話說上晚釣劃仔枝小磯竿比大魚搶咗落海，只怪自己大意，冇挷失手繩就放低枝竿，真係詁佢唔到。今晚再落去睇有冇大魚再黎食細餌至得。
六點幾就落到主場，外面起緊流，Ｄ水流仲係好急，我就喺埋便Ｄ樁位釣吓，一路都未咬過餌，七點半見Ｄ水流慢咗，即刻執架生出外面搏殺。
第一個位冇料到，轉第二個位，落好餌就開埋枝小竿釣劃仔，開開吓竿就見沉底枝筏仔竿頭郁咗幾吓，好似坑廉嘅食法，唔理咩食喇，執起枝竿先，一執起枝竿，竿頭就即時彈起，我就收幾吓繩，嗯!!點解輕哂嘅，心知不妙，條魚升水過橫樁...我就即刻快手再攪六七吓，有感覺喇，條友仔知賴野，狂向腳底衝入，Ｃ喇！呢輪餐餐斷魚都係呢個動作喎，但係今次我唔放繩，改為硬并，一頂就將條魚帶番出黎，跟住使出絕招〝無敵風火輪〞咪埋雙眼，搏命快速收繩，好快就將條魚拉到上水面，唔怪得咁易拉喇，原來係斤零嘅石蚌，費事洗撈箕，一野就掟上岸，解鈎落生籠一腳踢。
跟住轉埋流就改釣劃仔，今晚Ｄ劃都算幾密口架喇，釣多一個鐘度，見好就收，執埋架生去宵夜喇喂！
仲唔比我中番條石蚌。
今晚收穫都算唔錯，學呀邊個話齋，求其當佢三斤。
石蚌聽日清蒸，劃仔就香煎。
9-11-2011 (農曆十月十四)
又係細鱗，仲要比魚搶咗枝竿！嗚.....嗚.....
沒有留言:
張貼留言