白果魚神(釣魚當番工): 8月 2011

2011年8月30日星期二

用兩條烏頭試新卜

30-8-2011 (農曆八月初二)

呢幾日攪個升級新卜，自己Ｄ理解力又低，好唔容易先叫做攪掂，咁先有心情去釣吓魚。
食咗晚飯19:30就落到主場，已經有兩個釣友釣緊烏頭，我簡番個位就落餌等運到，一路都冇魚訊，三丁友喺度吹水吹到21:00，釣友Uncle又到，佢一開竿就即中一條，喺轉流嘅過程中，佢走來走去，見到我地有魚訊就即刻過黎搶位，咁就比佢連起三條，不愧為捕獵人，我地坐幾個鐘，只係喺度做大眼仔，冇法喇懶之過。見人地有魚中，自己一條都冇，為有磨爛蓆啦！23:00轉哂流，佢地走哂，我就轉個位，落餌唔夠五分鐘，一吓強力嘅魚訊，呢次都唔使睇浮波，剩係枝竿都彎哂，終於比我〝下〞到喇，我都唔使做其他動作，嗱起枝竿就係咁頂，係咁收，感覺條友仔都唔細，小心拖埋腳邊，撈箕上水，入埋冰箱。上天真係對我不薄，點都比番條魚我中吓，咁我就執埋架生，走人去宵夜喇。

準備劏魚喇，過磅三斤幾。

19-8-2011 (農曆七月二十)

27-8-2011 (農曆七月廿八)

28-8-2011(農曆七月廿九)

2011年8月20日星期六

紅潮打龜

20-8-2011 (農曆七月廿一)

今日晏晝，想話開部冷氣嘆吓，點知開咗机

但係冇風出，咁我就琴高拍吓佢，一拍!!個出

風口就有番Ｄ風出黎，但係Ｄ風好細，開到

最大風都係冇變，大人就嗱嗱聲揾冷氣師傅

黎睇睇！約咗佢18:30，師傅睇過話有Ｄ電子

零件壞咗，跟住整咗一輪，好彩攪掂番，乘

謂360蚊。

就係呢部野喇，好彩攪番惦，如果唔係，天

氣咁熱，問你點頂。

19:15個冷氣師傅走咗，我就嗱嗱聲執架生，

飯都唔食，標落主場釣魚喇！

19:45落到去以經見師傅偉喺度釣緊，佢話今

日都唔使點釣喇，你睇個海~我一望，嘩!!奶

茶咁嘅色，紅潮呀！落到黎冇理由唔開竿架，一於照開，跟住仲加多個釣友添，一路都冇魚訊，大家喺度吹吓海風吹吓水，磨到23:55轉埋流，三隻大龜執埋架生，走人去宵夜好過喇！

19-8-2011 (農曆七月二十)

