續條釣

5-3-2013  (農曆正月廿四)
今日六點就落到主場，同Ｄ老友傾咗陣就捐入橋底開竿，先開枝竿釣鱸，落餌放低想話開埋枝沉底，望一望枝竿以經比魚扯住出緊繩，仲係打橫走，直向樁柱間冲過去，我就即刻放低Ｄ野，執起枝竿就抽，攪咗五六吓，條魚掉頭走番出黎，想向另一邊樁柱標入去，咁我唯有頂佢一陣，跟手再收，呢次就好順咁收到上水面，見條魚雖然唔係好大，頭威頭勢，不容有失，即落撈箕上水，上埋生扣，落餌繼續，心諗咁早中魚，會唔會多幾條釣吓呢！跟手開埋先前開咗一半果枝釣沉底嘅竿。
過咗一陣，師傅偉又黎到，佢就喺橋面釣，又係縮喺架車入面做睡夢羅漢；一路釣到轉埋流，幾枝竿郁都未郁過，沉底果枝剩係喺度喂蟹，原來成個海得一條魚，唔使龜算好彩，都係時候叫醒師傅偉走人好過喇！

一早中魚，以為會釣多幾條掛，點知都係一條到尾。

呢條花鱸好肥美，有兩斤。