2012年11月28日 星期三

扯我枝竿落海嘅下場

28-11-2012  (農曆十月十五
噚晚比魚扯咗枝竿落海,今日走去置番D新架生,買番同一牌子。
枝竿就比之前果枝長咗3cm,個攪就細500號。


呢枝係〝赤狐姬〞360,落海果枝係330,米睇佢竿仔細細,頂起魚黎好輕鬆

佩埋個史文勞 SHIMANO 2000

加埋三號全炭線,今晚仲唔做佢世界!!


上行架生,攞埋盒千年蝦仁,唔買生蝦,直跴主場;落到去己經開始轉流,喺D得食位釣咗一陣冇料到,搬番D架生過去噚晚飛竿嘅位置釣吓劃仔,因附近有挖泥工程,嘈喧巴幣,連劃仔都好疏口,一路釣到成十一點,架挖泥船拖離現場,個海先至靜番哂,喺呢個時候,我新買果枝磯竿仔一吓就彎哂落去,黎料喇!呢次我坐定定到實,所以就好快速咁抽竿,跟住連攪七八吓,條魚扯到行,人魚角力即時爆發!!磅頂又發出刺耳嘅叮叮聲,頂咗四五秒,見條魚收力,我即刻又追返七八吓,條魚又發力向右飛,果度係喺海中心,冇樁冇柱,唔怕同佢玩一陣,又頂咗四五秒,將條魚控制返左邊,開始過黎喇,今次可以攪成十吓八吓,埋到黎離腳邊仲有8米左右,呢個時候最危險,一不留神就會比佢標入樁底,到時就惡攪喇,所以我要出〝左右野馬分鬆〞一左一右咁又收又頂,到條魚冇哂方向感,收到見魚喇,嘩!!好大餅嘅細鱗,就係呢條魚扯咗我枝竿落海喇;條魚反抗咗一陣,卒知升水反肚,我就好快咁落撈箕,條魚入咗撈箕就定好多喇;大戰結速,人類勝!將條魚落好生扣,再落餌繼續,一路釣到十二點,再冇魚訊,跟住執埋D架生,走人去宵夜喇喂!

拖我枝竿落海嘅下場就係咁喇。

呢條細鱗足三斤幾。

今晚瞓得著喇。

今季釣嘅細鱗,呢條算最大喇。

2012年11月23日 星期五

由冇變番有

23-11-2012  (農曆十月初十)
前日釣完魚番屋企,照例影吓收穫,點知部影魚相机神咗,影出黎嘅較果唔掂,開頭唔知,等我攪掂哂D野,想話上載D照片上相簿度,點知插張咭落電腦開出黎睇,噢~咁花嘅!!魚又劏埋,冇得保飛添。

你地睇,部相机夠期喇,影到好似畫出黎咁!

仲衰過以前D手机影嘅!


講番今日嘅戰況先,今日我又係早過師傅偉到主場,開好竿就等運到;過咗大約一個鐘度,沉底果枝筏仔響攪喎,我啱啱坐正喺枝竿側邊,所以好快就一手執起枝竿,條魚以經發力,我跟手一抽,快攪幾吓,條魚搏命想開尾,咁唯有頂佢一陣喇,再黎收線,開頭都收得好順吓,點知仲有十呎八呎就感到條魚線Hi住樁柱,跟住仲收唔郁添,我即刻放鬆個攪比佢走番出黎先,一鬆之下,條魚真係走番出黎,機不可失,心諗~你仲唔屎!!一提竿跟手攪咗幾吓,特然〝啪〞一聲條魚線輕哂,收番上黎係斷咗帶腳,真係谷鬼氣,仲爭幾呎就上到黎喇咁都比D木樁Hi斷!落筆頭就打三更,冇計,釣魚就係咁喇,屎屎氣挷過勾繼續
師傅偉又黎到,佢話D流咁急,釣陣劃仔先喇,都好喎!橫掂都毫冇魚訊,轉吓釣魚仔冇咁悶;開頭釣腳邊,比D魚仔化餌,跟住掟遠D,粒餌一沉到落底唔夠幾秒,一吓好大嘅拉力,自然嘅反應梗係抽竿喇,中咗呀!!攪咗幾吓,條魚又黎一吓標水,磅頂即時叮叮作響,頂咗幾秒就繼續收線,今次因為係掟出去釣,所以唔怕條魚埋樁,飛來飛去,頂吓放吓,玩咗一兩分鐘,上到水面喇,原來係兩斤嘅細鱗,唔怪之得咁好飛喇,想話攞撈箕,幣傢伙~諗住釣魚仔,枝撈箕冇攞過黎添,仲放喺正話果邊!好彩師傅偉喺度,同我過去攞,仲幫我撈埋魚添,真係唔該哂佢。
一路釣到11點幾,連蝦肉都冇魚食,梗係執野鬆人,去宵夜好過喇喂。
今次用大人部相机影,色彩真係靚過我果部好多喎。
第一條斷咗,諗住實聽龜喇,點知轉釣魚仔,失驚無神反而中番條。


