安慰獎

2-7-2013  (農曆五月廿五)
好奈冇去釣魚，Ｄ架生都封哂塵，今日見冇乜野做，六點零鐘落主場踎吓先。
落到去開好竿，一路都係泥鯭化餌，到天開始黑就連泥鯭都走埋，成個鐘毫無魚訊，當悶到發慌嘅時候，竿頭就傳來金古食餌嘅動作，一抽竿就中咗，感覺唔係大野，慢慢收佢上黎，撈箕都費事落，成條飛佢上黎，解鈎落埋生籠，跟手落餌繼續。
一路釣咗成兩個幾鐘，竿頭郁都未郁過，唔係喇，都係執野走人，早Ｄ去宵夜好過喇！

端午節過後第一次開齋 。

半斤十両都好過冇 。

小金古半斤十両夠我自己食。

釣唔到唔准走

8-6-2013  (農曆五月初一)
晏畫打開個雪柜，發覺冇哂貨，17:00就飛車落主場睇有冇運行；落到去有幾個釣友以經喺度釣緊，我話呢幾晚都冇景，我睇今晚都唔例外，其中一個釣友話：「咁今晚邊個釣唔到就唔准走」！冇人反對，只係個個埋頭苦幹；一路釣到20:30幾枝竿都係未發市，特然我發覺自己枝竿傳黎有金古嘅魚訊，食咗三吓，第四吓就震震吓咁拉落去，我快速抽竿，即中！感覺有Ｄ斤両，攪咗幾吓就頂一陣，磅頂又傳出悅耳嘅叮叮聲，當條魚慢落黎我就追番三四吓，條魚唔再鐘水改為高速打圈，咁我梗係就就佢喇，比佢標埋樁就喊都無謂，大約兩分鐘度，上水見魚喇，我左手抽住條魚，右手落撈箕，輕鬆攪掂，解鈎落埋生籠一腳踢，跟住速速落餌繼續，可惜再冇魚訊，而佢地呢只係喺度做大眼仔，得個望字，睇下個錶都成22:00喇，我都冇佢地咁好氣，我有魚可以走得，留番佢地喺度磨爛蓆，一聲拜拜！走人去宵夜喇。

又係斤鬆Ｄ金古 。

金古斤零夠哂肥美 。

十両都收貨

3-6-2013  (農曆四月廿五)
食過番尋味，前晚中條斤半大金古，咁今晚一於乘勝追擊；黃昏六點落到主場，開好竿落餌等運到，開頭都係Ｄ泥鯭化餌，到七點左右，Ｄ泥鯭開始收口，即刻就傳黎金古魚訊，一抽即中，攪幾野，知條魚唔係大，直收上水，撈箕都費事落，抽咗上黎落埋生籠，嗱嗱聲落餌繼續，點知跟住落黎就係「享受過程」；跟住釣到十點幾，竿頭震都未震過，都係事候執埋Ｄ架生，走人去宵夜好過喇。

今晚釣得條十両嘅金古 。

唔使龜都算好彩 。

用條粗野黎開齋

1-6-2013  (農曆四月廿三）
連龜幾晚，自罰停賽一星期；今曰都係抱住（享受過程）嘅心情落主場玩吓，點知又有驚喜喎！
落到去一路都係喂泥鯭，到咗七點，Ｄ泥鯭收咗口，條金古就黎搶食，見枝竿頭震震吓咁拉落去，我眼明手快，一抽就中，好聚手！收咗幾吓佢就開始發難，磅頂即時比條魚拉到叮叮聲，知道係大野更加要小心，見佢一慢落黎就就快收幾吓，如是者三四個回合就見魚喇，好大餅，超過一斤有多，小心用撈箕上水，解勾落生籠一腳踢，望望隻勾，嘩!!好彩睇吓唧，隻勾比條魚拉到開咗，真係好險，如果比佢標多一次，睇怕會爆咀收場。呢個時候，師傅偉又黎到，我地一路釣到九點幾，流水都開始轉埋，見再冇魚訊，跟住就收野走人去宵夜喇！

龜咗幾獲，中番條大金古開齋。

釣到粗野，又有得向大人揚威耀武。

斤半金古夠開餐喇。

到時到候先開口

16-5-2013  (農曆四月初七）
Ｄ金古咁夜先開口，今晚就夜少少落主場，點知都要十一點幾先中番條。

有條磅頭金古都唔錯 ～

金古磅頭 。

17-5-2013  (農曆四月初八）
今晚索性就成十點幾先落主場，落到去流水啱啱慢咗嗱嗱聲開竿落餌，卒之Ｄ金古都係要到十一點幾十二點先肯開口，今次好彩，連中兩條。

又中兩條金古 。

金古磅頭斤頭各一 。

中開又中

15-5-2013  (農曆四月初六）
經過兩晚磨到成十一點先中魚嘅教訓，今晚學精咗喇，我成九點先落到主場，流水起到澎澎聲，着埋頭灯，慢慢開好竿，搵番個得食位落餌，一路都係得個釣字，又到十一點Ｄ流慢番，開始有魚訊，換到第三口餌，一抽就中，攪幾吓就知係大野，磅頂比條友仔拉到叮叮聲，大戰咗幾個回合，條魚投降，條金古睇落都過斤喎，安全起見就用撈箕上水，入埋生籠，落餌繼續；過咗幾個字就再中多條斤頭金古，時間唔早，上水即入冰箱，執埋架生走人，有魚留番聽日釣。

中斤半金古又要向大人耀武揚威一番。

連起兩條唔開心就假喇。

金古兩條斤頭同斤半。

卒之有條過斤喇

14-5-2013  (農曆四月初五)
 早早落主場都冇用，都係要磨到成十一點先中魚，好彩呢條金古都有斤零重，磨爛蓆都磨得有價值。

卒之比我中番條大Ｄ嘅金古喇。

都好釣番條斤零嘅金古。