中目標魚

14-10-2013  (農曆九月初十)

今日係公眾假期，出街人多，諗住喺屋企休息吓，點知坐到五點幾，Ｄ釣魚引又發作，頂唔順又執起架生，喺雪柜攞盒千年虾仁，速速飛車落主場。

一到主場見仲有少少流水，嗱嗱聲開竿，一枝長一枝短，两枝都係釣沉底；冇幾奈枝長竿有魚拉咗幾吓，一抽即中，只有輕微嘅反抗，收到上黎係條磅頭芝蔴，成條飛佢上黎，解鈎落生籠，落餌繼續，跟住水向東流(落流)，一路釣咗三個鐘，只有小魚同蟹喺度化餌；直到Ｄ流水開始又慢番，即刻換過靚位，先落枝笩仔沉底，當我喺度攪緊枝長竿果陣，眼尾見枝笩仔竿頭比魚輕微拉咗幾吓，我即刻執起枝笩仔，說時遲，那時快，條魚以經食咗餌想走佬喇，我睇準順勢一抽，中呀!!好強嘅拉力，頂佢一陣先，跟手快攪八九吓，條魚又發力往下衝，我再頂，心知呢條一定係細鱗，所以一呎都唔可以鬆，比佢開到尾就盞瞓唔著；頂咗幾秒，再收七八吓，經幾個回合就收到上水面喇，冇詁錯，果然係條兩斤幾嘅細鱗，即落撈箕上水，解鈎直入冰箱，目標以達，跟住執野走人，去宵夜喇！

中到目標魚細鱗零舍開心

先中芝蔴班再中細鱗。

細鱗兩斤芝蔴班磅頭。

又比番Ｄ驚喜

12-10-2013  (農曆九月初八)  

呢幾日乖孫洋洋冇黎我度，賴得閒，落街市執廿蚊蝦去主場踎吓先。
落到主場，見退潮落流Ｄ水退盡都係有1.6米，釣金古就唔駛預，為有喺橋面釣吓烏頭，再開多枝竿生蝦釣半水；頂住大東北風，吹到眼都機乎睜唔開，好彩又比我中番兩條一大一小嘅烏頭；Ｄ風好似有心整蠱咁，越吹越猛，啱啱呢個時候轉咗流，嗱嗱聲執野，般去背風位，收起枝烏頭竿，一枝笩仔齋釣半水！
又過咗粒幾鐘，見竿頭彈咗幾吓，梗係隻蝦比魚嚇到彈起，我就即時執起枝竿，條魚就撲埋黎擔住隻蝦，拉咗幾吓，我就梗係禁住個鉸唔比佢出線喇，點知條魚精過鬼，一頂口就放，收番上黎隻蝦比佢咬到扁哂，Ｄ蝦又冇養住，冇生蝦添，有計～鈎隻屎蝦落去，到底拉番上六七呎，久唔久郁吓佢辨生蝦，呢招果然有較，條魚又埋黎咬咗幾吓，呢次我放小小線比佢，條魚卒之忍唔住就搶餌，哈哈!!心諗仲唔中招，我跟手一抽，結結實實咁中咗，條魚知賴野，想搏命想開尾衝，我就頂佢一陣先，睇佢有乜反應，車～冇料到，見佢開始冇力，即刻快攪十野八野，條魚又想鏢入樁，邊有咁容易吖，比我帶番佢出黎，一路順住一帶一收，好快收到上水面，一睇原來係紅鮋，唔怪之得有番咁上吓力水喇，跟住撈箕上水，直入冰箱；再釣多一陣又夠鐘走人去宵夜囉喂！

紅鮋～好奈未中過。












聽日餐飯有著落喇！

紅鮋X1

烏頭X2

噚晚都有釣魚架，不過Ｄ魚就細咗Ｄ，今次順便比埋大家睇吓吖。

11-10-2013  (農曆九月初七)

入番Ｄ貨先

25-9-2013  (農曆八月廿一)

前幾日喺屋企一連煮咗幾餐飯，清晒雪柜Ｄ存
貨，今日得閒，落主場入番Ｄ貨先！落到去見
仲未起流，即開兩枝竿，一枝釣金古，另一枝
用千年蝦肉打沉底！釣咗一陣就中條磅頭金古
，啱啱將條魚擺咗落生籠，沉底枝竿又響鉸，
一抽即中，上黎又係磅頭細鱗；再釣多陣中條
幼齒金古，入哂扣，想放都唔得，只好收埋佢
；跟住落去再冇魚訊，釣多一陣就鬆人番屋企
吔消夜喇。

