金古大番Ｄ喇

2-6-2014  (農曆五月初五)
噚晚釣金古釣到欲罷不能，今晚又去做佢世界；18:00落到主場，開好竿，落咗餌就坐定定等泥鯭收口，19:00太陽一收金古嘅魚訊就黎喇，跟住連中三元，有條都有十両，今季算大架喇！釣完呢三條Ｄ金古又收哂口喎；過咗成兩個鐘，一路我都係將餌放三四潯，試吓將Ｄ餌放兩潯睇有冇魚至得，一落餌就有魚接，哈哈！呢個改變係冇錯嘅，仲食得好狠添喎！食咗幾吓就成枝竿都比佢拉到彎哂，一抽就中，上黎都係十両左右嘅金古，唔錯，跟住連起多三條，一樣係食得好狼屎，有一口仲食到竿頭都彈起添，好奈未試過釣得咁過引，一路釣到23:00就真係收哂口喇，有魚留番聽日釣，執埋Ｄ架生走人去宵夜喇！

今晚Ｄ金古就大番Ｄ喇。

Ｄ金古釣極都有。