29-9-2014 (農曆九月初六)
外圍烽煙四起，都係執盒千年虾仁，落主場踎吓好過喇！
18:30落到主場，Ｄ流行到嘭嘭聲，都係唔好釣咁出，行番埋Ｄ躉頭度開竿，照舊平時咁一枝筏仔釣腳邊，一枝小磯竿開Ｄ釣魚仔，一路釣到21點幾，小磯竿中咗條斤頭細鱗同一條小黃腳，枝筏字郁都未郁過，只有Ｄ坑簾喺度攪攪震；低唔住頸轉位！呢個缺定原來係啱嘅，落餌唔夠五分鐘，枝筏竿頭點咗幾吓，我即刻嗱起枝竿，說時遲那時快，條魚以經大力搶餌，我順勢一抽，中咗！好重手，知係大野，頂咗一陣，快攪幾吓，條魚又衝，我再頂，成枝筏仔彎哂，心諗炸就炸喇，一寸都唔比佢，如果鬆少少比佢，肯定難以收科，所以一路控制住條魚，等佢開唔到尾，佢一鬆我就收，跟住條魚改變策略，想向樁柱標埋去，我就即刻駛出乾坤大羅移嘅步法，向右行兩三步，一路扯到行，再駛出左右野馬分鬃，一左一右，條魚即刻比我拉到佢暈酡酡，冇哂方向感，我趁呢個机會再用一招無敵風火輪，好快咁就將條魚收到水面，啊！唔怪知得咁好力喇，原來係條兩斤幾嘅紅鮋，跟住撈箕上水，剪線落生扣，換鈎落餌繼續；再釣多半個鐘都冇料到，望吓個錶，差唔多22點，既然有收獲，費事磨爛蓆，又係時候講拜拜喇。
中番條紅鮋，Ｄ信心番哂黎。
又紅鮋又細鱗，仲唔威番次。
紅鮋兩斤幾，細鱗斤頭。
26-9-2014 (農曆九月初三)
噚日老友攪咗個退休晚宴，我同大人都有去赴約，所以冇去釣魚，今日得閒，攞盒虾仁就直跴主吩場釣番夠本。
落到去都費事路釣金古喇，一便心玩沉底釣目標魚(細鱗)，開好兩枝竿，一枝筏仔釣腳邊，一枝小磯釣一竿出；到開始慢流果吓，我金睛火眼望實枝筏仔，果然有魚食餌，執起枝竿等佢大力拉果吓我就順勢一抽，中咗！不過感覺唔係大野，可以玩陣，收到水面見條細鳞得果半斤十両，撈箕都費事落，成俘條就咁抽上黎，解鈎落生扣，落餌繼續；一路釣到轉落流都冇第二口中，換過位置，用枝小磯竿掟遠Ｄ，果然又比我執多幾條劃仔喎！其間好多坑簾喺度攪攪震，釣到十一點就執野走人去食宵夜喇！
呢條真正係細鱗。
細鱗就細咗Ｄ，加埋幾條劃又夠一餐。
21-9-2014 (農曆八月廿八)
今晚落到主場，Ｄ水漲到横樁，須然未至到濕脚，但係一有大船過，肯定連底衭都濕埋，所以放棄釣金古，專心釣吓沉底好過。
落餌釣咗唔夠十五分鐘，即中條斤頭細鱗，再落又中，可惜大意比佢包樁，斷咗！跟住就只有細魚，先中條沙立，再中多三條黃腳仔，喺呢兩三年，主場都未有過黃脚，今年開始有番，係好嘅開始；一路釣到成十一點，都係執野走人喇！
沉底都有幾條魚仔玩吓。
細鱗斤頭，仲有沙立同黃腳。
18-9-2014 (農曆八月廿五)
颱風海鷗襲港，加上落咗幾日雨，攪到成十日都冇去釣魚，今日天氣唔錯，又得閒，咁就係雪柜摷番盒千年虾仁，攞埋兩塊麵包就直跴主場。
落到去見Ｄ水開始漲，嗱嗱聲娟入橋底釣陣金古先，又好彩喎，釣到天開始黑以經中咗四條，有兩條仲係磅頭；Ｄ水又漲到脚邊喇，即刻執架生轉位，番上橋面釣沉底，一路釣到十點幾都冇郁過，好彩之前執番幾條金古啫，如果唔係今晚又龜，時間都差唔多，都係執埋Ｄ架生，走人去宵夜好過喇～
好彩執番兩條磅頭金古！
好彩有佢，唔係又龜！
10-9-2014 (農曆八月十七)
話說噚晚比條魚KO咗，我睇都係細鱗多，今晚一於再去捕佢。
