釣金鼓技術開始掌握到喇

經過一連十幾晚釣金鼓，除咗頭一兩次〝高人〞指點咗魚嘅食餌動作之後，一路都係靠自己嘅摸索，經過咗雷電交加、橫風橫雨、大流屎流、到依家已經掌握到釣佢嘅「技巧」喇。

以下係小弟釣金鼓嘅小小心得，希望同各位大師分享：其實所謂「技巧」好簡單，只不過係用幾多號鈎，粒麵包餌嘅鈎法同鬆實度！

首先講鈎先，初初我用三號鈎，以為夠細喇，除咗有幾條較大嘅食埋黎有搶餌嘅感覺之外，其他較小嘅都係(符碌)抽中，完全冇把握抽中佢，後尾我轉用一號鈎，搶餌嘅動作就明顯喇，每次都等條魚拉竿頭或者枝竿頭彈起果吓就抽竿，十拿九揾。

上述如有差錯，敬請各路英雄多多賜教!!

首先送上一碟果皮蒸金鼓比大家分享，以示敬意！

11-6-29 (農曆五月廿八)

全部都係呢Ｄ晒士。

11-6-30 (農曆五月廿九)

中第三條果時因為入咗扣，換鈎時先發覺冇帶鈎，所以釣得三條就收檔。

11-7-1(農曆六月初一)

己掌握到釣金鼓嘅枝巧喇！

金鼓越釣越熱

橫掂冇鱸釣，沉底又望天打掛，既然金鼓當做，所以每次都係以佢為對像魚，不過我釣金鼓嘅技術，只係喺幼兒班皆段，一晚有幾十口食埋尼，但都係收穫平平，咁先至攞命，使到我要繼續努力鑽研先至得喇。

20-6-2011  (農曆五月十九)

太陽未收，本來一心釣金鼓嘅，但係Ｄ泥鯭埋黎搶餌，未到金鼓層就比佢將Ｄ餌化哂，谷鬼氣釣埋佢囉。

21-6-2011  (農曆五月二十)

成晚係咁抽竿，都係中得一條，好彩執番幾條橫澤補數。

24-6-2011  (農曆五月廿三)

Ｄ金鼓大少少，食餌嘅動作就較為明顯Ｄ，中呢三條都係睇到竿先微微咁拉落去，或者托起粒餌我先抽竿嘅。

27-6-2011  (農曆五月廿六)

卒之比我真係中番條大金鼓喇，呢次食餌更加明顯，直情見到拉竿，我一抽就中，以經心知大野，好小心咁攪吓就吓，佢就係咁搏命片，係咁極速打轉，我就盡快將佢升水，搏閗時間唔使四十秒，梗係撈箕上水喇。番到屋企，開心得制，嘈醒咗大人，咁就順便叫佢同我影番張相。

睇佢咁大餅，過秤其實都係得斤六兩。

細條果Ｄ食得又精又輕，要開住頭燈，睇住竿頭先知佢食餌，大果條食餌就明顯喇！

今晚嘅收穫都算唔錯喇。

閉關苦練，略有所成

近排冇出過釣魚卜，唔係我冇釣魚，只不過係學緊釣「金鼓」啫，第一次試釣果時，點樣掛餌，放幾深水，佢食餌嘅動態，都完全掌握唔到，卒之『龜咗』！第二次試釣，經【高人】指點，略知一二，但係幾時抽竿，就要靠自己嘅感覺喇。

15-6-2011  (農曆五月十四)  第二回

「小金鼓」食餌比「泥鯭」仲要輕口，幾時抽竿都形未掌握得到，次次見到竿頭郁郁吓就抽竿，釣到呢兩條都係『符碌』。

16-6-2011  (農曆五月十五)  第三回

卒之比我中番條比較似樣Ｄ嘅磅頭「金鼓」喇！大條Ｄ食餌就比較明顯，佢一食埋黎我就知係「金鼓」喇，竿頭明顯拉咗幾吓，跟住就見枝竿頭彈番起，我立即諗番起之前嘅【高人】講過:「大金鼓」食餌係托起黎食架」!!我見咁嘅情況，就即刻抽竿！中呀.....都有幾分力水，我就連攪咗幾吓，因為用直攪，行程比橫攪快，所以好快就見魚喇，喺漆黑嘅水中，只見一塊圓形嘅銀影，喺度高速打圈，我唔敢夾梗黎，所以就一就佢，再攪幾吓，跟住就上到水面，見有Ｄ斤両就不容有失，用撈箕上水。好得意喎，條魚上咗水就郁都唔郁過喎，不過我都好小心，(因為佢Ｄ刺有毒，如果比佢拮到，起碼劇痛幾個鐘)！跟手放落生籠，再落餌釣多陣，見冇乜魚訊就收野走人喇！

釣到呢條磅頭「金鼓」，仲開心過釣條十斤「鱸」呀，因為係我第一次釣到條大ＤＤ嘅「金鼓」。

第二日即刻蒸咗黎食，激發自己嘅「金鼓」熱。

大人同三公主都話好正。

17-6-2011 (農曆五月十六) 第四回
可能以經掌握到少少釣金古嘅皮毛技巧，所以今次嘅收獲都幾滿意，喺呢個「鱸魚亅走咗，「烏頭」又未到嘅時刻，由今年起，「金古」就係我喺呢段時間嘅對象魚喇。

須然釣到好夜，都無減我興奮嘅心情。

主打金古。