白果魚神(釣魚當番工)

2009年3月3日星期二

至老友都係牛牛

3-3-2009 (農曆二月初七)

今日心血來潮，手痕痕又落北角釣魚，七點

幾轉流，開好竿等運到，呢頭坐低飲啖水，

果頭就響鉸，沉底果枝竿比野狂拉咗一下，

我揸番枝竿等佢再發圍，點知成分鈡都冇動

靜，收上黎睇吓隻蝦冇左，再加番餌落去再

等，卒之等左成粒鐘，另一枝竿又開始有微

弱魚訊，我呢次唔等佢響鉸啦，揸起枝竿，

成作戰狀態，果然不出所料，特然一野大

咬，成枝竿頭變成７字，條友仔中左啦，我

一抽一收佢就毫無反抗能力，比我直收上

水，見磅頭魚都懶落撈箕，成條飛佢上岸，

跟住影相落生扣，攪左一輪再落餌又中點知

斷繩收場，都好全日都有兩口，鱸竿就未郁

過，望下個錶成十點，都係見好就收，清理

現場後走人番屋企吔飯。

至老友都係牛屎你囉！

影番張沙龍先~

磅頭黑立至好食。

2009年2月26日星期四

搏唔到大霧添！

26-2-2009 (農曆二月初二)

大霧天，執十零隻蝦去主場過下引，點知鱸又冇，乜都冇，只有霧，好彩有幾個釣友係度吹下水。

磨爛蓆磨到十點幾轉流，一口魚訊都冇，卒之都係龜，番屋企食白飯。

龜氣充天~~#鱸又冇！

兩枝沉底未咬過。

2009年2月20日星期五

今日轉左風,吹番北風,又係釣魚嘅好日子,落街市執十零蚊蝦,去北角吹水&釣魚。到左釣場又係得我一個,開好之鱸竿鈎隻生虾放落去準備度下水深,照常十零呎左右,點知去到八九呎特然枝竿頭感覺有大物狂拉,即時我就知有料到,不敢怠慢,即刻拑實個橫鉸仔唔比佢出繩,跟住佢就發力想洗鰓,我就放一放鉸,等佢發唔到力,再跟手一抽,將佢條友仔個頭向回水面,跟住狂收,眼見就快上水面,點知條友仔見光就發茅,想開尾衝番落去,但係我點會比佢咁做丫,我順勢用力將之竿轉右再轉左,條友仔當堂冇哂方向,唯有反肚投降,最後都係入撈箕上水,玩左成分鐘,過足引,跟住先至開埋沉底兩枝筏仔,此時榮頭又到,呀偉又來,多幾個人開心Ｄ,冇幾奈榮頭又中鱸,之後冇哂動靜,連少少流都冇,直情屎流,此時都係執野走人,臨走時,呀偉仲約我地去澳頭釣番轉日水添,都好喎,好奈冇去過馬鞭,同食望海樓嘅野,一於揾日去釣番獲先！拜拜！

又中魚笑爆咀。

成兩斤幾架。

條友仔仲想咬個昇盤添,幾惡呀。

2009年2月18日星期三

花鱸開始埋北角喇

18-2-2009 (農曆正月廿四）
今日悶悶地又冇野做,望見個竿袋就魚
引發作,拿拿聲落街市執廿蚊蝦,飛車落
北角,見個海冇乜流,得我一條友,就慢慢
開好兩支竿,一枝沉底,一枝半水釣鱸,初
頭轉左幾次位都冇料到,再放番原位枝
鱸竿響鉸,有魚拉左兩三野,跟住又停左
,收番隻蝦上黎,蝦都比佢嚇死左,再換隻
極之生猛嘅虾乸落去,唔到廿秒條魚就
黎大咬,竿頭成７字,順手一抽,再帶順佢
出樁,此時佢想發力開尾,但我己經狂收
繩,將佢魚頭向水面帶,兩三下手勢就將
佢抽上水面,再等佢飲幾啖水先,最後梗
係乖乖入撈箕喇。影埋相(自拍),見沉
底都冇乜動靜就收竿回家開餐好過。

北角有鱸啦，幾吓功夫就抽佢上黎。

影番幅沙龍先。

照例整幅昇盤相。

2009年2月12日星期四

三門仔三粒石磯釣

12-2-2009 (農曆正月十八）

天未光就到三粒石，點知靚位比人先到，只有上次位喇，釣到中午毫冇魚訊，見靚位Ｄ人走先，就順便叫艇家同我地轉去中間粒石繼續釣，狂打粉都係冇魚訊，只有小魚化餌，一路到五時就打龜回航，須然打龜但總算玩足一日，都不失為一天開心之釣行，懷著愉快心情回家去也。

釣魚龜界高手，高橋雪也&田中貴榮(嘔死)~~＃

打住勝利手勢先。

無魚埋繼續打粉(掟錢落海)。

佢又話勝利喎。

等待又等待。

我就喺度辨中魚。

雪也釣地球。

我地走果時都有清潔現場同帶埋垃圾走，呢Ｄ係釣者之道德，希望人人都係咁，釣場先至可留存萬世。

收拾好垃圾準備走人。

前途一片光明，明天會更好。

2009年1月6日星期二

貳零零玖年第一炮，對像魚黑牛首先登場。

6-1-2009(農曆十二月十一)東北風生流

幾日冇釣魚，手痕痕，拑電腦去天文台睇睇水流，知到五點幾六點轉落流，就拿拿霖立齊架生揸車落北角，到咗釣點，已見有四五人在釣緊，我用最快速度開好三枝竿，兩枝沉底，一枝半水釣鱸，一路都冇乜聲氣，到六點半左右，有枝竿好似比蟹拉咗一拉，我就想起細鱗係咁食法，跟住小心提起枝笩仔，慢慢拉拉有勿反應，果然一拉之下，條友仔就發惡大咬，我當然唔會比佢嚇親，左手一提，右手快攪，先將條友仔抽離底石，跟住攪幾手，條友仔特然向右邊樁飛去，好彩我眼明手快，三兩下就將佢抽出升水，眼前銀光一閃，牛屎立是也，跟住將佢成條抽上水，將魚落好生扣，繼續專心去釣，可惜一路都冇魚訊，睇睇個錶都成九點幾，歡樂時光過得特別快，係時候講拜拜，執齊野就揸車番屋企開餐啦喂！