兩樣魚都九唔答八 。

釣夠食就算 。


2012年11月19日 星期一

耐力賽

19-11-2012  (農曆十月初六)
今日師傅偉喺街市留咗D虾,我就落去攞,攪掂就直跴主場,落到去都未夠六點,開好竿,一路都冇魚訊,剩係釣條蛇;七點幾Uncle又到,嘩!!佢今次好似至在必得咁樣,出動十呎船竿,大直攪,八號布線,唔知幾多號嘅大鉛鉈,咁大陣象原來係釣鱸,我都冇佢咁好氣,呢個時候師傅偉都黎埋,見UncleD重型架生,問我佢係米釣魚釣到儍咗,我就只有一笑。
一路釣到十點幾,三條友都係龜氣冲天,佢兩個就走先,我就繼續磨爛
,卒知磨到成點鐘轉流,先至比我中番條兩斤細鱗,過程一D都唔精彩,一路收上黎仲以為又條泥婆,就快到水面先有D反抗,撈箕上水,直入冰箱,再釣多陣都冇魚訊,跟住都係執野走人去宵夜喇。

呢條細鱗好肥美喎!

呢條細鱗冇兩斤都有斤十五。


好彩中番條細鱗啫 。



2012年11月17日 星期六

易如反掌

17-11-2012  (農曆十月初四)
噚晚釣得條爛鬼星鱸,連劃仔都冇,今晚再落去睇有冇運行至得!
六點幾落到主場,見釣友章哥喺度收緊魚準備走,嘩!!又比佢扯條花尾躉,上次係月全蝕果晚,今次係第二條喇,我都攞黎影幅相,旺一旺佢先!


呢條花尾躉足足九斤。


影完相,見D流水都好急吓,我就揾個靚位開好竿,坐定定等運到;過咗一陣,勾粒吓仁落去,枝璣竿仔好大力比魚拉到彎哂,我坐喺側邊就好快嗱起枝竿,以經冇得抽,只有頂,感到條魚線以經Hi住樁,唔夠兩秒就應聲而斷!噢~走埋X+Y,屎屎氣挷勾落餌繼續。
呢個時候師傅偉同Uncle都黎到,各人分別都揾位落釣;到九點幾,放喺離我大約廿呎枝釣鱸竿郁咗幾吓,我即刻執起撈箕,九秒九飛埋去,再執起枝竿,呢個時候條魚啱啱搶餌,枝竿一拉落去我就往上一抽,連攪六七吓,條魚想發力開尾,我就頂佢一陣,見條魚冇乜力就再攪幾吓,好順利一路收到上水面,我想話攞撈箕,原來Uncle一早揸定撈箕等我,有人幫手咁就更加輕鬆,三斤鱸魚好容易就上水,簡直就【易如反掌】。
又釣咗一陣流水都轉埋,都係轉釣吓劃仔玩吓好過,一路釣到成十一點幾,劃仔唔多,好疏口,大家都再冇進賬,跟住執埋D野,齊齊去宵夜喇。

我睇今季D花鱸有排釣 。

呢輪釣親D花鱸,都係三斤左右。



須然疏口D,不過都有番D劃仔釣吓 。

同場加影 :

16-11-2012  (農曆十月初三)

剩係釣得條爛鬼星鱸

呢D魚送比人都冇人要,但係大人話都幾好食喎 。

2012年11月14日 星期三

扯到氣都喘

14-11-2012  (農曆十月初一)
噚晚要磨到凌晨先有魚中,今晚就唔能夠釣到咁夜喇,因為聽日有D重要嘅事情做,有冇都要早走!
落到主場七點都未夠,今晚得我同師傅偉兩個喺度釣,開好竿,D流開始慢,沉底枝筏竿首先響鉸,一抽就中,兩三個回合就收到佢上黎,先黎兩斤細鱗;打咗底就定好多,再落餌唔夠一分鐘,枝筏仔又響鉸,執起枝竿條魚以經搶餌,順勢一抽,快攪七八吓,好重手,條魚開始發難,我就頂到行,一野都唔比佢,頂咗幾秒就再攪幾吓,條魚就想升水再往下衝,呢D係細鱗慣性嘅招數,唔使得喇,咁我就乘住佢上升嘅速度,攪得比佢更快,佢一衝我就頂,趁條魚一冇力我就收,拉拉扯扯三四次,收到上水面,我隻手都開始冇力喇,好彩有師傅偉幫手撈魚,上黎係三斤細鱗,落好生扣,落餌繼續。
大戰後,我就坐番低飲啖水,眼尾見釣魚仔枝小璣竿枝竿頭比魚扯咗兩吓,心諗唔通咁快有劃仔殺到,我就執起枝竿,慢慢帶起粒虾肉餌,點知一帶就感到條魚重重咁扯落去,一頂之下,成枝竿彎哂,磅頂即時發出刺耳嘅叮叮聲,我即刻追返幾手又頂,條魚一路都想衝番入樁,我就用力咁頂番佢出黎,哈~呢枝叫「赤狐姬」嘅磯竿仔又幾好力喎,人魚大戰六七個回合,我就氣都喘埋,條魚卒知比我收到上水面,吓!!原來係條三斤嘅紅鮋,唔怪之得咁好力喇;連扯三條,隻手都軟埋,好彩又係得師傅偉同我撈魚。
跟住見起行流,我地就即時轉釣劃仔,釣咗一陣,D東北風實在太勁喇,望吓個錶都成十點,見好就收,有魚留番下次釣,執埋D野,鬆人去宵夜喇。

