重量唔重質。

收拾好旅行嘅心情，重歸釣魚行動，分別釣咗兩晚，都係得Ｄ魚仔，好彩都有多幾條釣吓嘖！

22-5-2014(農曆四月廿四)
重量唔重質。

 24-5-2014(農曆四月廿六)
好彩有幾條紅衫仔釣吓。

一次出幾日

8-5-2014(農曆四月初十)
出發去釣魚果時以經落緊毛毛雨，不過主塲有瓦遮頭，唔怕落雨嘅！
18:15落到去，仲係行緊落流，開好竿落餌喂泥鯭；喂咗四五口餌就有金古魚訊，食得非常精口，食咗分幾鐘先至扯竿，一抽即中，上黎係條五六両嘅金古，即落餌繼續都有魚訊，呢個時候特然風雷雨電一齊黎，成個海反哂，即刻乜野訊都冇哂，想走又唔走得，一出去就實濕身，卒之等到十一點幾先至停雨，嗱嗱聲執埋Ｄ架生，去買宵夜番屋企食喇！

七點中條魚仔，跟住大雷暴，想走又唔走得，卒之等到十一點幾先停雨。

6-5-2014  (農曆四月初八)
今次中番條大Ｄ喇。

大果條金古都有十両。

5-5-2014  (農曆四月初七)
釣得兩條。

仲未有大金古埋

3-5-2014  (農曆四月初五)
噚晚釣金古釣得到喉唔到肺，今晚一於執多劑；喺雪柜摷番噚晚釣剩果兩塊面包，18:00落到主場，開好竿坐定定等運到；噚晚一落餌就有魚接，今晚落餌就静英英，再係咁落去真係要享受過程喇！19:00一於轉位～呢個决定果然有效，即刻有番魚訊；一路釣到22:00，有八條釣到，有三條唔夠秤回歸大海，實得五條，過程沉悶，22:30執野走人番屋企。

大人話釣Ｄ大條Ｄ吖嘛！真係比佢笑屎～

仲未有大金古埋，釣住先喇！

金古季節現在開始

2-5-2014   (農曆四月初四)
今日吹大東風，Ｄ鱸唔方會開口，都係買幾塊面包，落主場睇有冇金古釣好過。
18:30落到去，流水都幾急吓，好快開好竿，一落餌就有魚接，上黎當然係臭肚喇；過咗十幾分鐘，Ｄ泥鯭收咗口，輪到Ｄ金古魚訊開始出現，食得好精口，竿頭只係好輕微嘅郁動，特然竿頭彈起，我就順勢一抽，中咗！須然條魚急速打轉，不過都收得好輕鬆，因為條金古唔大吖嘛！成條掟佢上黎，解鈎落生籠，換餌繼續。
到咗20:30，其間再中多五條，都唔係大，有三條太細，即捕即界，跟住仲停流停口，再冇魚訊，都係時候執野走人去宵夜喇！

金古季節又開始喇。

三條金古加埋都有斤幾。

水暖花鱸好好力

1-5-2014  (農曆四月初三)
釣咗幾次石狗，今次要玩番鱸喇；落街市執十零隻蝦就直跴主場。
18:10落到去Ｄ流以經行到澎澎聲，唔理咁多，照開兩枝竿釣鱸，一枝沉底有乜釣乜；到20:30其中一枝釣鱸竿響鉸啦，一執起枝竿，條鱸以經發力，頂咗兩秒就鬆手比幾呎佢走吓，再頂番起想話收繩，條友仔又發力，冇計喇！唔想炸竿就要再鬆多幾手比佢，當佢一慢落黎，我就把握呢個机會，今次唔頂喇，一拖順就快攪七八吓，呢招果然有效，再拖再攪，詁唔到尾段咁順灘喎，收到上水面，條鱸仲飛出水面想洗鰓，我即刻將條魚線拉行，化解咗佢洗鰓之後，埋到腳邊就抽高個魚頭，等佢飲幾啖水先，即掟個撈箕落去，條鱸乖乖上水，人魚大戰結束，睇落都有四斤，即落生扣，換餌繼續。
22:30幾枝竿再冇魚訊，係時候執野走人去宵夜喇！

釣番鱸魚先至過引。

水暖番四斤花鱸都好好力。

季尾鱸大條Ｄ。