29-4-2011 (農曆三月廿七) 清勁東風 微雨
喺屋企望出窗外，烏天黑地，諗住今日都係唔去釣魚架喇，點知釣引發作，典床典蓆，唔理三七廿一喇，嗱起架生，落街市執廿蚊虾，就直跴主場。
18:00落到去，都係有幾滴雨水，風都幾大吓，嗱嗱聲開竿，今次只係開兩枝竿，一枝沉底搏大霧，一枝就梗係十零呎半水釣鱸喇。
一路Ｄ雨都冇停過，好彩唔係好大啫，係唔會濕身果隻。19:05一個人坐喺度發吽豆，特然身邊枝竿〝咧〞一聲響鉸喎，有料到，一手執起枝竿，條魚以經發力，我用勁一揪，快速攪咗四五吓，條友仔知賴野喇，舂頭又再衝，嗯!!咁好力水，大野喎~我更加小心，咁就比幾呎佢走吓喇，見佢慢咗落黎，我就用力揪佢向左，快收幾野，再揪向右，又收幾野，已經見到魚影喇，點知條魚一見光就發癲，搏命開尾向下衝，我又比番多少佢走吓，呢次唔同佢癲喇，一帶順佢就直收佢上水面，等佢飲幾啖水先，跟住落撈箕上水，快手解魚再落好生扣，一腳踢自已攪惦晒，跟住鈎過隻虾落去，睇有冇同党。
又到咗20:00，呢個時候，師傅偉先至黎到，佢又係冇心黎釣魚嘅，只不過聽到我黎咗，佢就落黎趁吓熱鬧嘖。大家釣多個零兩個鐘，全無魚訊，覺得都係早Ｄ鬆人，去宵夜好過喇！
番到屋企，嘈醒咗大人，佢就同我影番幅相，跟住再去瞓過！
須然條魚得果廿五六吋，不過好肥美，過磅係八磅即係六斤囉，跟手就劏埋條魚，斬件入冰格，聽朝用一舊切片〝綠〞粥。
同場加影....呢條大眼海鰱係前幾日26-4-2011釣嘅，最後用咗黎煲番茄豆腐湯。
