水暖花鱸好好力

1-5-2014  (農曆四月初三)
釣咗幾次石狗，今次要玩番鱸喇；落街市執十零隻蝦就直跴主場。
18:10落到去Ｄ流以經行到澎澎聲，唔理咁多，照開兩枝竿釣鱸，一枝沉底有乜釣乜；到20:30其中一枝釣鱸竿響鉸啦，一執起枝竿，條鱸以經發力，頂咗兩秒就鬆手比幾呎佢走吓，再頂番起想話收繩，條友仔又發力，冇計喇！唔想炸竿就要再鬆多幾手比佢，當佢一慢落黎，我就把握呢個机會，今次唔頂喇，一拖順就快攪七八吓，呢招果然有效，再拖再攪，詁唔到尾段咁順灘喎，收到上水面，條鱸仲飛出水面想洗鰓，我即刻將條魚線拉行，化解咗佢洗鰓之後，埋到腳邊就抽高個魚頭，等佢飲幾啖水先，即掟個撈箕落去，條鱸乖乖上水，人魚大戰結束，睇落都有四斤，即落生扣，換餌繼續。
22:30幾枝竿再冇魚訊，係時候執野走人去宵夜喇！

釣番鱸魚先至過引。

水暖番四斤花鱸都好好力。

季尾鱸大條Ｄ。