺度釣緊,嗱嗱聲開好竿,一落餌就有魚訊喇,梗唔係金古喇,邊有咁好魚吖,都仲係D泥鯭喺度化餌啫;喂咗一陣泥鯭,開始感覺有金古食埋黎喇,首先見Uncle枝竿頭彈起,佢好快一抽,中咗,快手攪咗條魚上黎,生籠都唔落,就咁用個桶載住就算,因為佢知道釣金古要掌握黃金半小時,所以解魚後要盡快落餌,當佢攪緊嘅時候,我枝竿頭以經震震吓咁比魚拉落去喇,我順勢一!即中~上黎都係半斤十両金古,我就一定用生籠架,將條魚養住,番到屋企都仲生;釣完呢兩條又靜哂!又過咗一陣,開始有番D魚食餌喇,似乎係烏頭喎~各人立即換釣組,當時D流水都幾急吓,而我落果粒鉛就比佢地嘅鉛較大,所以會定D冇咁漂;條魚食咗我舊餌幾吓,我就輕輕往上一提,立即感到有鼓沉重嘅聚力,說時遲,那時快!咁我就使勁一,再連攪幾吓,一路頂一路攪,原全唔比條魚有机會開尾,因為釣兩潯水,所以好快就將條魚收到上水面,今次Uncle同我撈魚,我就連聲唔該哂!將條烏頭入埋生籠,落餌繼續,一落即有魚接餌,呢次食得好狼屎,成枝竿拉到彎哂,一即中,又係好容易收到上黎,入埋生籠;呢個時候,望望師傅偉,佢呢幾晚,揸咗枝善良之竿,未發過市;我再落餌,但呢個時候,真係三枝竿都冇郁過,跟住大家又有時間吹水喇!再釣多陣諗住走人,早D番屋企,點知落大雨,一落就落咗成九個字,我地等到停雨先捐番上橋面,執埋D架生,番到屋企都十一點幾喇!

今晚又中食麵包孖寶。


今次D烏頭大條夾肥美,成兩斤幾一條。

金古我睇都釣得七七八八喇,接住落黎就係玩烏頭喇!


2012年9月3日 星期一

有講有笑又一晚

3-9-2012  (農曆七月十八)

今日嘅釣手又係我、師傅偉、Uncle;落餌即比泥鯭化餌,三條友仔一味勾餌、落餌、收繩,成大半個鐘都係做同一動作,過咗一陣,今次我第一個有金古魚訊,而Uncle亦冇打茅波,條魚食到震震咁吓拉落去,抽竿即中,跟住就到Uncle有魚食餌,佢既然唔打茅波,我亦無謂攪破壞,佢又好順利咁中魚,跟住再比佢釣多條添,不過好細條,即捕即解;我心諗...大家咁釣魚你話幾好呢!至於師傅偉呢,仲未開齋喎~話口未完,只見佢一抽竿就成枝竿彎哂,見佢咬實牙關係咁頂係咁收,條魚走嘅速度好快,唔駛問又係大老烏喇,我同Uncle就嗱嗱聲收起D繩,費事炒哂粉,幾個回合條魚上到水面喇,仲喺度〝噼叻啪咧〞!好大條喎~我就即刻攞撈箕由條〝喇〞果度伸落去撈魚,點知都未到水,己經聽到師傅偉「噢」一聲,即刻靜哂!又比條魚KO~我地一見有烏頭出現,即刻換釣組,不過D烏頭唔多,相信都係得幾條路過,只有Uncle釣到條唔夠一斤嘅烏頭仔,佢就用個桶裝D水養住先,點知佢一行開,條烏頭就跳咗出黎,仲由鐵絲網D窿跌番落海,條魚真係夠運,番去要還神,我就同師傅偉笑到收唔到聲。又釣咗一陣,D流又大咗,粒餌落咗去成五分鐘都冇魚食,我睇都係咁先喇,大家執埋架生去宵夜好過囉!今次須然我中得一口,但係大家公平釣魚,嬴番友誼,所以今晚釣得特別開心呢。

今次享受完「過程」,好早就番到屋企喇。

得條半斤十両嘅金古都好過冇。


2012年9月1日 星期六

麵包孖寶

1-9-2012   (農曆七月十六)
今日落咗幾場大雨,諗住唔去釣魚,但係當師傅偉來電問落唔落去釣番轉,我條釣魚虫即刻活躍起黎,即答跟住到,跟手執埋D架生就飛車落主場。
落到去原來我最早到,開好竿釣金古,師傅偉又到埋,一路都有魚訊,不過好怪,我地抽極都唔中,跟住教我地釣金古果個大師傅都黎埋,佢一睇就話呢D唔係金古魚訊,有可能係烏頭,我同師傅偉就話:「D烏頭點會食得咁細力
,你釣條上黎我地就寫個服字比你」!話口未完,大師就話中魚,上到水面原來真係烏頭,可惜撈箕都未放到落去就斷魚收場,我地速速換過釣組,一放落去就有魚接餌,果頭大師又上魚,我都唔弱都中番條,跟住我地三個人夾埋都斷咗四五口,地方淺窄,條魚大D都好難上,連斷幾條,D魚就嚇到走鬼哂!
又釣咗一陣,魚訊又開始有番喇,但係食得好精,食極都唔到釣,呢次我就首先換番金古釣組,落第二口餌就中條磅頭金古,跟住佢地都換埋釣組,之後佢地都中魚,我就再中多條,一連釣咗幾條又靜哂;望吓D水,差唔多漲到上黎喇,今晚大潮,會漲到1.8米,既然大家都有魚中,都係執埋D架生,有魚留番聽日釣,齊齊去宵夜好過喇!


番到屋企,大人未瞓,同我影幅相先。

呢對就係食麵包嘅孖寶咧!

烏頭斤頭,金古磅頭&十両。