懶之過

8-1-2014  (農曆十二月初八)

今日天色灰暗，好似想落雨咁，本應冇打算去釣魚，見得閒就攞Ｄ釣具出黎清理吓，點知一執起Ｄ架生，釣魚蟲即時共共吓，唔係喇！都係去主場過吓引至得；即刻執架生，買餌直跴主場。
落到去開三枝竿，兩枝釣鱸，一枝沉底搏符碌；開好竿坐定定等轉流，卒之到九點幾開始轉流Ｄ鱸先至開口，又係食得精過鬼，一連比佢偷咗兩隻蝦，落第三隻先中到佢，上黎係兩斤小鱸，呢頭將條魚落好生扣，另外枝竿比魚拉到彎哂，個鉸係咁出線，我三步夾埋兩步飛身埋去執起枝竿，抽都費事抽，即刻連攪七八吓，感到條魚線 Hi 住條樁，立時停止再收，放番鬆Ｄ線比佢，我等條魚游番出黎果陣，机不可失，往上一頂，跟手一路將條魚帶番出黎，再連頂帶收，好快上到水面，見又係兩斤小鱸，費事落撈箕，諗住一野就掟佢上黎，點知條魚上到一半就爆咀跌番落海，噢！懒之過～算喇，好彩都有之前一條壓吓冰箱，見Ｄ北風又起，仲開始凍咗Ｄ添，有魚留番聽日釣，都係執野走人去宵夜好過喇！

本應有兩條，懶落撈箕爆咀走魚。

好彩都有條魚交差。