有番幾條魚仔釣吓

26-7-2013  (農曆六月十九) 
冇釣幾日魚，今日釣引發作，喺雪柜摷盒千年蝦仁，落主場踎陣，好彩都有幾條魚仔釣吓，慚時止吓咳先。

先中細鱗仔再中叮叮。

22-7-2013  (農曆六月十五)

有幾條趾旗立仔玩吓。

有驚喜

4-7-2013  (農曆五月廿七）
今日見冇乜野做，早少少落到主場，開好竿，都係釣金古，釣到九點幾，一路都係比泥鯭同梳籮化餌，諗住再冇就十點走人；換過口餌，想話飲啖水，見枝竿頭比魚拉咗兩吓，第三吓就拉到竿頭彎哂，我一手執起枝竿，順勢往上一抽，中咗！大野添喎～跟手攪咗兩三吓，條魚就發力鐘頭喇，磅頂即時發出閱耳嘅叮叮聲，頂咗幾秒，即刻追番幾手，條友仔又發力，嗯!! 唔似金古喎，更加唔似烏頭，一定係牛屎！又頂咗四五秒，因為鈎細線幼，所以唔敢同佢硬拚，就得就就，最緊要係唔比佢埋樁，收吓放吓四五轉，最後都比我收到上水面喇，只見銀光一閃，嘩 !! 唔怪之得咁好力喇，真係大黑牛，睇落起碼有三斤，速落撈箕，上咗黎解鈎即入冰箱；夠皮喇！見好就收，執埋Ｄ架生番屋企至食宵夜囉。

好奈冇中過牛屎喇，仲要咁大條添，專登大大聲嘈醒大人，等佢同我影相。

麵包中大黑牛零舍開心，又有得向大人耀武揚威 ～

肥美嘅三斤牛屎立。

劏好魚，即刻整番個宵夜食吓先 。

墨丸、魚腐、雞干、煎旦麵 ，係米好正呢！

安慰獎

2-7-2013  (農曆五月廿五)
好奈冇去釣魚，Ｄ架生都封哂塵，今日見冇乜野做，六點零鐘落主場踎吓先。
落到去開好竿，一路都係泥鯭化餌，到天開始黑就連泥鯭都走埋，成個鐘毫無魚訊，當悶到發慌嘅時候，竿頭就傳來金古食餌嘅動作，一抽竿就中咗，感覺唔係大野，慢慢收佢上黎，撈箕都費事落，成條飛佢上黎，解鈎落埋生籠，跟手落餌繼續。
一路釣咗成兩個幾鐘，竿頭郁都未郁過，唔係喇，都係執野走人，早Ｄ去宵夜好過喇！

端午節過後第一次開齋 。

半斤十両都好過冇 。

小金古半斤十両夠我自己食。