2014年1月16日 星期四

D魚係睇到人架

16-1-2014  (農曆十二月十六)

噚晚咁早中魚,今晚食過番尋味,落到去開好竿,坐定定等中魚,點知今晚由18:00,一路釣到轉埋流,三枝竿郁都未郁過,心諗成十點啦,今晚都係龜架喇~算吧喇,執野走人。
先收沉底枝竿,跟住倒哂D蝦落海喂魚,收埋蹬仔,整吓呢樣整吓果樣,望一望釣鱸枝竿,嗯!!彎哂嘅,即刻放低D野,飛撲埋去執起枝竿,噢~條魚包咗樁,好彩仲有拉力,即係表示條魚仲喺度,扯得兩扯唔郁添,唔通爆咗咀?我改為用手收線,用陰力慢慢拉,又拉得郁少少喎,不過感覺條魚線HI住條樁,烈烈聲想断想断咁,拉咗五六吓特然一鬆,即刻快手收幾野,可能正話條魚D氣力用哂,到我收佢上黎就好順,原全冇反抗,只係上到水面先有幾吓爭扎,嘩!!成五斤喎,即落撈箕上水,解鈎直入冰箱。
你話咯,成晚三四個鐘,寸步不離,金睛火眼望到實幾枝竿,冇條魚埋黎食餌嘅,你一行開咗,冇乜為意嘅時候,佢就埋黎偷食,我諗D魚真係見到我地架;霖尾中番條唔使龜,跟住收埋其他野,走人去宵夜喇!

霖尾中番條五斤唔使龜



今次呢條大過噚晚果條
















劏咗先記得未影相


2014年1月15日 星期三

水凍花鱸肥

15-1-2014  (農曆十二月十五)

幾日冇釣魚,明知今日風猛都要去切番轉;買好蝦,18:00就到主場,到開竿果陣先發覺出黎充忙過頭,冇攞魚竿添,不過唔使驚,冇帶用開果兩枝竿啫,車上面仲有幾枝士啤竿喺度。
今次只係開兩枝竿,都係半水釣鱸,大約七點度,其中一枝竿比魚拉咗一吓,咁我就即刻執起枝竿,說時遲那時快,條魚以經發力狂拉,我就順勢一抽,即中!快手攪幾野,感覺條魚順住咁游上黎,見机不可失,加快收線嘅速度,上到接近水面,條魚先至想轉頭開尾,我梗係頂頂佢先喇,頂咗幾秒就頂佢唔順,為有放番D線就吓佢,唔係炸竿都有份呀!就咗一張就輪到我發圍喇,一手帶順佢個頭向番水面,一手就連攪十吓八吓,終於見魚囉,睇落都有三斤,條魚作最後爭扎,飛出水面洗鰓,我即刻拉緊條魚線,再將枝竿一左一右擺動,條魚即時冇哂方向,反肚投降,今次梗係撈箕上水喇,跟住解鈎落生扣一腳踢,再落餌繼續。
20:30轉埋流,再釣咗兩粒鐘都冇料到,只係比墨魚偷食咗四隻蝦,下次帶埋墨魚假餌黎做佢世界至得;呢個時候D北風又勁咗,都係執野走人去宵夜好過喇!

一早中都係得一條


























呢條鱸都有三斤幾



好肥美嘅花鱸







2014年1月9日 星期四

一條到尾

9-1-2014  (農曆十二月初九)

噚晚爆咀走魚,條氣唔順,今日一於落主場捉番佢;18:00落到去照例開好三枝竿,一落餌即刻就有魚接,拉咗兩野,我就比鬆D佢,等佢再大力扯嘅時候就狠狠往上一抽,即中!攪七八吓,頂一頂再攪,好順咁上到水面,係兩斤小鱸;今次唔敢偷懒喇,即落撈箕上水,落好生扣放落水養住先。
心諗~冇屎喇,唔通有成基鱸埋咗黎,速速落餌繼續,點知一路磨到成十點幾,三枝竿都未郁過,北風又越吹越勁,都係執野走人去宵夜好過喇!