喺雪柜摷番盒千年虾仁就直跴主場，19:00落到去，見仲係行緊大流，慢慢開好兩枝竿，一枝係小磯竿掟去去釣吓魚仔，另外一枝係筏仔，釣腳邊直落沉底；一路都冇料到，釣到21:30，Ｄ流開始慢，我即刻換個靚位，今日係十七，好快開始轉落流喇，呢個時候見到枝笩仔竿頭好輕力咁點點吓，我即刻揸起支竿，條魚跟住發力搶餌，我順勢一抽，成個人企高一路頂起枝笩仔，跟住追番六七吓再頂，一吋都唔鬆比佢，全部壓力喺哂枝竿度，再追、再收，睇住就快上到水面，點知條魚發狂咁標入脚底Ｄ橫樁度，如果再同佢抖力就實聽斷繩收場，咁就唯有焗住比番幾手佢走吓，跟手帶番順佢出黎，再攪幾吓就到水面喇，真係細鱗，睇落都有兩三斤，即刻撈箕上水，落好生扣之後又繼續；又釣咗一粒鐘，都係冇乜料到，嘅然目的以達，22:30執哩架生番屋企食飯囉！
嘈醒大人同我影相。
中目標魚細鱗。
三斤細鱗好野喇掛。
噚晚斷一口，今晚冇得走！
1-9-2014 (農曆八月初八)
呢排要攪呢攪路，週身唔得閒，成半個月都冇去釣魚，今晚見冇咩做，落商場買半磅麵包就直跴主場。
落到去天開始黑，冇泥鯭化餌，釣咗半個鐘度就開始有魚訊喇，換咗三次餌，魚訊越來越強，睇住竿頭震震吓咁拉落去，我即抽，中咗！收幾野以知條魚有Ｄ斤両，就一就佢再攪幾吓，條魚發力，拉到磅頂都叮叮聲，見佢一慢就連攪六七吓，見魚喇，條金古真係好大餅，安全起見，用撈箕上水，解鈎落生籠，換餌繼續，一落就有魚接，食得好輕口，條魚大極有限，由得佢食，卒支食到拉竿先至起佢，兩三吓手勢就上咗黎，係條幾両嘅金古，即落埋生籠，呢個時候Ｄ水開始上泊喇，有船一過實濕腳，都係收竿嘅時候囉，跟手執埋Ｄ架生走人去宵夜好過喇！
斤半金古终於出現喇。
中咗條斤半金古，今晚釣住兩條先。
%E7%B4%85%E9%AE%8B%E5%85%A9%E6%96%A4%E5%B9%BE%E7%B4%B0%E9%B1%97%E6%96%A4%E9%A0%AD%E3%80%82.JPG)
%E7%B4%B0%E9%B1%97%E5%B0%B1%E7%B4%B0%E5%92%97%EF%BC%A4%E5%8A%A0%E5%9F%8B%E5%B9%BE%E6%A2%9D%E5%8A%83%E5%B0%B1%E5%A4%A0%E4%B8%80%E9%A4%90.JPG)
%E7%B4%B0%E9%B1%97%E6%96%A4%E9%A0%AD%E4%BB%B2%E6%9C%89%E6%B2%99%E7%AB%8B%E5%90%8C%E9%BB%83%E8%85%B3.JPG)
%E5%A5%BD%E5%BD%A9%E6%9C%89%E4%BD%A2%E5%94%94%E4%BF%82%E5%8F%88%E9%BE%9C.JPG)
%E5%99%9A%E6%99%9A%E6%96%B7%E4%B8%80%E5%8F%A3%E4%BB%8A%E6%99%9A%E5%86%87%E5%BE%97%E8%B5%B0.JPG)
%E4%B8%AD%E5%92%97%E6%A2%9D%E6%96%A4%E5%8D%8A%E9%87%91%E5%8F%A4%E4%BB%8A%E6%99%9A%E9%87%A3%E4%BD%8F%E5%85%A9%E6%A2%9D%E5%85%88.JPG)
