乖孫番咗屋企咁就有時間去釣吓魚喇，喺雪拒攞盒千年虾仁就去主場踎吓；18;00落到去Ｄ流水開始轉落，今次開兩枝竿，一枝筏仔沉底釣腳邊，一枝小磯掟出去釣魚仔；一路釣到八點幾，兩枝竿郁都冇郁過，收番上黎換過新餌，今次枝磯竿仔有魚食餌喇，我即刻攞起枝竿，輕輕拉咗幾吋，條魚一搶餌我就抽竿，開頭以為係劃仔，收咗兩三吓，嘩！好大嘅反抗力呀，成枝竿比佢扯到彎哂，磅頂即時發出刺耳但興奮嘅叮叮聲，等佢一慢落黎就頂番起再追番七八手，條魚再冲我又頂一陣，經三四個回合就見魚喇，上到水面即時反肚，睇落都有兩三斤，跟住撈箕上水，解鈎落生扣，換餌繼續。
釣到十點零鐘就再冇魚訊，都係執埋Ｄ架生，清理好釣場，早Ｄ去宵夜好過喇！
十二月Ｄ細鱗仲未走。
中番條大野有得交差。
細鱗三斤又有飯開喇
