食過番尋味

24-4-2014  (農曆三月廿五)
早兩晚釣咗兩三斤石狗，簡咗幾條大嘅黎清蒸，其餘用黎煲湯，食到大人同三公主嗒嗒聲。

見佢地咁鐘意食，一於今晚去釣Ｄ石狗番黎再食過。
落到主場開兩枝竿，一枝沉底，一枝筏仔釣石狗，由18:00釣到22:00，沉底枝竿郁都冇郁過，石狗就釣咗兩三斤，費事磨喇，夠食就算，執埋架生去宵夜喇！

大人食過番尋味，整多餐石狗佢嘆吓！

今次有獎品(石崇)。

清一色

21-4-2014  (農曆三月廿二)
晏晝大人話好奈未飲過石狗湯喎！咁就易喇，即刻喺雪柜摷盒千年虾仁，到傍晚就落主場齋釣石狗。
18:00落到去，開兩枝竿，一枝順流掟出去釣水底魚，再用枝筏仔喺每個樁頭釣吓石狗，唔係大人話要飲湯我都唔會去釣佢，一路到21:30沉底果枝竿郁都未郁過，經三個幾鐘就釣咗兩斤幾石狗喇，一Ｄ難度都冇，見目的已逹，執埋架生去宵夜喇喂！

大人要飲海鮮湯，唯有去釣清一色石九。

金古季又到喇

18-4-2014  (農曆三月十九)
釣友報料，主場出現金古，不過好細條，咁我就梗係去踫踫運氣喇。
18:15到主場，釣友以經喺度釣緊金古，仲釣咗幾條添，但係都係三指大嘅，全都回歸大海，而我見時間仲早，又有買生蝦，所以先開竿釣吓鱸先；落好餌，再開多枝竿打沉底，開開吓特然枝鱸竿比魚拉到響鉸，我即刻放低Ｄ野，九秒九嘅速度飛撲埋去，一執起枝竿就往上抽，中咗！連攪咗幾吓，感覺虛哂嘅～心諗條衰魚唔通放口！屎屎氣收番上黎，點知收到差唔多到水面先至見條魚原來冇甩口，只係一路升水，所以我至覺好輕；佢見光就想標番落去，嘥氣喇，兩斤都唔夠嘅小鱸，我跟本唔放佢在眼內，一頂就收，上到水面，撈箕都費事落，成條飛佢上黎，即落生扣，換餌繼續。
釣咗果條之後，一路到成22:30都冇料到，呢個時候，釣友傳來喜訊，釣咗條磅頭金古，仲叫我嗱嗱聲開竿添，咁我都要執好Ｄ野先架，執好野再開好竿，釣友又中多條十両嘅金古，我都唔好執輸喇，即刻落餌，一落餌就有魚接，我同釣友兩枝竿好似彈鋼琴咁上上落落，係就係中咗幾條魚呀，不過都係唔要得嘅哂士，磨到差唁唔多想走先比我釣番條半斤十両嘅食用裝，望吓個錶，嘩！零晨十二點幾嗱～算數喇，目標以達，下次一於專程釣佢，收埋Ｄ架生走人去宵夜喇。

今季開始有金古喇。

金古細連條鱸都係細。

細細兜

11-4-2014  (農曆三月十二)
晏晝收到風，主塲發現有金古出沒，咁我就即刻執起架生，去買半磅方包，再落街市執多廿隻蝦，18:15就到主場。
一去到首先開枝竿，鈎粒面包落去睇係米真係有金古先，落咗餌跟住就開埋枝釣鱸竿，再開多枝打沉底；開好哂檔就坐定定釣金古，真係有喎，食得好輕力，不過都比我釣到，但係唔大囉，一路到21:00，共釣咗四條，都係三指大，全部回歸大海，等養大Ｄ先釣番佢；Ｄ金古咁細，索性唔再釣佢喇，專注釣鱸好過。
又過咗三刻鐘，眼尾見釣鱸枝竿跳咗一吓，黎料喇，即刻攞埋撈箕飛撲埋去執起枝竿，呢頭執起枝竿，條魚就發力衝，我頂一頂佢，妖～冇乜力，條魚大極有限，跟住三兩吓手勢就 KO 咗佢，安全起見都係撈箕上水，落埋生扣，換餌繼續。
釣到22:30見Ｄ流都停埋，鱸竿亳無魚訊，沉底嘅繼續係枝善良之竿，算把喇師兄，有一條釣到就唔磨爛蓆喇，都係執埋Ｄ架生，去宵夜好過。

中番條花鱸仔唔使龜。

鱸仔兩斤都唔夠。

又要磨爛蓆

5-4-2014  (農曆三月初六)
喺晏晝，天氣真係好到不得了，陽光普照，唔去釣魚就真係對自己唔住，執埋架生，落街市買廿隻蝦就直跴主場。
五點落到去仲未轉流，開好竿就等運到，點知一等就等到轉埋流，仲要磨爛蓆磨到成十一點，竿頭先至微微郁咗一吓，唔理三七二十一，攞起撈箕就撲埋去拎起枝竿，唔使幾秒就扯到行，我一抽就中咗，快攪幾吓，感覺Hi住樁，即刻鬆繩比條魚走番出黎，佢一出黎我就唔同佢客氣喇，隻手好似裝咗摩打咁，一路係咁收，好容易就收到上水面，都有兩斤，撈箕上水，即入冰箱，卒之比我磨番條，見目的以逹就收野走人去宵夜喇！

又要磨爛蓆至中番條。

好彩都有條花鱸仔。

易如反掌

3-4-2014  (農曆三月初四)
呢幾日天氣唔好，冇去釣魚，今日趁住冇落雨，嗱嗱聲落主場過吓引。
買好餌18:30落到主場，都係照舊開三枝竿，19:05中第一條鱸，未到21:30就中多三條，過程一Ｄ都唔精彩，大人來電，又話買咗Ｄ壽司魚生等埋我番黎食，既然過足手引，有魚留番聽日釣，都係執野走人番屋企好過喇！

今次中四條花鱸仔都算係咁喇。

鱸仔條條都唔過兩斤～