11-11-2011 (農曆十月十六)
今日置咗Ｄ新架生，落主場揾Ｄ劃仔開齋！
韓國小磯竿、日本攪(大馬製造)、三號碳線。
19:15落到主場，即刻用枝新竿試吓好唔好釣，又覺得唔錯喎！同飛咗落海果枝冇大分別，仲長咗兩呎添(11呎)。
20:00見Ｄ流慢咗，我就打醒12分精神，金精火眼恰實打沉底果枝筏仔，唔使幾分鐘，果然有料到，竿頭好似比坑簾食緊咁樣震震吓，好細力，我就執起枝竿先，輕輕帶起舊餌(爛鬼蝦仁)，就感覺到有野擔住，我再慢慢收繩，佢就拉咗兩野，當佢發力搶餌嘅一刻，我就後發先至，一抽就即攪四五野，枝竿頂到行，再繼續收繩，一Ｄ都唔比机會條魚發圍，係咁直收上到水面，成條掟佢上岸，又係斤頭細鱗，安置好佢之後再落餌，今次就真係比坑簾化餌喇，果陣Ｄ流又行番，咁我就收起枝筏仔，用枝新小磯竿釣劃仔，釣咗十幾條之後，Ｄ坑簾又黎喇，咁我唯有執埋Ｄ架生鬆人去宵夜好過喇。
番到屋企又係自拍
都係細鱗至老友，幾乎餐餐都整條我嘆吓。
10-11-2011 (農曆十月十五）
話說上晚釣劃仔枝小磯竿比大魚搶咗落海，只怪自己大意，冇挷失手繩就放低枝竿，真係詁佢唔到。今晚再落去睇有冇大魚再黎食細餌至得。
六點幾就落到主場，外面起緊流，Ｄ水流仲係好急，我就喺埋便Ｄ樁位釣吓，一路都未咬過餌，七點半見Ｄ水流慢咗，即刻執架生出外面搏殺。
第一個位冇料到，轉第二個位，落好餌就開埋枝小竿釣劃仔，開開吓竿就見沉底枝筏仔竿頭郁咗幾吓，好似坑廉嘅食法，唔理咩食喇，執起枝竿先，一執起枝竿，竿頭就即時彈起，我就收幾吓繩，嗯!!點解輕哂嘅，心知不妙，條魚升水過橫樁...我就即刻快手再攪六七吓，有感覺喇，條友仔知賴野，狂向腳底衝入，Ｃ喇！呢輪餐餐斷魚都係呢個動作喎，但係今次我唔放繩，改為硬并，一頂就將條魚帶番出黎，跟住使出絕招〝無敵風火輪〞咪埋雙眼，搏命快速收繩，好快就將條魚拉到上水面，唔怪得咁易拉喇，原來係斤零嘅石蚌，費事洗撈箕，一野就掟上岸，解鈎落生籠一腳踢。
跟住轉埋流就改釣劃仔，今晚Ｄ劃都算幾密口架喇，釣多一個鐘度，見好就收，執埋架生去宵夜喇喂！
仲唔比我中番條石蚌。
今晚收穫都算唔錯，學呀邊個話齋，求其當佢三斤。
石蚌聽日清蒸，劃仔就香煎。
9-11-2011 (農曆十月十四)
又係細鱗，仲要比魚搶咗枝竿！嗚.....嗚.....
7-11-2011 (農曆十月十二)
次次去親釣魚都話要釣〝牛屎〞；都以經入季喇！硬係冇一條比我中吓嘅，反而今年Ｄ細鱗釣足兩個月，釣十次有九次中到佢，多數都係斤頭，唔大。好怪個喎！無論我一落場就釣到都好，此終都係一條到尾，真係冇得解，今晚又係喇，六點半開竿，六點三十二分中咗條細鱗，諗住釣成晚都會中多條掛，點知走果時都係得一條，唔通真係夠食就算~
斤頭細鱗同Ｄ雜魚一堆。
5-11-2011 (農曆十月初十)
釣極都有嘅細鱗！
4-11-2011 (農曆十月初九)
都係得幾條魚仔。
1-11-2011 星期二 (農曆十月初六)
晚上七點同大人約埋三公主去食壽司，其間三公主話聽日番黎食飯，咁我就話雪柜冇魚，不如食完壽司我就去揾Ｄ餸攞(咁我又有借口去釣魚喇)！一番到屋企，即刻喺雪柜攞盒千年虾仁，立埋架生就飛車落主場，睇聽晚有冇食神先。
21:00一落到主場，即刻揾Ｄ得食位落餌，因為今次只係用一枝小磯竿仔3.5米，3主2腳，搏中番Ｄ斤頭磅頭都好吖！開頭落餌都係Ｄ坑廉仔食餌，轉個位一落就有野咬，兩吓就拉竿喇，仲好有力添，一抽即中，直攪磅頂輕輕响咗幾吓，我就快速收繩，唔同佢玩，上黎係斤半嘅〝爛鬼星鱸〞(大人話)！轉過位，再落餌又接住，好容易又上水，今次係磅頭細鱗；再將餌掟開Ｄ，中多兩條劃仔，個心諗都夠餸喇掛，師傅偉重比埋兩條金古我添！咁就執埋架生，走人番屋企囉。
都有幾條魚做餸。
魚魚大雜滙。
31-10-2011 (農曆十月初五)
29-10-2011 (農曆十月初三)
釣完烏頭再釣劃仔。
17-10-2011 (農曆九月廿一)
細細地都有兩條玩吓，夠餐餸咁喇。
19-10-2011 (農曆九月廿三)
細鱗當造，半斤十両啱啱好，清蒸一流。
20-10-2011 (農曆九月廿四)
