去咗成個禮拜旅行，噚日先至返黎，今日釣魚蟲又咬，喺雪柜摷盒千年蝦肉，即刻去釣番轉止吓痕先。
18:00落到釣場，仲係落緊流，照例開三枝竿，兩枝筏仔釣腳邊，一枝小磯掟遠小小；落餌冇奈，磯竿仔比魚拉咗幾吓，跟住成枝竿彎哂，我一抽就頂起佢，跟手攪咗幾吓，條魚都有Ｄ力水，反抗咗一陣，我再攪幾吓，嗯！唔似細鱗喎，頂吓收吓，好快就上到水面，原來係條斤零重黃腳，頭威頭勢，梗係用撈箕上水喇，解鈎郎落生籠，落餌繼續；正想行去攞枝水飲，笩仔響鉸，放低枝水，飛撲埋去抽起枝竿，條魚以經發難，我就唔理咁多，快手攪咗幾吓，點知條魚以經開尾，頂咗一陣就要比佢走幾呎，如果唔係炸竿都有份，呢條梗係細鱗喇，仲要起碼三斤添喎，見佢一停就即刻頂起再攪，但係攪咗幾吓條魚又再沖，呢次仲比佢走咗兩段，一停再收，再沖再放，三四個回合，感覺一輕，噢～斷咗！大戰結速。
屎屎氣再挷過鈎落餌繼續，又過咗陣，另外果枝筏仔比魚拉咗一吓，我執起枝竿慢慢向上提，一吓勁扯就即抽，嘩好墜手喎，但冇乜反抗，只係頭幾吓有Ｄ力，好容易就收到上水面，妖～大泥婆，撈箕都費事洗，一野就掟佢上黎，即剪鈎，放喺地下由佢典吓先，挷鈎落餌繼續；跟住落黎釣多兩條一斤唔夠嘅細鱗，過程毫無難度；再釣一陣，望吓個錶又係時候執野走人，見地下條泥婆有成三斤，大人又中意食，好喇唔好嘥，執埋佢番去比佢食喇，跟住走人去宵夜喇喂～
呢條黃腳夠正喇掛。
走條大捉番兩條細。
加條三斤油追比大人嘆吓。
今晚收獲都算唔錯。
沒有留言:
張貼留言