15-8-2013 (農曆七月初九)
呢場風暴過咗，重新收拾心情，見今晚得閒，大人又過咗去乖孫度，得自己一條冷，咁就買幾蚊麵包落主場，聞吓Ｄ海水味先！
落到去天都未黑，今晚主打金古，慢慢開好竿，坐定定等運到；落餌冇奈，以經有魚試餌，心諗...泥鯭啫，條魚再食幾吓，嗯～金古喎！隻手不其言就執住枝竿，說時遲那時快，條魚以經震震吓咁拉竿，我順勢一抽，即中!!跟手攪幾野，條魚就發惡，標咗兩三吓，拉到個磅頂叮叮聲，我唯有就佢一就再收，感覺都唔係大野，好容易就收到上水面，見頭威頭勢，為揾陣起見，都係落撈箕上水好Ｄ；磅頭金古開齋，入埋生籠即刻落餌繼續，一落即有魚接餌，跟住再連釣三條，但係之後幾個鐘就水靜河飛，一路都係比Ｄ小魚化餌，望吓個錶都十點幾喇，既然過足引，都係執野走人去宵夜好過喇。
番到屋企都係玩自拍；呢兩條大Ｄ，唔夠一斤。
久休復出，好彩成績都唔錯。
26-7-2013 (農曆六月十九)
冇釣幾日魚，今日釣引發作，喺雪柜摷盒千年蝦仁，落主場踎陣，好彩都有幾條魚仔釣吓，慚時止吓咳先。
先中細鱗仔再中叮叮。
22-7-2013 (農曆六月十五)
有幾條趾旗立仔玩吓。
4-7-2013 (農曆五月廿七）
今日見冇乜野做，早少少落到主場，開好竿，都係釣金古，釣到九點幾，一路都係比泥鯭同梳籮化餌，諗住再冇就十點走人；換過口餌，想話飲啖水，見枝竿頭比魚拉咗兩吓，第三吓就拉到竿頭彎哂，我一手執起枝竿，順勢往上一抽，中咗！大野添喎～跟手攪咗兩三吓，條魚就發力鐘頭喇，磅頂即時發出閱耳嘅叮叮聲，頂咗幾秒，即刻追番幾手，條友仔又發力，嗯!! 唔似金古喎，更加唔似烏頭，一定係牛屎！又頂咗四五秒，因為鈎細線幼，所以唔敢同佢硬拚，就得就就，最緊要係唔比佢埋樁，收吓放吓四五轉，最後都比我收到上水面喇，只見銀光一閃，嘩 !! 唔怪之得咁好力喇，真係大黑牛，睇落起碼有三斤，速落撈箕，上咗黎解鈎即入冰箱；夠皮喇！見好就收，執埋Ｄ架生番屋企至食宵夜囉。
好奈冇中過牛屎喇，仲要咁大條添，專登大大聲嘈醒大人，等佢同我影相。
2-7-2013 (農曆五月廿五)
好奈冇去釣魚，Ｄ架生都封哂塵，今日見冇乜野做，六點零鐘落主場踎吓先。
落到去開好竿，一路都係泥鯭化餌，到天開始黑就連泥鯭都走埋，成個鐘毫無魚訊，當悶到發慌嘅時候，竿頭就傳來金古食餌嘅動作，一抽竿就中咗，感覺唔係大野，慢慢收佢上黎，撈箕都費事落，成條飛佢上黎，解鈎落埋生籠，跟手落餌繼續。
一路釣咗成兩個幾鐘，竿頭郁都未郁過，唔係喇，都係執野走人，早Ｄ去宵夜好過喇！
端午節過後第一次開齋 。
8-6-2013 (農曆五月初一)
晏畫打開個雪柜，發覺冇哂貨，17:00就飛車落主場睇有冇運行；落到去有幾個釣友以經喺度釣緊，我話呢幾晚都冇景，我睇今晚都唔例外，其中一個釣友話：「咁今晚邊個釣唔到就唔准走」！冇人反對，只係個個埋頭苦幹；一路釣到20:30幾枝竿都係未發市，特然我發覺自己枝竿傳黎有金古嘅魚訊，食咗三吓，第四吓就震震吓咁拉落去，我快速抽竿，即中！感覺有Ｄ斤両，攪咗幾吓就頂一陣，磅頂又傳出悅耳嘅叮叮聲，當條魚慢落黎我就追番三四吓，條魚唔再鐘水改為高速打圈，咁我梗係就就佢喇，比佢標埋樁就喊都無謂，大約兩分鐘度，上水見魚喇，我左手抽住條魚，右手落撈箕，輕鬆攪掂，解鈎落埋生籠一腳踢，跟住速速落餌繼續，可惜再冇魚訊，而佢地呢只係喺度做大眼仔，得個望字，睇下個錶都成22:00喇，我都冇佢地咁好氣，我有魚可以走得，留番佢地喺度磨爛蓆，一聲拜拜！走人去宵夜喇。
又係斤鬆Ｄ金古 。
3-6-2013 (農曆四月廿五)
食過番尋味，前晚中條斤半大金古，咁今晚一於乘勝追擊；黃昏六點落到主場，開好竿落餌等運到，開頭都係Ｄ泥鯭化餌，到七點左右，Ｄ泥鯭開始收口，即刻就傳黎金古魚訊，一抽即中，攪幾野，知條魚唔係大，直收上水，撈箕都費事落，抽咗上黎落埋生籠，嗱嗱聲落餌繼續，點知跟住落黎就係「享受過程」；跟住釣到十點幾，竿頭震都未震過，都係事候執埋Ｄ架生，走人去宵夜好過喇。
今晚釣得條十両嘅金古 。
1-6-2013 (農曆四月廿三）
連龜幾晚，自罰停賽一星期；今曰都係抱住（享受過程）嘅心情落主場玩吓，點知又有驚喜喎！
落到去一路都係喂泥鯭，到咗七點，Ｄ泥鯭收咗口，條金古就黎搶食，見枝竿頭震震吓咁拉落去，我眼明手快，一抽就中，好聚手！收咗幾吓佢就開始發難，磅頂即時比條魚拉到叮叮聲，知道係大野更加要小心，見佢一慢落黎就就快收幾吓，如是者三四個回合就見魚喇，好大餅，超過一斤有多，小心用撈箕上水，解勾落生籠一腳踢，望望隻勾，嘩!!好彩睇吓唧，隻勾比條魚拉到開咗，真係好險，如果比佢標多一次，睇怕會爆咀收場。呢個時候，師傅偉又黎到，我地一路釣到九點幾，流水都開始轉埋，見再冇魚訊，跟住就收野走人去宵夜喇！
龜咗幾獲，中番條大金古開齋。
