16-9-2013 (農曆八月十二)
今日睇過流水表，晚上七點Ｄ水漲到1.7米，主場
橋底唔落得，即係唔駛預釣金古，咁為有全程玩
沉底。落到主場開兩枝竿，一長一短，跟住坐定
定等運到，坐咗成兩個鐘，兩枝竿郁都未郁過，
谷鬼氣枝長竿將餌掟遠Ｄ，果然有較，即刻有
魚食餌，拉咗幾野我就 抽竿，中咗收埋黎原來係
劃仔，都好有得過引，再落餌又中，跟住又靜哂
；呢個時候筏仔竿頭有魚拉喇，我即刻執起枝竿
，當佢搶餌果吓就抽，即中，開頭仲以為係細鱗
，收到上水面至知係紅鰽，見條魚唔大，費事洗
撈箕，成條彈佢上黎，都唔錯喎有磅頭，跟住釣
多條劃就收工喇，須然釣得幾條魚仔，不過好過
又係金古吖，起碼有Ｄ新意！
沉底中紅魚磅頭。
劃仔都開始埋黎喇 ！
14-9-2013 (農曆八月初十)
乖孫洋洋噚晚番咗佢屋企，今日又可以去釣魚喇；喺雪柜摷番盒千年蝦仁，再落商場買半磅方包，18:30落到主場，時間啱啱好，開枝竿釣金古先，流水開始轉落，下餌唔夠廿分鐘，金古魚訊已經傳來，食咗幾野，跟住就震震吓咁拉落去，一抽即中，有些少反抗能力，頭威頭勢唔同佢玩，兩三吓手勢就收到上水面，揾陣Ｄ撈箕上水，解鈎入生籠，速速再落餌；一落就有魚接餌喇，不過食得好精，吓吓都唔到釣，食到第三口餌先比我抽中，上黎都係同對上一條差唔多大，跟住再落餌就靜哂，Ｄ落流行急咗，我就轉釣組，用虾肉去釣吓沉底；我知今晚嘅落流係得兩個鐘，所以利用呢段時間搏吓睇有冇符碌，點知都係得Ｄ小魚化餌；好快又開始行大流喇，我又轉番釣金古，運用呢個策畧係對嘅！跟手起多兩條金古收工，23:10執野走人去宵夜喇。
呢水金古都算有番Ｄ斤両 。
條條都有斤頭 。
3-9-2013 (農曆七月廿八）
今晚天氣都算唔錯，橫掂冇乜世藝，喺雪柜攞埋
盒千年虾仁，飛車落主場睇有冇運行至得。落到
主場開兩枝竿，一長一短，都係虾肉打沉底；Ｄ
流都幾急吓，本應搬入Ｄ作釣，講到尾都係一個
懶字，同埋坐喺出面會舒服Ｄ，仲風涼水冷添；
經過噚日大雷大雨，今晚仲有少少秋意，坐坐吓
仲覺得凍添喎！
過咗個幾鐘，Ｄ流開始慢落黎，筏仔竿頭比野拉
咗一吓，嗯!!黎料囉喎～我執起枝竿，輕輕往上
帶起，條魚就搶餌喇！一抽即中，有輕微嘅反抗
，一頂一收，好順咁就收到上水面，見係磅頭細
鱗，費事落撈箕，一野就飛佢上黎，解鈎落生籠
，速速落餌繼續釣；跟住落黎仲比我起多兩條細
鱗添。
一路釣到轉埋流就再冇魚訊喇，望吓個錶又到十
點，目標以達，執野走人去宵夜都係時候囉。
今晚中目標魚細鱗 。
細鱗條條都唔過斤。
2-9-2013 (農曆七月廿七)
今晚以為好天，點知喺八點就大雷大雨，仲要落咗成個幾鐘，落吓停吓，等我走幾次鬼，好彩到停咗雨，出番去釣咗陣就中條半斤十両雞雞，可惜繼續落去就一咀都冇，釣到十一點就鬆人去宵夜喇。
有條雞魚釣吓都好過冇 。
17-8-2013 （農曆七月十一）
昨晚沉底冇料到，條氣唔順，今晚一於黎多獲；六點幾落到主場，開竿先釣金古，釣到八點幾已經中咗四條，有兩條唔夠秤回歸大海，等佢大Ｄ先黎揾我；跟住轉釣沉底，釣咗個幾鐘連魚仔都冇條咬吓，得Ｄ蟹仔喺度化餌，呢個時候，Ｄ流水都開始轉喇，心諗等流水轉埋就較腳，點知都未諗完，枝竿以經比野拉到彎哂，一抽即中，收幾手知唔係大野，坐番低慢慢收佢上黎，原來係磅頭叮叮，跟手解鈎入生籠，落餌繼續；呢個時候，流水行快咗少少，竿頭又有魚訊囉喎，睇住佢慢慢拉落去，莫非係最討厭嘅泥婆!!乜都好喇，抽咗先至講，一抽起枝竿，條魚就發力，我就噤實個鉸，頂佢一陣睇定Ｄ先，跟手攪咗七八吓，條魚再發力，冇用嘅，我已經知呢條多數係細鱗，仲唔係大果隻，輕鬆頂吓收吓，幾個回合就見魚喇，冇詁錯，真係細鱗，即落撈箕上水，解鈎直入冰箱；有魚交差，加上時候都唔早，流水又行急咗，都係執野走人去宵夜好過喇。
大人過咗乖孫度未番，影張威水相比佢喺果邊電腦睇。
16-8-2013 (農曆七月初十）
尋晚釣金古釣得咁過引，今晚一於再去過，經過街市順手執多廿蚊虾，睇吓有冇細鱗釣吓至得。
六點半落到主場，時間啱啱好，梗係主打金古先喇，果然冇詁錯，又係喺個天半光暗嘅時間，Ｄ金古就開口，一連釣咗三條，天一黑齊，金古就收哂口，都係唔好學尋晚咁磨爛蓆喇，改牌頭玩吓沉底好過。
嗱嗱聲開過Ｄ架生，攞Ｄ蝦出黎搣蝦肉做餌，沉底睇有冇運行至得，卒之釣咗兩個鐘，中得條沙立仔；時間過得真快，望吓個錶，又十點幾喇，流水都起埋，都係執野走人去宵夜嘅時候囉！
冇你咁好氣，今晚再中多幾條金古 。
15-8-2013 (農曆七月初九)
呢場風暴過咗，重新收拾心情，見今晚得閒，大人又過咗去乖孫度，得自己一條冷，咁就買幾蚊麵包落主場，聞吓Ｄ海水味先！
落到去天都未黑，今晚主打金古，慢慢開好竿，坐定定等運到；落餌冇奈，以經有魚試餌，心諗...泥鯭啫，條魚再食幾吓，嗯～金古喎！隻手不其言就執住枝竿，說時遲那時快，條魚以經震震吓咁拉竿，我順勢一抽，即中!!跟手攪幾野，條魚就發惡，標咗兩三吓，拉到個磅頂叮叮聲，我唯有就佢一就再收，感覺都唔係大野，好容易就收到上水面，見頭威頭勢，為揾陣起見，都係落撈箕上水好Ｄ；磅頭金古開齋，入埋生籠即刻落餌繼續，一落即有魚接餌，跟住再連釣三條，但係之後幾個鐘就水靜河飛，一路都係比Ｄ小魚化餌，望吓個錶都十點幾喇，既然過足引，都係執野走人去宵夜好過喇。
番到屋企都係玩自拍；呢兩條大Ｄ，唔夠一斤。
久休復出，好彩成績都唔錯。
