釣足一轉流

14-10-2014  (農曆九月廿一)
見天氣咁好，喺雪柜摷番盒千年虾仁，今晚又再去泊邊玩吓，睇有冇運行至得！
18:15落到去，泊好架車就嗱嗱聲開竿，流水剛起，照平時咁，一枝筏仔釣脚邊，一枝小磯掟出Ｄ釣魚仔；一路釣到成十點幾，由起流釣到開始轉落流，脚邊枝筏仔郁都未郁過，而小磯竿都有Ｄ魚仔扯吓，成晚好彩有位新釣友「輝哥」喺度同我吹水，傾傾下特然聽到枝筏仔響鉸，即刻執起枝竿，先慢慢收番多少線，再輕輕一帶條魚就發力搶餌，順勢一抽，中咗！釣場水淺，連攪七八吓以經見魚，條魚見光就發茅，再發力向下衝，我冇放綫，只係就一就佢再攪幾吓，條魚好乖咁上到水面，嘩！斤幾龍虎斑，都唔知幾奈未釣過喇，個心即刻諗點食佢好呢，哈哈～都係撈箕上水先喇，又引來幾位觀衆圍觀，食到入哂扣，唯有剪綫即入冰箱，挷過鈎落餌繼續。
卒之釣到十二點，都係一條到尾，執好Ｄ架生，再同輝哥講拜拜去宵夜喇！

又比我喺泊邊中番條龍虎斑！

 龍虎斑做晚餐。

原來泊邊都有魚

9-10-2014 (農曆九月十六)
冇釣個幾禮拜魚，手都痕埋，唔理三七廿一，踎泊邊都要釣番轉！
18:30到咗釣點，第一次喺度釣，又幾好喎！可以泊車，唔記得攞野都可以行番埋去攞；諗住今日都係吹吓海風喂吓魚仔，慢慢開好竿，一枝筏仔釣脚邊，一枝小磯掟出Ｄ釣魚仔，釣咗成兩個鐘都係釣得幾條黃腳仔，唔夠斤両，懶係辦哂野，隨釣隨放，而坑簾就冇咁好彩喇，解鈎驚比佢吉到，所以先將佢就地正法先至解鈎；流水慢咗，仲好似想轉流咁，持然間腳邊枝筏仔響哂鉸，比條魚起碼拖咗七八呎，我就即刻執起枝竿，一抽就連攪幾吓，條魚發力衝，我攪唔郁就為有頂陣先喇，見佢一軟我就再收，因為近岸邊，得果十呎八呎水，收多幾吓就到水面，原來係條兩斤紅鮋，開頭仲以為係細鱗添，跟住撈箕上水，解鈎即落冰箱，換餌繼續。
釣多大半個鐘，都剩係立仔同坑簾喺度攪攪震，望吓個錶又到十點，都係時候執野走人喇！

踎泊邊都中番條紅鮋。

 中到兩斤紅鮋，又可以向大人耀武揚威喇！

 兩斤紅鮋又有飯開囉。