斷條大野，捉番條細。
24-10-2011 (農曆九月廿八)
今晚仲慘！斷夠兩條，好彩執番條半斤十両，都好過冇喇。
25-10-2011 (農曆九月廿九)
呢排黑仔，釣唔到大魚，轉釣Ｄ魚仔，又比我釣番幾條喎，用冬菜蒸劃仔都好好味架。
26-10-2011 (農曆九月三十)
落住雨尼釣，都係得幾條古劃仔，到依家先知，努力係冇回報嘅。
28-10-2011 (農曆十月初二)
我今晚想話釣條牛屎食吓，點知又係得條細鱗；師傅偉用麵包諗住釣金古，反而比佢釣咗兩條斤頭新水牛屎，古唔到Ｄ牛屎唔食蝦，走去食麵包，真係比佢吹到啤..........一聲！
14-10-2011 (農曆九月十八) 生流
去完旅行番黎幾日，個天都係成日落雨，今日卒之見番太陽喇，咁就執好釣魚架生，標落街市買廿蚊蝦，直跴落主場；今次嘅對像魚係牛屎立。
18:00一到釣場，即刻開兩枝竿，一枝釣半水，一枝打沉底；過咗一陣，沉底枝竿有野咬，我輕輕一帶，佢就拉住落，當時梗係抽竿喇，一抽，嗯!!冇料到嘅，收番上黎冇咗隻蝦；再勾過隻落去，又係同對上一次咁冇咗隻蝦，我心諗...一定係細鱗，重唔係大果隻！唔對路喇，呢次我就將隻蝦除咗件衫，用蝦肉做餌，一放落去唔夠廿秒，即刻就有反應，竿頭點咗幾吓，我又輕輕一帶，竿頭就重重咁向下彎，呢次你重唔屎，跟手一抽，結結實實咁中咗，佢知賴野喇，想向樁柱冲，我點會比佢咁做吖，我一企起身，連攪五六吓，帶番佢出黎，一頂一收，唔使廿秒，斤幾細鱗就上到水面喇，落撈箕，入生籠，一腳踢。
21:15見Ｄ流冇咁急，就轉番出Ｄ搏殺，不過都係冇料到，只有一條劃仔，同埋甩咗一口(唔係大野)，跟住流都轉埋，釣半水果隻蝦仲生猛過我，都係唔好磨爛蓆囉，執埋Ｄ架生，去宵夜好過！拜拜
番到屋企，大人瞓咗，又玩自拍；各位有冇睇到張相嘅時間點解咁早嘅，因為去完旅行，唔記得較番本地時差囉。
斤幾細鱗，聽日開飯有着落。
準備劏魚
26-9-2011 (農曆八月廿九)
呢排天氣唔好，落咗幾日雨冇去釣魚，今日天色好番Ｄ，就喺雪柜攞咗Ｄ千年虾仁，17:15我就執埋架生，標落主場釣番轉。
17:45落到去，見有釣友已經中咗條磅頭細鱗，我今次主打對像魚(牛屎)，所以開一枝竿打沉底，落咗餌就同朋友喺度吹水，過咗15分鐘度，枝竿頭微微郁咗幾吓，食得好輕，我心諗，一粒虾仁都食得咁細力，梗係Ｄ石釘烏絲喺度攪攪震，咁我就執起枝竿，輕輕帶起粒餌，嗯!!食餌嘅力明顯大咗喎！呢個時間，朋友講緊乜我都聽唔到，我再帶起Ｄ繩，呢次條魚搶餌喇，我立即往上揚竿，中呀!!好大嘅拉力，大野喎，我快手攪咗幾吓，將條魚抽離底石先，條魚就發力標，頂咗一兩秒見勢色唔對，就比番幾尺佢走吓喇，跟手往上一帶，再攪番六七吓，唔似牛屎喎，條魚再發力，不過今次係向樁柱飛埋去，我冇理由比佢得呈，於是噤實個攪，一呎繩都唔比佢出，不過呢次條魚嘅力度已經減弱，頂咗幾秒我就快速收繩，上到水面，原來係條兩斤細鱗，唔怪之得咁好力喇，跟手朋友同我落撈箕上魚，仲同我影埋相添，將條魚入落好生籠，落餌繼續釣。
好奈冇中過大魚喇，所以零舍開心。
朋友話影多幅保飛。
19:15見Ｄ流水開始慢落黎，我就轉出去大位釣吓，釣咗廿分鐘度就開始有魚訊喇，又係同上一條咁食法，我一抽就中，好輕鬆就上咗黎，係磅頭細鱗。跟住落黎果半個鐘，再中多兩條都係磅頭，其中有一條仲趁我食緊野果陣，比佢拖到響哂攪，好彩又走唔甩！
望吓個錶，咁快就22:00嗱，都係見好就收，魚穫入冰箱，執埋Ｄ架生番屋企囉！
咁早番到屋企，大人未瞓，梗係要向佢耀武揚威喇！
今晚總魚穫，清一色細鱗!!兩斤X1
磅頭X1
十両X2
跟住一次過出哂之前釣嘅魚穫！
1-9-2011 (農曆八月初四)
烏頭都係得一條。
2-9-2011 (農曆八月初五)
大烏頭三斤半今季又新記綠。
15-9-2011 (農曆八月十八)
中番條好過冇。
16-9-2011(農曆八月十九)
得一條斤頭夠兩個人食。
20-9-2011 (農曆八月廿三)
好彩都有條細鱗中吓，開始要玩番沉底喇。
21-9-2011 (農曆八月廿四)
唔知烏頭季係米又到水尾呢。
