22-1-2013 (星期二)
今日乖孫洋洋話要黎探我，咁我就同大人去港島机鐵站接佢，先去銅鑼灣「皇室堡」影果Ｄ卡通人物喎！大人同佢地上咗去，我就喺附近(看車)等佢地。
影完相就黎我屋企喇；一黎到就要招呼乖孫開餐先，佢媽咪喂Ｄ糊仔比洋洋食，呢個小朋友飲奶就嘛嘛地，一食糊仔就食到「答答」聲，仲好攪笑添喎！
你地睇我個樣~
洋洋食飽飽再飲Ｄ水，同我玩咗陣就瞓覺覺豬喇。
到咗晚上，姨甥世文兩公婆都黎一齊食晚飯，佢地第一次見乖孫洋洋。
洋洋應該叫佢做表舅父。
輪都輪到我抱吓乖孫喇掛！
大公主(洋洋嘅大姨媽)又爭住抱。
洋洋老豆放工趕黎，即刻抱番個乖女先。
開餐喇....呢條係「沙巴老虎」，蒸得幾好。
隻炸子雞都唔錯，皮夠脆。
依家Ｄ酒樓嘅甜點心多數都係壽桃，幾好吖。
今餐都幾好，各人都食得好滿足。
公公食飽就有力同洋洋玩喇。
16-1-2013 (農曆十二月初五)
聽日要去退休會食飯冇得釣魚，所以今日點都要去釣番轉架喇。
師傅偉執定虾，而我就過去攞，再直跴主場，一去到開好竿就捐入橋底搏殺，到天都黑齊都冇料到，跟住爬番上黎踎躉頭；落餌冇奈，枝竿頭微微點咗幾吓，跟往一野就拉到響鉸，我攞起枝竿就抽，緊哂手，再攪幾吓，噢!!輕哂~收上黎睇冇咗隻蝦，冇理由架，唔通爆咀！費事諗佢，落餌再釣；唔夠一分鐘，竿頭又係咁點咗幾吓，呢次我就即刻揸住枝竿先，果然又係一吓好大力咁鋤落去，今次唔抽竿睇定Ｄ先，跟住再黎拉竿，呢次我知係乜野喇！係墨魚囉~咁我就慢慢收繩，一路帶到佢上水面，正想落撈箕，點知條老墨好鬼精，一見我飛個撈箕落黎就即刻放口，跟往好似噴水機咁，一噴就走咗，哈哈!!都幾好玩，仲爭Ｄ撈到佢添。
隻蝦比佢咬剩一半，唯有再換過隻蝦落去囉；又釣咗一陣，竿頭又郁喎，唔通隻衰野又走黎攪攪震！我揸起枝竿先，佢又開始發力喇，今次只係拉咗一吓就停咗，咁我就試吓慢慢收繩喇，攪咗幾吓，唔係喎，有野拉住個喎！拉扯咗幾吓，谷鬼氣發力一抽，跟住就係咁攪，好快就上到水面，呢次原來係條鱸仔，見咁細條，費事洗撈箕，成條飛佢上黎，解勾直入冰箱。
呢個時候，師傅偉黎到，佢就喺橋面開竿，落餌冇奈就見佢中條鱸仔，即刻就比捧場客打劫，過咗一陣，我又再中多條鱸仔；時間過得好快，又到十點喇，今晚係咁意釣住兩條先，有魚留番下次釣，跟住齊齊執埋Ｄ架生，走人去宵夜喇。
好彩花鱸仔都有兩條 。
冇大嘅就釣兩條細嘅補數。
14-1-2013 (農曆十二月初三)
自罰停賽幾日，過埋調整期，今日的起心干去釣番轉；五點幾落到主場，見Ｄ流水開始起，嗱嗱聲開好竿，捐入橋底搏殺，可惜釣到天都黑齊，兩枝竿郁都未郁過，唔係喇！Ｄ流咁急，搬番入躉頭位釣好過。
喺躉頭佈好個陣，坐定定等運到；過咗冇奈，枝竿頭跳咗幾吓，我就梗係執起枝竿先喇，條魚又拉咗一吓，跟住就唔郁喎！咩野黎架，心諗唔通又係Ｄ墨魚喺度攪攪震！我輕輕攪咗一吓，佢又拉一吓，不過今次好明顯係魚，咁拉法條魚都唔方大喇，我就輕輕帶起枝竿，咁樣一帶，竿頭就彎哂落去，順勢一抽，中咗~攪咗幾吓，好聚手，原來係大野，不敢怠漫，頂住先，向後行幾步，追返六七吓，再頂！條魚發圍，焗住比番幾呎佢走吓，一見佢收力，機不可失，呢次就唔同佢講笑喇，即刻使出終極一招「無敵風火輪」，一路攪到上水面，見魚即落撈箕，條魚乖乖入袋，上黎睇吓條魚起碼四斤，落埋生扣，再勾隻蝦繼續。
流水開始慢落黎，但都係冇魚訊，釣沉底枝竿毫無動靜，望吓個錶又到十點，見好就收，有魚留番聽日釣，執埋Ｄ架生，去宵夜喇喂！
大人話：「呢Ｄ先至係鱸魚吖嘛 」。
大鱸開始埋番黎喇 。
大花鱸四斤半、66cm。
5-1-2013 (星期六)
噚晚連中三元，今日攞一條去世英度打邊爐。
乖孫洋洋晏晝黎我度飲茶，到晚上一齊去佢表姨媽度打邊爐。
今晚嘅火煱食材有....
象拔蚌。
墨魚膠蟹柳。
脆肉鯇、魚卜。
九節蝦。
雜錦：魚皮餃、魚旦、牛丸、肉丸、炸魚腐、腸仔。
鳳城水餃、菜肉水餃、雲吞。
炸響鈐。
蝦膠。
豬紅、豬皮、腐皮。
花膠、豆卜、齋卜。
竹蔗茅根水。
蘿白粟米豬骨湯底。
呢隻「金剛」喺度等食。
炸魚皮。
「蘭保」怕羞唔埋黎。
珊瑚蚌、貴妃蚌。
仲有肥牛、黑豚豬、鱸魚....。唔講咁多，開餐喇！
人人固住食，洋洋好乖，坐定定喺度睇電視。
食飽飽，大人抱番洋洋同佢玩吓。
洋洋嘅迷人笑容，逗到各人都好開心。
輪到乖孫洋洋開餐喇。
洋洋話：「多謝表姨媽比我地呢餐咁豐富嘅火煱」。