番到屋企,大人未瞓,可以同我影相。


條細鱗同紅鮋都係三斤。

再加條細小小嘅兩斤細鱗。



都總算係豐收嘅一晚喇。

2012年11月13日 星期二

通海都係魚

13-11-2012  (農曆九月三十)
成個禮拜冇去釣魚,一執起D釣魚架生就精神,喺街市買十零廿隻蝦,飛車落主場,嗱嗱聲開好竿,但係D流水行到嘭嘭聲,都係釣吓劃仔算喇,一分心枝釣鱸竿就響鉸,仲要係咁響,我飛到埋去執起枝竿,即刻想收繩,點知條魚仲係有力,比佢一標就輕哂!X+Y#**屎屎氣挷過勾落餌繼續,跟住一路都冇動靜,百無了賴,我就只有係咁釣劃仔;條氣唔順,一於磨到佢轉流,轉流時間就喺凌晨一點,冇法喇,鬼叫自已爛咩!
我收咗枝釣劃仔果枝竿,專心去釣沉底同半水果兩枝竿,流水慢咗,開始想轉流喇,我更加留心兩枝竿嘅動態,即見沉底枝筏仔竿頭微微咁郁吓郁吓,唔通又係D坑廉攪攪震~都唔係喇,攞起枝竿準備吓揾陣D,我攞起枝竿慢慢再上提,條魚就餌更加明顯,當佢發力搶餌果吓我就抽竿,中呀!!快攪十吓八吓,條魚就想向下衝開尾,我梗係屎頂喇,一寸都唔放,頂咗幾秒,又好似輕番D囉喎!咁我就唔同佢玩喇,好快咁一路收上水面,用撈箕上水,係兩斤細鱗。
啱啱落好生扣,條魚都未放番落水,釣鱸枝竿就響鉸喇!說時遲,那時快,一執起枝竿就順勢一頂,跟住連攪好多吓,中途有些少頑抗,不過都係輕微,好快又上到水面,最後梗係撈箕上水喇,落好生扣,同埋之前條細鱗一齊放落水養住先,之後再釣多陣就執野走人,去宵夜喇喂!


又係三斤花鱸 。

先中兩斤細鱗再中三斤花鱸 。


收穫都算唔錯喎!


2012年11月6日 星期二

磨爛蓆

6-11-2012  (農曆九月廿三)
今晚一早六點幾就落到主場,諗住早D釣到就早D走,點知都要磨到十一二點,先至比我中番條細細地嘅花鱸,劃仔疏口,釣得果幾條。

要磨爛蓆先至中番條花鱸 。

細細地三斤幾。



一條都夠頂喇 。


噚晚齋釣劃仔,都係釣到好夜,食埋宵夜番到屋企都成三點。
5-11-2012  (農曆九月廿二)
比D劃仔趕走哂D大魚



2012年11月3日 星期六

話口未完

3-11-2012  (農曆九月二十)
今日約咗師傅偉落主場釣鱸,我就去買定D生蝦,睇今晚有冇鱸玩吓至得。
七點幾落到主場,開好竿就坐定定等運到,一路幾枝竿都冇動靜,八點幾師傅偉都黎到,兩條傻佬一路都冇魚中,十點幾,見我釣鱸枝竿彎吓彎吓,心諗黎料喇!!執起枝竿又唔覺係魚食餌喎,嘿~梗係墨魚或者尤魚之類喇,咁我就慢慢收線,隻野一路比我帶到水面,原來係大墨魚,我一早揸定個撈箕,一野好快咁將隻墨魚撈住,等佢噴哂D墨出黎先,然後至上水,跟手入落膠袋,直入冰箱,落餌繼續。


你隻大墨魚都惡得奈喇,仲唔屎,成日食霸王餐吖嗱。


又過咗陣,今次到沉底枝竿郁喇,我一執起枝竿以經感到有魚拉住,當佢發力搶餌,我就抽竿,中咗!!跟住連攪十幾吓,條魚有小小力咁喇,一頂一收,幾個回合就以經見魚喇,斤頭細鱗,唔好大意,都係撈箕上水揾陣D,上黎將條魚落好生扣,落餌繼續。
望過去見師傅偉喺度釣劃仔喎,都有幾條玩吓,我就都係釣番半水同沉底,釣到起埋流,一路都冇魚訊,望吓個錶都十一點幾喇,叫埋師傅偉執埋D野,齊齊去宵夜喇喂!


細鱗斤零重都唔錯喎 ,聽日攞去比二公主食。


順便比埋噚晚釣到D劃仔你地睇吓吖,好細條咋。