流到冇雷公咁遠先至中一碌~~兩斤幾。

2011年8月18日星期四

新架生用兩條烏頭開齋

18-8-2011 (農曆七月十九) 生流

噚晚唔知做乜，連中五口都爆咀，結果龜哂，真係激鬼屎！冇野好賴，就賴Ｄ架生唔得(其實係自已心煩氣燥)，今日即刻去釣具店簡番枝竿同鉸。

兩樣夾埋都唔使X一蚊。

個事頭婆話呢枝韓國野(中國制造)好夠力喎。

跟手執埋個鉸。

呢個鉸嘅顏色我都幾鐘意。

食埋晚飯19:30就落主場，首先開好枝竿，跟

住上好個浮波，落餌就往海中發炮，半個鐘

度，浮波就開始擺動，有魚食餌喇，見個浮

波一沉，我輕輕一帶，結結實實咁中咗，跟

手一抽，連攪三野，頂!!輕哂~又爆咀，果時

真係嬲到七孔生煙，有冇攪錯!!口中念念有詞

×＋Y＊#！個心喺度諗~千其唔好燥，成海都

係魚，至多再釣過啫。

此時釣友Uncle以經起咗兩碌，喺呢個時候，

我就更加要鎮定，唔好受佢影響！當我全神

灌注住個浮波嘅時候，個浮波又開始擺動

喇，跟住一沉，呢次我就等耐Ｄ，當我感覺

佢第二次發力嘅時候，我先至抽竿，中咗!!我

乜都冇做，只係頂魚，頂咗幾秒就開始收

繩，呢條唔係好大，冇乜力，好順咁拉到埋

黎，揾陣起見，用撈箕上水，解鈎即入冰

箱，落餌再釣。

又過咗半個鐘度，呢次個浮波就擺動得好大

波幅，跟住即沉，好大嘅拉力，我都唔使抽

竿，只係往上頂，此時磅頂發出好好聽嘅

〝叮叮〞聲，跟住開始角力喇，首先帶佢出

海中心，佢又乖乖咁好高速飛出去喎，頂吓

收吓玩咗一輪，帶到埋腳邊，用撈箕上水，

掟埋佢入冰箱。

22:15Ｄ流水開始轉落流喇，依排釣烏頭嘅經

驗話比我地知，佢係唔食落流嘅，所以我地

就執埋架生走人喇。

哈哈!!唔記得擺魚穫上黎添，好彩得你地提點

咋！

2011年8月16日星期二

烏頭大軍先頭部隊殺到

16-8-2011 (農曆七月十七) 生流

噚日霖尾中條烏頭，今晚再去主力釣佢。

20:30落到主場，開好竿，坐定定喺度等運

到。釣友師傅偉、Uncle 陸續到場！呢個時

候，水流開始減慢，首先我掟出去個浮波，

睇住佢擺咗幾吓，我就輕輕一帶，即刻就有

反應喇，浮波訊速消失喺漆黑嘅水面，中

呀！好強嘅拉力，我就邊收邊帶，將條魚帶

出海中心，遠離兩位釣友嘅釣點，費事炒埋

一齊，條魚又好聽話喎，玩咗一輪，埋到腳

邊，撈箕上水，即入冰箱，跟住落餌再發

炮！

冇幾奈，呢次輪到師傅偉中魚喇，當佢收緊

埋黎果陣，我個浮波又沉咗喎，但係呢次我

將條魚收到埋腳邊果陣，比佢發力爆咀走

咗，好彩以經有魚壓冰箱，無所謂喇，落餌

再釣！

又過咗一陣，我又中魚喇，收到埋黎見條魚

都係斤鬆Ｄ，撈箕都費事落，成條烏頭飛佢

上黎，入埋冰箱。此時Uncle見勢色唔對，嗱

嗱聲走過黎我果邊發炮，好喇!!我都有兩碌在

手，就比個位你玩吓喇，果然又比佢中番兩

條喎！

都好!!最緊要人人有魚中，大家都好開心。

22:15見水流己經轉咗，時間啱啱好，都係執

埋Ｄ架生，清理好釣場，各自回家喇。

咁早番，大人梗係未瞓喇，跟手同我影張靚

靚相先。

大果條睇落都有兩野幾三野。

15-8-2011 (農曆七月十六)

今季第一條烏頭，好嘅開始。

2011年8月11日星期四

呢排冇勿驚喜所以儲埋一次寫

11-8-2011 (星期四)

噚日喺主場見到一基鱸魚，可惜冇帶架生又冇餌，今日上埋架生，諗住落街市買蝦，點知檔檔Ｄ蝦都直哂，要撲到落筲箕灣先買到幾隻屎屎吓嘅箕圍蝦！

18:15落到主場，開好竿，鈎隻較為生少少嘅蝦落去搏大霧，轉到第三個位，竿頭就有反應喇，佢一拉竿我就以經抽喇，頭幾手都收得好輕鬆，但係鱸魚點會比你咁順吖，一吓反拉力，我就焗住要放繩喇，嘩!!感覺呢條友仔有五六野喎！佢走咗一段，我見佢慢落黎就即刻反擊，將枝竿向上一頂，跟住連攪四五吓，佢又開尾再發力，睇住佢標埋條橫樁道，拉都拉唔住，想話放繩喇，但係以經尼唔切囉~〝擦〞一聲，全歸平靜..................!!斷繩收場。

跟住我就氣又速，手又震咁嗱嗱聲再挷鈎落餌，睇仲有冇同党！一路釣咗個幾鐘都冇魚訊，我諗可能Ｄ蝦唔夠生，又可能斷咗果條魚嚇走哂其他Ｄ魚，又可能乜又可能密，總之就性賴喇。

20:15我睇今晚都係咁先囉，早Ｄ執埋架生走人，留力聽晚再同佢搏過。經過西灣河街，順便買碗車仔麵番屋企宵夜喇喂！

前幾次嘅魚穫，須然少少地，不過都同大家分享吓咁囉！

3-8-2011 (農曆七月初四)

又中一大一小金鼓。