目標魚～細鱗

26-10-2013  (農曆九月廿二)

今日乖孫洋洋番咗佢屋企，咁我就有時間做番自己野喇；喺雪柜摷番盒千年蝦仁，擸埋架生，18:30飛車落到主場，見冇乜流水，慢慢開好兩枝竿，一長一短。
一路釣咗個幾兩個鐘，都係釣得幾條即捕即介嘅魚毛，正想話執野轉過靚位，眼尾見枝小磯竿比魚重重咁拉咗一野，我就即刻飛撲埋去執起枝竿，呢頭攞起枝竿，果頭條魚以經將枝竿拉到成＂7＂字，好強嘅拉力，想收一吓繩都唔得，咁為有頂一陣先咧，魚線喺線杯度係咁出，磅頂就發出悅耳嘅叮叮聲，幾秒過後，條魚開始慢落黎，我就把握住呢個机會，連追十吓八吓，條魚又發力，不過冇之前咁猛，頂吓收吓，幾個回合就將條魚收到上水面，見條魚起碼都有兩斤幾，安全Ｄ用撈箕上水，解鈎落生籠，跟住落餌繼續；此時流水急咗Ｄ，再釣多個鐘都係冇料到，望吓個錶都十點幾喇，都係執野走人，去宵夜好過喇！

釣成晚都係得一條。                                

好彩條細鱗都有番Ｄ斤両。

細鱗兩斤幾 。

中目標魚

14-10-2013  (農曆九月初十)

今日係公眾假期，出街人多，諗住喺屋企休息吓，點知坐到五點幾，Ｄ釣魚引又發作，頂唔順又執起架生，喺雪柜攞盒千年虾仁，速速飛車落主場。

一到主場見仲有少少流水，嗱嗱聲開竿，一枝長一枝短，两枝都係釣沉底；冇幾奈枝長竿有魚拉咗幾吓，一抽即中，只有輕微嘅反抗，收到上黎係條磅頭芝蔴，成條飛佢上黎，解鈎落生籠，落餌繼續，跟住水向東流(落流)，一路釣咗三個鐘，只有小魚同蟹喺度化餌；直到Ｄ流水開始又慢番，即刻換過靚位，先落枝笩仔沉底，當我喺度攪緊枝長竿果陣，眼尾見枝笩仔竿頭比魚輕微拉咗幾吓，我即刻執起枝笩仔，說時遲，那時快，條魚以經食咗餌想走佬喇，我睇準順勢一抽，中呀!!好強嘅拉力，頂佢一陣先，跟手快攪八九吓，條魚又發力往下衝，我再頂，心知呢條一定係細鱗，所以一呎都唔可以鬆，比佢開到尾就盞瞓唔著；頂咗幾秒，再收七八吓，經幾個回合就收到上水面喇，冇詁錯，果然係條兩斤幾嘅細鱗，即落撈箕上水，解鈎直入冰箱，目標以達，跟住執野走人，去宵夜喇！

中到目標魚細鱗零舍開心

先中芝蔴班再中細鱗。

細鱗兩斤芝蔴班磅頭。

又比番Ｄ驚喜

12-10-2013  (農曆九月初八)  

呢幾日乖孫洋洋冇黎我度，賴得閒，落街市執廿蚊蝦去主場踎吓先。
落到主場，見退潮落流Ｄ水退盡都係有1.6米，釣金古就唔駛預，為有喺橋面釣吓烏頭，再開多枝竿生蝦釣半水；頂住大東北風，吹到眼都機乎睜唔開，好彩又比我中番兩條一大一小嘅烏頭；Ｄ風好似有心整蠱咁，越吹越猛，啱啱呢個時候轉咗流，嗱嗱聲執野，般去背風位，收起枝烏頭竿，一枝笩仔齋釣半水！
又過咗粒幾鐘，見竿頭彈咗幾吓，梗係隻蝦比魚嚇到彈起，我就即時執起枝竿，條魚就撲埋黎擔住隻蝦，拉咗幾吓，我就梗係禁住個鉸唔比佢出線喇，點知條魚精過鬼，一頂口就放，收番上黎隻蝦比佢咬到扁哂，Ｄ蝦又冇養住，冇生蝦添，有計～鈎隻屎蝦落去，到底拉番上六七呎，久唔久郁吓佢辨生蝦，呢招果然有較，條魚又埋黎咬咗幾吓，呢次我放小小線比佢，條魚卒之忍唔住就搶餌，哈哈!!心諗仲唔中招，我跟手一抽，結結實實咁中咗，條魚知賴野，想搏命想開尾衝，我就頂佢一陣先，睇佢有乜反應，車～冇料到，見佢開始冇力，即刻快攪十野八野，條魚又想鏢入樁，邊有咁容易吖，比我帶番佢出黎，一路順住一帶一收，好快收到上水面，一睇原來係紅鮋，唔怪之得有番咁上吓力水喇，跟住撈箕上水，直入冰箱；再釣多一陣又夠鐘走人去宵夜囉喂！

紅鮋～好奈未中過。












聽日餐飯有著落喇！

紅鮋X1

烏頭X2

噚晚都有釣魚架，不過Ｄ魚就細咗Ｄ，今次順便比埋大家睇吓吖。

11-10-2013  (農曆九月初七)