釣番幾條魚黎壓吓冰箱。















又係中金古同細鱗孖寶。

有新意

16-9-2013  (農曆八月十二) 
今日睇過流水表，晚上七點Ｄ水漲到1.7米，主場
橋底唔落得，即係唔駛預釣金古，咁為有全程玩
沉底。落到主場開兩枝竿，一長一短，跟住坐定
定等運到，坐咗成兩個鐘，兩枝竿郁都未郁過，
谷鬼氣枝長竿將餌掟遠Ｄ，果然有較，即刻有
魚食餌，拉咗幾野我就 抽竿，中咗收埋黎原來係
劃仔，都好有得過引，再落餌又中，跟住又靜哂
；呢個時候筏仔竿頭有魚拉喇，我即刻執起枝竿
，當佢搶餌果吓就抽，即中，開頭仲以為係細鱗
，收到上水面至知係紅鰽，見條魚唔大，費事洗
撈箕，成條彈佢上黎，都唔錯喎有磅頭，跟住釣
多條劃就收工喇，須然釣得幾條魚仔，不過好過
又係金古吖，起碼有Ｄ新意！

沉底中紅魚磅頭。

劃仔都開始埋黎喇 ！

係食轉流果一刻

14-9-2013  (農曆八月初十)

乖孫洋洋噚晚番咗佢屋企，今日又可以去釣魚喇；喺雪柜摷番盒千年蝦仁，再落商場買半磅方包，18:30落到主場，時間啱啱好，開枝竿釣金古先，流水開始轉落，下餌唔夠廿分鐘，金古魚訊已經傳來，食咗幾野，跟住就震震吓咁拉落去，一抽即中，有些少反抗能力，頭威頭勢唔同佢玩，兩三吓手勢就收到上水面，揾陣Ｄ撈箕上水，解鈎入生籠，速速再落餌；一落就有魚接餌喇，不過食得好精，吓吓都唔到釣，食到第三口餌先比我抽中，上黎都係同對上一條差唔多大，跟住再落餌就靜哂，Ｄ落流行急咗，我就轉釣組，用虾肉去釣吓沉底；我知今晚嘅落流係得兩個鐘，所以利用呢段時間搏吓睇有冇符碌，點知都係得Ｄ小魚化餌；好快又開始行大流喇，我又轉番釣金古，運用呢個策畧係對嘅！跟手起多兩條金古收工，23:10執野走人去宵夜喇。

呢水金古都算有番Ｄ斤両 。

條條都有斤頭 。

清一色

3-9-2013  (農曆七月廿八）   

今晚天氣都算唔錯，橫掂冇乜世藝，喺雪柜攞埋
盒千年虾仁，飛車落主場睇有冇運行至得。落到
主場開兩枝竿，一長一短，都係虾肉打沉底；Ｄ
流都幾急吓，本應搬入Ｄ作釣，講到尾都係一個
懶字，同埋坐喺出面會舒服Ｄ，仲風涼水冷添；
經過噚日大雷大雨，今晚仲有少少秋意，坐坐吓
仲覺得凍添喎！
過咗個幾鐘，Ｄ流開始慢落黎，筏仔竿頭比野拉
咗一吓，嗯!!黎料囉喎～我執起枝竿，輕輕往上
帶起，條魚就搶餌喇！一抽即中，有輕微嘅反抗
，一頂一收，好順咁就收到上水面，見係磅頭細
鱗，費事落撈箕，一野就飛佢上黎，解鈎落生籠
，速速落餌繼續釣；跟住落黎仲比我起多兩條細
鱗添。
一路釣到轉埋流就再冇魚訊喇，望吓個錶又到十
點，目標以達，執野走人去宵夜都係時候囉。

今晚中目標魚細鱗 。

 

細鱗條條都唔過斤。

求其寫吓

2-9-2013  (農曆七月廿七)  

今晚以為好天，點知喺八點就大雷大雨，仲要落咗成個幾鐘，落吓停吓，等我走幾次鬼，好彩到停咗雨，出番去釣咗陣就中條半斤十両雞雞，可惜繼續落去就一咀都冇，釣到十一點就鬆人去宵夜喇。

有條雞魚釣吓都好過冇 。

呢條雞魚都有半斤十両 。