2011年2月24日 星期四

再去南丫揾條花鱸食吓先!

24-2-2011  (農曆正月廿二)  屎流
上次喺南丫煤橋釣果條花鱸,大人同奉場客都
話好食,咁我就再約「高橋雪也」,再去煤橋
,睇有冇食神至得,今次高橋仲叫埋佢嘅好兄
弟一齊尼玩添。
18:45落到北角,停咗車喺咪錶位等高橋,想
話入錶行開陣,去買碗什河食吓,點知自己換
咗銀包,冇帶八達通,咁為有唔走開喇,費事
泊貴位嘛!等咗陣佢就尼到。
19:00跟住飛車入香港仔「滿利」買魚餌,好
彩趕得切未關門,再去「南記」買三碗「鴛鴦
米」做糧食,就過去鴨脷洲泊好車,喺洪勝碼
頭上船向南丫出發啦!

睇佢呢兩位美式裝備嘅〝貴〞客,今次又有冇

驚喜先!

我就沖滿信心中目標魚喇。

20:10到咗目的地,佢兩個就上三樁,我依然
中情大樁。一跳上去就嗱嗱聲開好枝釣鱸竿先
,落咗餌,再開埋兩枝打沉底竿,跟住就坐定定
,望住三枝竿等運到!

今晚係屎流,D流水好慢,一路轉咗幾次位,
三枝竿毫無動靜,到咗22:50釣鱸果枝竿頭彎
咗一吓,黎料喇!!我即刻揸起枝竿,竿頭再彎咗
幾吓,跟住就來一野沉重嘅拉力,嘩!大野~我
馬上揚竿,成枝竿都彎晒,即攪四五吓,越收
越緊,咁我為有頂幾秒先喇,將條魚由樁底頂
番出尼,再攪幾野,條友仔一出黎見光就開尾
發力,我就即刻放幾呎繩佢走吓喇,佢以為得
米就慢落尼我就把握時機,吸一囗氣,發力
再頂,順勢一路收佢上水面,佢就出埋最後絕
招『飛出水面洗鰓』,冇用嘅!!到最後都係要
乖乖入我嘅撈箕度上水喇。快手將條魚落好生
扣,檢查D繩有冇花,發覺主、子線都花晒,
咁就換過子線,落餌繼續釣。
見得閒就攞條鱸上尼影番幅相先。

睇落尼條花鱸大過上次果條喎!

一路到霖走前半個鐘,都有一吓食餌嘅魚訊,
佢放口,收番隻虾上黎睇吓,隻比佢咬
扁咗,跟手換過餌再放落去,跟住就一路收架
生一路住枝竿,卒知到最後都係冇料到。
01:30上番黎接我地架艇番鴨脷洲喇。
兩個〝貴客〞又做〝龜客〞,冇晒心机,一上
船就大覺索,我就梗係開心喇,因為又贏一扙

「高橋」...條花鱸想咀你呀!!

番到鴨脷洲攞車,再落香港仔森記食宵夜,跟
住送埋佢地番北角,番到屋企都三點半喇!
咁夜大人梗係瞓咗覺喇,又係要自拍先得喇。
「May姨」!!我冇將條魚隊前黎影,條魚係咁
大條加嘛!

準備劏魚,尼條魚肥一肥,重四斤半,
長度70CM!

總結:天氣回暖,鱸魚開始開口,而沉底依然冇
生物,可能水口仲凍。

2011年2月22日 星期二

北角主場兔年第一擊

22-2-2011  (農曆正月二十)  小小凍
今日唔係好凍,係時侯去主場攞番個頭彩喇,
18:30一條冷落到去,正在起緊流,我用最快
速度開好三枝竿,睇今日有冇運行先一路
釣到22:00三枝竿郁都唔郁吓,尤其是沉底果
兩枝。算喇收野走人~收剩枝半水釣鱸果枝竿
喺度搏符轆,其他架生一路慢慢收!
收收吓架生,見釣鱸果枝竿頭慢慢比野拉落去
,我梗係即刻起枝竿,點知條友仔食得好精
,輕輕拉咗幾吓就放口,我收番隻虾上黎,隻
虾比條鱸咬屎咗,嗱嗱聲鈎過隻最生猛嘅虾乸
落去,一放落去唔夠十呎,隻虾就搏命咁跳
,跟住一吓沉重嘅拉力,我都唔敢住,當佢
第二吓發力嘅時侯,我就黎料喇,重重一野
竿,〝中咗〞我一寸都唔比佢,幾吓手腳就上
水面,跟手撈箕上水,解鈎直入冰箱,見頭彩
已攞,見好就收,執埋D手尾就鬆人囉!

食埋宵夜,番到屋企都成點鐘喇!



大人瞓咗覺,我又要自拍喇!

呢條花鱸都好肥美,腰背圓潤,過磅兩斤五。

劏好魚,攪惦晒D野,整番碗(大人煲定等我番
黎食嘅)南北杏木瓜雪耳糖水潤吓先!


2011年2月16日 星期三

兔年第一擊!中目標魚

16-2-2011  (農曆正月十四)  大生流
今年嘅頭彩,一樣唔番主場攞,因為對佢冇哂
信心!
晏晝「高橋雪也」約我今晚去【煤橋】釣番轉
,咁就梗係即刻應佢喇!
18:15到『北角』接埋佢,就往目的地出發喇
。喺『香港仔』買好餌,車番過『鴨脷洲』,
架車又係泊番喺『洪勝碼頭』,上好糧水(鹵水
鵝米),19:00「勝哥」架艇往煤橋。
喺途中又發現呢件新玩具,又梗係「高橋」D
價野喇,呢舊咁嘅野都唔七千蚊,
『好...平..啫..』!!

唔好望實我,今次冇面比,睇今次係貴架生
贏吖定平架生贏!(上次我D平野輸咗比佢)

我都係上大樁,「高橋」就梗係五樁嘅。我一跳
上樁就趁啱啱轉,嗱嗱聲開好架生,冇幾奈,
釣半水果枝竿頭,重重咁比野拉咗一吓,收番上
黎睇,隻蝦得番個頭,嗯~有料到!即刻鈎過隻
生猛D嘅蝦落去果然快呀吓,放咗都唔夠十呎條
魚就埋尼搶喇!中呀≧≦頭威頭勢,唔同佢玩,
人魚大戰唔半分鐘就結速,撈箕上水,跟手落
兩個生扣,嗱嗱聲再落餌,睇仲有冇運行至得。

好奈冇中過嘅魚,釣到梗係零舍開心嘅!

得我一個人,影相就要自拍喇!



打個電話過去「高橋」度問戰况,佢就扁哂咀
話連斷兩口,有一口重見係三四斤嘅牛屎添。

跟住落尼,個海又好似冇哂生物咁,水靜河非。

准備執野走果時,釣鱸枝竿又響喇,我輕輕一
帶就中咗佢喇,冇力水,好順咁就收咗上黎
,係斤頭小鱸,因為就走,所以直入冰箱。執
好架生,清理好釣場,上艇回航。

今次係【平架生】嬴!花鱸四斤。

一大一細,雙影成趣。

準備劏魚喇。

沖埋凉,食D野,攪得黎都天光喇!拜拜