有幾條魚跳咗上岸

31-8-2010  (農曆七月廿二)  

呢輪我都剩係釣烏頭，晚晚都有一兩條收穫，本來冇乜好講，但係呢兩晚就有Ｄ趣事法生~~話說噚晚有位釣友戎國榮，佢用撈箕喺水面將跳出水面嘅小魚接住，唔使半個鐘，都接咗成四五斤魚，喺近水邊嘅樓梯都有十幾條，今晚我又見Ｄ魚飛出水面，不過我固住釣烏頭，所以冇用撈箕去接，後來發現樓梯都有幾條跳唔番落海度嘅小魚，咁我就執埋佢，睇有冇人知呢Ｄ係勿野魚黎嘅！

就係呢幾條喇！係咩魚呢？經Blog友釣魚仔『魚博士』証實係叫青鱗。有水上專業魚民講:尼Ｄ係叫「橫澤」。

25-8-2010

烏頭一條。

26-8-2010

釣到兩條烏頭，另有幾條小魚。

27-8-2010

得一條斤零嘅烏頭，好彩有條黃腳仔趁吓！

28-8-2010

今晚呢條烏頭大Ｄ，兩斤幾，仲釣到幾條黃腳立。

30-8-2010

剩係得一碌成三斤。

 

31-8-2010

今日打完風，又幾好喎，釣咗陣魚仔，都有幾條，跟住連中三條烏頭，最大果條都係两斤幾。

生擒烏頭大王

22-8-2010  (農曆七月十三)  大東風

踏入烏頭季節，所以呢排都係純揾老烏玩，自從比條烏頭拖咗枝竿落海，我每晚都去揾Ｄ老烏黎出氣，次次都有Ｄ收穫，今晚又落主場，睇有冇烏頭上釣先！

18:30到咗主場，見天未黑就開枝筏仔釣吓魚仔捱吓時間，不過釣上黎嘅都係Ｄ烏絲石狗小黃腳，全部即捕即解，冇條要得，釣咗大半粒鐘，就轉釣組，又開始玩老烏喇！

19:00較好枝烏頭炮，順風順水流，將個浮波掟到十幾米外，落水唔夠五分鐘，見浮波擺動咗幾吓就拉咗入水中，我一提竿就知中咗大野，此時線杯出絲嘅聲音叮叮聲，真係過引，大約兩三秒，就到我發圍喇，見條魚收咗力，我就好快咁鉸咗七八吓，佢又開尾想走，個磅頂又叮叮聲，我見頭威頭勢，都係唔好玩咁奈喇，扭番緊個磅頂同佢屎過，因為放得遠，所以一頂一收都要成分鐘先至埋到黎，跟手落撈箕上水，嘩！唔怪知得咁好力喇，足有四斤嘅烏頭喎！冰箱都唔夠放，仲要凸條尾出黎。

跟住落第二炮就等得奈喇，成個鐘先中第二條，不過冇先前果條咁大，得三斤幾，即刻就比奉場客攞走咗。此時釣友Uncle又黎到，我就玩夠喇，咁就比個有利位置佢釣囉，佢釣咗半個鐘度又中一條三斤左右老烏。望吓個錶，都成十點幾嗱，咁我就執埋Ｄ架生走先，因為今日師傅偉牛一，佢話唔殺生喎，所以得我一支公去多數釣完魚都去嘅「七姊妹道果間美美茶餐廳」宵夜喇！

今晚中嘅烏頭王四斤五。

10-8-2010

新竿新鉸，用兩條烏頭黎開齋。

11-8-2010

連起四碌，有大有細。

12-8-2010

再中烏頭一雙。

13-8-2010

成晚剩係得一條。

19-8-2010

又起番兩條老烏，再加條半斤芝蔴仔。

20-8-2010

得一條烏頭，好彩有條大粒墨補番數。

比烏頭上岸搶咗枝竿落海!!

9-8-2010  (農曆六日廿九)

噚日買咗餅新線(150米浮水線)，上好晒個鉸，今晚就落主場大開殺畀。19:15落到去，釣友榮頭又剛到，咁就一齊開好枝烏頭竿齊齊向海中發炮。

落餌唔夠十分鐘，已經見我個浮泡比魚拉咗一吓，根住就見榮頭個浮泡沉咗落去，比佢中魚先添，點知睇住佢收到一半，輕晒!!條魚爆咀走咗！此時我個浮泡又比魚拉咗入水，條魚有Ｄ力水，我就不慌不忙，一路玩一路收，好快就拖到埋黎，諗住攞撈箕，點知條魚用力一個轉身，就將我粒浮波打甩，我見個浮波順水流漂出，又見條烏頭都係兩斤幾啫，咁就快手快腳將佢一野掟上橋面，放低埋枝竿，嗱嗱聲用撈箕去撈番個浮波，此時特然聽到榮頭大叫『條魚呀』！我就回頭一望，噢~~已經見我枝竿比條烏頭彈吓彈吓咁就扯埋落海喇！而浮波又漂埋出海，勿都冇晒！

可能正話我太過心急，將條魚掟上黎果吓大力過頭，又冇留意條魚上咗黎嘅位置，就即到走去撈浮波，咁條魚就彈吓彈吓，由橋嘅另一邊彈番落海，咁就連埋枝竿都扯埋落去囉！跟住冇哂架生，為有做(大眼仔)睇榮頭繼續釣囉，睇佢釣咗兩條，我就執埋Ｄ野走先。

十點唔夠番到屋企，大人話:「勿咁早番嘅？係米釣咗好多魚呀」！我就將剛才嘅情况話佢知，點知佢冇安慰吓我，仲話:「冇人釣魚學你咁，比條魚上岸搶埋枝竿走嘅，想換新野咋掛」！~~真係比佢啤..........一聲!!

好!!聽日一於置番Ｄ新架生，再去同Ｄ烏頭屎過~~

31-7-2010嘅釣穫。

8-8-2010嘅釣穫。