2015年2月25日 星期三

開年魚

25-2-2015  (農曆正月初七)
過咗年第一次開竿,為咗好嘅開始,目標魚一定係鱸魚喇!
去釣魚店買廿隻蝦就駛車落主場,去到見D流水啱啱起,我就嗱嗱聲開兩枝竿釣鱸,再開多枝腳邊打沉底,釣咗唔夠半個鐘,其中一枝釣鱸竿比魚拉到響鉸,我一攞起枝竿都費事抽,即攪幾吓,完全感覺唔到有反抗嘅跡象,咁樣就好容易就收到上黎,一條唔夠兩斤小鱸,為安全起見,梗係撈箕上水喇,解鈎落生扣,換餌繼續。
一路釣到十一點都係一條到尾,既然攞咗頭彩,所以都唔好同佢磨喇,跟住執埋D架生,走人去宵夜喇!

好彩又比我釣番條開年魚。
斤頭小鱸都算好嘅開始。
開年好彩有條鱸仔釣吓!


2015年2月16日 星期一

終於破龜

16-2-2015  (農曆十二月廿八)
由上月尾至依家,連龜N次,今晚終於破龜喇~
本來話收爐架喇,不過釣引難忍,今晚又見得閒,都係落主場踎番陣解吓毒至得。
走去魚餌舖簡十零隻蝦,18:00落到去,開好竿,兩枝半水釣鱸,一枝沉底有乜釣乜;一路到八點幾,釣鱸枝竿頭比魚拉咗兩吓,黎料喇!我一執起枝竿,條魚以經搶餌,順勢一抽,中咗!條魚唔大,斤零鱸仔,幾吓手腳就比我收上黎,頭威頭勢,安全起見用撈箕上水,跟手將條鱸解鈎落埋生扣,想話落餌繼續,點知沉底果枝竿響鉸喎!裂~裂~我即刻放低D野,飛撲埋去執起枝竿,等竿頭一沉就抽,又中!都有D力水喎,都係好順咁比我收佢上黎,原來係好奈都冇釣過嘅牛屎,都係用撈箕上水,順手落埋生扣,跟住先得閒同枝鱸竿上餌,一齊落餌繼續。
一路釣到十一點幾都再冇魚訊,都係唔好磨爛蓆,見好就收,執埋D架生去宵夜好過喇~

卒之比我釣番條牛屎喇!
 年尾收爐先至有條牛屎中吓。
 牛屎同花鱸都幾肥美。























龜咗大半個月今晚算豐收囉!