噚晚比佢走甩今晚捉番佢



係得一條兩斤鱸仔



聽日用冬菜碎蒸


2014年1月8日 星期三

懶之過

8-1-2014  (農曆十二月初八)

今日天色灰暗,好似想落雨咁,本應冇打算去釣魚,見得閒就攞D釣具出黎清理吓,點知一執起D架生,釣魚蟲即時共共吓,唔係喇!都係去主場過吓引至得;即刻執架生,買餌直跴主場。
落到去開三枝竿,兩枝釣鱸,一枝沉底搏符碌;開好竿坐定定等轉流,卒之到九點幾開始轉流D鱸先至開口,又係食得精過鬼,一連比佢偷咗兩隻蝦,落第三隻先中到佢,上黎係兩斤小鱸,呢頭將條魚落好生扣,另外枝竿比魚拉到彎哂,個鉸係咁出線,我三步夾埋兩步飛身埋去執起枝竿,抽都費事抽,即刻連攪七八吓,感到條魚線 Hi 住條樁,立時停止再收,放番鬆D線比佢,我等條魚游番出黎果陣,机不可失,往上一頂,跟手一路將條魚帶番出黎,再連頂帶收,好快上到水面,見又係兩斤小鱸,費事落撈箕,諗住一野就掟佢上黎,點知條魚上到一半就爆咀跌番落海,噢!懒之過~算喇,好彩都有之前一條壓吓冰箱,見D北風又起,仲開始凍咗D添,有魚留番聽日釣,都係執野走人去宵夜好過喇!

本應有兩條,懶落撈箕爆咀走魚。

















好彩都有條魚交差。

2014年1月7日 星期二

釣季節魚

7-1-2014  (農曆十二月初七)

乖孫洋洋番咗佢屋企,咁我就有時間去釣番晚魚喇;落街市執二十蚊蝦就直跴主場,落到去見D流都幾急吓,先喺躉頭踎陣先,冇料到,再等到D流行慢咗,即刻般出橋面,不過一樣水静河飛,釣到番流都係龜氣冲天,卒之磨到十點幾枝竿先至有魚拉,不過食得好精,梗係D衰鱸仔喺度攪攪震,收番隻蝦上黎睇,半隻比佢咬到扁哂,再鈎過隻落去睇吓點,一落就接餌,又係輕輕拉吓拉吓,今次我就鬆少少比佢,果然中計,呢吓佢就大力扯喇,不過我都唔抽住,再鬆多野比佢,等佢再大力扯竿果吓,我就快速抽竿,仲唔屎!中喇掛,條鱸唔夠兩斤,所以好容易收到上黎,將條鱸落好生扣再落餌繼續。
落咗餌又過咗半粒鐘,呢次食餌動作就大好多喇,竿頭拉咗兩吓就扯到成枝竿彎哂,我手落竿起,即時感到條魚有D斤両,一抽就連攪六七吓,跟住到佢發圍就點都要比番D面佢架,鬆番兩手佢走吓,見條魚慢落黎我就吸啖氣一頂,再一路好順咁就將條鱸收到上水面,見都有三四斤,即落撈箕上水,生扣都費事落,直入冰箱,時候都唔早喇,跟手收埋D架生去宵夜囉~

公公拜拜喇!


花鱸起雙飛。



























磨到11點先中番條大D嘅。



























個海剩係得花鱸。




2014年1月3日 星期五

第一條魚

3-1-2014  (農曆十二月初三)

排成日掛住同乖孫玩,飯局又多,所以少咗去釣魚,今日的起心干去釣番轉

一早(17:00)就落到主場,諗住釣埋個晚黃;今次D虾隻隻都好生猛,因為我續隻簡囉,唔生猛都唔要
先捐入橋底釣陣先,一路都冇魚訊,到起哂流先至上番橋面,初初喺躉頭踎咗成兩粒鐘,都係冇料到,再試吓擺出去流水位度搏殺,擺好個陣就坐定定飲啖水先,呢頭飲緊水,果頭枝竿比魚拉到彎哂,肯定喺我唔留意嘅時候已經食餌,唔係枝竿點會彎得咁犀利吖;一嗱起枝竿都費事抽喇,即時攪咗五六吓,妖~冇力嘅!唔係大野,玩陣先;慢慢將佢收上黎,見條得斤零重,撈箕都費事落,成條飛佢上黎,解魚落生扣一腳踢。
再落餌繼續,都有兩三次食餌,不過食得好鬼精,担住打橫走,你以為中咗,一抽就放口,眞係比佢激屎!!
再釣多陣就執埋D架生鬆人去宵夜喇。

今年第一條魚就係鱸仔斤幾。





好彩有鱸魚。