大黑立回歸

19-4-2011  (農曆三月十七)  大東風

今晚約咗師傅偉落主場，諗住都係揾Ｄ花鱸

玩吓，喺19:00我先到，呢次我開兩枝竿釣

鱸，一枝沉底〝搏符碌〞，啱啱落哂餌，師

傅偉就到，佢就娟咗入橋底搏殺，水流都仲

係好急吓，冇幾奈就比佢起條五斤幾嘅花

鱸，即刻比捧場客打劫。嗯!!慢咗流Ｄ鱸開口

囉喎，咁我就更加小心咁釣，過咗幾分鐘

度，今次就輪到我中條大小小嘅花鱸喇！

釣到21:50，我冇乜留意果枝沉底特然響咗

一吓鉸，師傅偉驚我聽唔到好大聲叫:響鉸

喇!!我梗係知喇，咁就一個箭步飛埋去，執起

之竿，跟住條友仔已經發力想走，師傅教落

頭三手要狠，所以我順勢一抽，跟住連攪七

八吓，條魚己經帶離底石，不過仲有附近樁

柱，我不敢怠慢，使出〝左右野馬分鬃〞，

另到條魚迷失方向，跟住一招〝力拔山

河〞，再連攪十幾吓，心知條魚已經帶順，

最後使出絕招〝無敵風火輪〞，幾吓就快速

將條魚升水，師傅偉同我撈魚，上咗黎係條

大牛屎立，好開心，又中對像魚。見好就

收，跟住我地即刻執架生走人，有魚留番下

次釣，去宵夜喇喂！

釣到對像魚(牛屎立)，個人特別醒神Ｄ嘅！

都好險喎，緊緊鈎到咀唇咋，好彩冇爆咀。

你地睇條毛巾就知有幾大風喇。

呢條牛屎都算靚仔喇掛。

番到屋企，叫大人同我影番幾幅人魚合照。

督牛屎幾大餅。

向大人耀武揚威。

花鱸六斤70Cm

牛屎立三斤四44Cm

好彩仲有一條半條玩吓

近呢一年，主場釣况越下，魚種越黎越少，

好在仲有一兩條花鱸玩吓，咁先至仲有番Ｄ

興趣繼續。

以下係近期釣到嘅粗野，攞番出黎比大家分

享吓，千昕唔好見笑呀！

26-3-2011  (農曆二月廿二) 

 條花鱸得三斤零重好過冇！

27-3-2011  (農曆二月廿三) 

呢條花鱸就大Ｄ喇，有五斤幾重。

5-4-2011  (農曆三月初三) 

係我今年暫時釣嘅鱸魚記錄，

八斤半76cm(三十吋)。

話說果晚「師傅偉」中咗條唔夠一斤嘅花鱸

仔，喺22:15就走人，我條氣唔順，就留低繼

續喺度磨爛蓆，卒之磨到23:00比我中番條

大花鱸，果晚好彩有兩個奉場客喺度，因為佢

地同我撈魚時，條魚撞穿咗個撈箕，上到一半

水時再跌番落海，另一個人即刻到我車尾箱，

開埋枝士啤撈箕，合兩個撈箕之力，先至將條

衰鱸收到上橋面。

上咗黎，梗係同我影番幅合照先喇！

呢條鱸好肥大，抽到我手都軟埋。

條魚係主角，影到我黑Ｄ都冇所謂。

番到屋企，嘈醒咗大人，咁就同我整張廚房

相。

呢條花鱸過磅八斤半，長76cm(30吋) 係我今

年鱸魚嘅暫時記錄！

我嘅主場番黎喇!!

24-3-2011  (農曆二月二十)  和暖

去完新西蘭番黎十幾日，天氣一路都係嘛嘛

地，今日天氣回暖，釣魚蟲又咬喇，執起架

生，落街市買廿蚊蝦，就飛車落主場搏吓。

18:00落到主場，開好竿就閃落橋底，一枝

竿半水釣鱸，一枝打沉底。落餌冇幾奈，沉

底枝竿有魚訊喇，我即刻執起枝竿，收番緊

Ｄ繩，條魚食咗幾吓就拉竿喇，好強嘅力，

知條魚唔係細，一抽竿就連攪五六吓，再一

頂又攪咗七八吓，條魚發力想標埋樁，我就

順勢抽起向反方向帶番佢出黎，吸口氣就將

條魚一路上水，嘩!!大牛屎喎，梗係用撈箕上

水喇，好奈未中過牛屎，梗係影番張相喇！

一路釣到19:15，師傅偉又黎咗，佢就喺橋

面釣鱸，一落餌就中條兩斤花鱸，我就梗係

唔執輸，嗱嗱聲執架生上番橋面釣，當我落

好餌，師傅偉又中多條兩斤幾花鱸，捧場客

即刻攞咗兩條魚走，呢個時侯，我枝鱸竿特

然彎哂，我一執起枝竿就發力一抽，中呀!連

攪幾吓，條鱸想開尾埋樁，我就一就佢再用

力抽番佢出黎，博命收繩，佢又再標，如是

者兩三個回合卒之比我將佢拉 上水面，條鱸

有四斤幾喎！捧場客同我撈魚，我就落餌繼

續。之後師傅偉又中兩斤幾，而我就再起多

條四斤嘅花鱸！望吓個錶，又成十一點喇，

開心時間過得特別快，咁就執埋Ｄ架生，打

道回府。

捧場客同我影張魚穫照先。

快Ｄ喇，就黎冇力喇！

放低喺地下影好過喇！

冇幾河早番到屋企，大人未瞓，就同我影番

幾幅相。

好奈未兩隻手都有魚揸囉!!

天氣一回暖，就即刻有魚中。

花鱸×2各四斤，牛屎×1兩斤