釣哂喇！

25-7-2014  (農曆六月廿九)
今日冇特別事情，梗係又去主場踎吓喇，呢兩晚都爆釣金古，今晚就要釣埋走漏果Ｄ。
18:00去到主場，開好竿等運到，一等就要到19:30先至中第一條金古，好疏口，釣到22:00都係得三條細眉細眼，跟住仲冇哂魚訊添，呢水Ｄ金古卒之比我釣哂喇，跟手執埋Ｄ架生，早Ｄ番屋企好過！

今晚釣埋呢三條，呢水金古比我釣哂喇！

乘勝追擊

24-7-2014  (農曆六月廿八)
見噚晚釣金古釣得咁過引，今晚一於再到主場做佢世界，霖出門口，大人話噚晚Ｄ魚都比你釣哂喇，今晚如果冇就早Ｄ番，煲定湯等你番黎飲；我都未聽完佢講就急急腳攞埋架生鼠出門口喇！
落商場買半磅麵包，飛車落到主場，開好竿一落餌就就有魚接餌，食到扯竿添，一抽就中，收上黎原來係條雞泡，麻鬼煩，仲比佢咬断條子線添，屎屎氣挷過鈎落餌繼續，好彩跟住黎嘅係金古魚訊，連起兩條，呢個時候，老友；「鴻哥」聞風而至，齊齊玩金古，一路有講有笑，其間大家都有魚中，一路釣到十二點先肯執野走，仲一齊去宵夜添。

乘勝追擊，又中磅頭金古。

 有魚要盡釣。

一網成擒

23-7-2014  (農曆六月廿七)
一排冇去釣魚，今日釣引發作，即刻執齊架生，落主場踎吓至得。
18:00落到去，一落餌就有魚接，一路到23:00，魚訊未停過，喺呢幾個鐘，一共釣咗十幾條金古，其中有兩條斤頭，五六條磅頭，幾條半斤十両，過足引就執野鬆人番屋企喇。

今晚爆釣金古，仲有兩條斤頭添。

 金古斤頭磅頭一大堆，求其當五斤。

世事無絕對

8-7-2014  (農曆六月十二)
真係講都冇人信；今日18:00到主塲，都係諗住用麵包呔吓金古，釣咗粒幾鐘，都係冇金古魚訊，剩係比Ｄ泥鯭化餌，鈎麵包都鈎到手軟，冇辦法架，都要繼續落餌，當我好冇引咁由個鉸道一路鬆線度水深，鬆鬆吓線特然比魚拉到係咁出線，我下意適即刻落番個制，即時感到好強嘅拉力，好彩磅頂夠鬆，仲發出刺耳嘅叮叮聲，頂咗幾秒，見條魚慢落黎就即刻追番五六吓，心諗呢條唔會係金古，因為金古食餌係好斯文好輕力嘅，好似咁樣一野搶埋黎嘅就一定係烏頭，因為隻鈎細，釣金古隻鈎同釣泥鯭鈎差唔多大，所以我都唔敢太用力，就咗幾吓，又收幾吓，足足玩咗分半鐘先至上到水面，見魚喇，須然位置冇燈照住，不過喺微弱嘅光線底下，都見到長長身銀白色，仲唔係烏頭，拉埋Ｄ睇清楚，嘩!!真係詁都詁唔到，呢條食麵包嘅魚原來係條兩斤花鱸，唔講咁多，即落撈箕上水，落埋生籠，再落餌繼續；一路磨到九點幾，又係前幾晚一樣，魚訊全無，唔磨喇！執野走人去宵夜好過咧。

用麵包釣到牛屎、石蚌、黃立倉都試過，釣到要食活餌嘅花鱸真係第一次咋，真係世事無絕對。

 呢條花鱸都有兩斤。

7-7-2014  (農曆六月十一)
剩得兩條幾両嘅小金古。

攞條磅頭

4-7-2014  (農曆六月初八)
呢幾次釣魚，次次都係得一條，今晚都唔例外，一早中魚，到尾都係得果條，好彩係大ＤＤ，超過磅頭金古，十點就走人，買埋宵夜番屋企睇波好過！

都幾好中番條磅頭。

都有十三四両仲未過斤。

 3-7-2014  (農曆六月初七)
呢條得十両咋！

每晚一條

1-7-2014  (農曆六月初五)
見今晚冇乜世藝，又到主場吹吓海風，六點落到去，開好竿坐定定等運到，收線、換餌、落釣層，來來去去都係做同一動作，足足做咗個幾鐘，卒之中番條半斤十両嘅金古，之後就係享受過程，到九點半，Ｄ流行到澎澎聲，見都冇哂魚訊，執野走人番屋企喇！

又係得一條半斤十両金古。

 一條之後就享受過程。