磨足成晚

12-5-2013  (農曆四月初三)
今日星期日，諗住早Ｄ落主場釣幾條魚，點知要磨到成十點先中番條磅頭金古，只有頭段有幾咀烏頭魚訊，抽佢唔到，之後就悶到發慌，釣到十一點就鬆人。

今晚机乎龜，好彩釣到呢條金古嘖！

磅頭金古夠自己食。

行雷閃電釣烏頭

8-5-2013  (農曆三月廿九)
今日有Ｄ野做，所以晏咗落去釣魚，去到都七點幾鐘，天都黑齊，見Ｄ水仲未濕腳，嗱嗱聲開竿捐入橋底，原來師傅偉以經喺度釣緊，仲已經釣咗條大老烏；我一放餌落去就有魚接，食到竿頭彈起，我一抽～唔中，再落餌、又食，呢次等佢食深Ｄ先，當佢大大力咁食嘅時候就抽竿，呢次中喇，力水都好猛，又係烏頭啦；經三四個回合先收到上水面，師傅偉同我撈魚，上黎即入冰箱。
我地再釣多陣，天氣特然轉壞，行雷閃電，仲落埋雨添，Ｄ海水又湧到上哂泊，好彩冇大船經過，唔係就一定濕腳，既然已釣到魚，都係趁Ｄ雨細番少少，執埋架生走人去宵夜好過喇。

又攞埋師傅偉條烏頭，砌夠一雙 。

海烏夠哂肥美 。

鳥頭先頭步隊黎到喇

7-5-2013  (農曆三月廿八)
今日食過番尋味，約埋師傅偉，晏晝四點幾就出發釣魚，原來早去係冇用既，都係要等到六點幾先中魚，首先我中條斤頭既小烏，跟住就輪到師傅偉中條大烏，咁梗係由我做魚僮幫手撈魚喇；釣到九點見再冇魚訊，就鬆人去宵夜好過。

呢條兩斤幾既大海烏，就係釣魚唔食魚既師傅偉釣架喇，益埋我攞番屋企。

我釣果條就細得多，只有斤頭咋。

準備劏魚。

今季第一次中金古

6-5-2013  (農曆三月廿七)
前幾日去完旅行番黎，聽師傅偉話開始有金古釣，仲要斤幾兩斤一條咁話，講到我心都痕埋，即刻連遊記都唔寫，落主場連釣兩晚，結果連龜兩獲，今日又唔份氣，再去睇有冇運行，卒之比我釣番兩條磅頭金古，仲有條烏頭獎勵吓添。

須然冇斤幾兩斤，不過都係好既開始。

半個鐘頭既魚獲，跟住就收哂口。

花鱸番黎喇

3-4-2013 (農曆二月廿三)
前排個電腦壞鬼咗，攪到勿野都做唔到，谷鬼氣換過部新機，可能人老學野慢，用左兩日先至話叫做上到手。

睇佢又用得幾奈先！

講番正題先！今日早少少落到主場，仲係落緊流，開好竿，坐定定等運到，試咗幾個位就比我起條三斤花鱸，第二口餌一落就有魚擔住，慢慢打橫走，我輕輕拉緊Ｄ，條魚就想搶餌，我即刻鬆番少少比佢，等佢食深Ｄ，感到有Ｄ拉力就抽竿，中咗！呢條大Ｄ，有三四斤；跟住師傅偉又黎到，佢就係橋面釣，又中一條三斤唔夠既花鱸，好奈未試過有三條魚中下喇；我地釣到十點幾就執野鬆人去宵夜囉！

好奈未試過有三條魚中下 。

又向大人耀武揚威 。

凖備湯魚。

續條釣

5-3-2013  (農曆正月廿四)
今日六點就落到主場，同Ｄ老友傾咗陣就捐入橋底開竿，先開枝竿釣鱸，落餌放低想話開埋枝沉底，望一望枝竿以經比魚扯住出緊繩，仲係打橫走，直向樁柱間冲過去，我就即刻放低Ｄ野，執起枝竿就抽，攪咗五六吓，條魚掉頭走番出黎，想向另一邊樁柱標入去，咁我唯有頂佢一陣，跟手再收，呢次就好順咁收到上水面，見條魚雖然唔係好大，頭威頭勢，不容有失，即落撈箕上水，上埋生扣，落餌繼續，心諗咁早中魚，會唔會多幾條釣吓呢！跟手開埋先前開咗一半果枝釣沉底嘅竿。
過咗一陣，師傅偉又黎到，佢就喺橋面釣，又係縮喺架車入面做睡夢羅漢；一路釣到轉埋流，幾枝竿郁都未郁過，沉底果枝剩係喺度喂蟹，原來成個海得一條魚，唔使龜算好彩，都係時候叫醒師傅偉走人好過喇！

一早中魚，以為會釣多幾條掛，點知都係一條到尾。

呢條花鱸好肥美，有兩斤。

又要比隻手指尾

4-3-2013  (農曆正月廿三)
貓貓好番，心情靚靚，拎起架生，釣魚去也！
落到主場仲係落緊流，捐入橋底釣吓先；釣到轉埋流一咀都未咬過，上番橋面，第一口餌就有魚食喇，點知條衰魚打橫走，埋咗樁，斷繩收場，第二口餌落去唔夠一分鐘，枝竿頭拉咗兩吓，即刻冇哂動靜，收上黎冇咗隻蝦，勾過隻蝦落去，呢次等咗成個鐘先至有魚拉竿，一拉就又比佢偷咗隻蝦，呢Ｄ所為肯定係鱸仔喇，再落餌，呢次我唔放低枝竿，條魚果然好快又黎想偷餌食，先拉咗兩吓，我就抽起少少枝竿，當佢大力拉果吓，我唔抽竿，反而鬆比佢，停咗兩三秒我又再慢慢收繩，跟住條友仔就發力想話搶餌，呢次就好狠勁咁一抽，中咗喇！知到係細野，即刻係咁收係咁收，好快收到上水面，見係斤頭小鱸，撈箕都費事落，成條飛佢上黎，解勾即入冰箱。
再釣多個零鐘，Ｄ流轉急，再冇魚訊喇，都係走人番屋企好過。

細條到又要比隻手指尾佢 。

得條斤頭小鱸 。