22-3-2009(農曆二月廿六日)
星期日係屋企冇街去，知道師傅偉係主場玩緊，我就執架生落去一於捉大鱸，報我炸竿之仇。
落到去都六點，偉哥先前已中一條三斤花鱸，我就立即開竿，重火力集中捉大鱸，到七點半都冇料到，偉哥再中一條兩斤小花鱸，而我等到十點都未見鱸蹤，可能條大鱸炸咗我竿之後知史啦，唔敢浦頭。
好！等我保留實力，第日再戰大鱸！執野走人。
呢條領仔鱸係師傅偉中嘅第二條。
2009年3月22日 星期日
2009年3月20日 星期五
炸竿走魚激史禾，以後唔貪靚~~#
20-3-2009(農曆二月廿四日)
今日早餐係餐旦冶煎底同埋奶茶，食飽就同Ｄ魚呀龜呀換水，再餵埋糧，因為約咗師傅偉釣魚，就攞起架生，落街市買虾，然後向北角進發，到咗主場佢又剛到，King咗幾句就開竿，佢落橋底，我就係梯口位。
釣左大約兩粒鐘，完全冇動靜，八點偉哥有事走先，我就換過隻生猛Ｄ嘅虾落去，唔夠一分鐘隻虾狂跳，有料到，左手提起枝可能中第四條鱸嘅路亞王子，右手準備收繩，一抽，中呀，頂吓收吓，已見魚影，條友仔睇落都有五六野，我左手拑實個鉸，右手準備攞撈箕點知條鱸魚好似睇到咁，特然開尾向樁內衝去，我就拿拿聲放低枝撈箕同佢C過，可能對枝竿太有信心，所以一Ｄ都冇放繩，係咁頂係咁頂，特然聽到棘耳嘅〝啪〞一聲！噢!!炸竿！跟住條繩都輕哂，連魚都走埋，即刻O哂咀，
執野走人，番屋企吔飯好過。
執野走人，番屋企吔飯好過。
早餐係餐肉旦三文冶煎底。
就係咁樣炸法。
欲哭無淚。
枝竿外表靚唔代表佢係實用(以後都記住)。
2009年3月18日 星期三
2009年3月16日 星期一
花鱸魚橫行北角，白果魚神有着落
16-3-2009(農曆二月二十)生流
今日起身食咗個雞尾包，飲杯大奶茶，睇有乜野做，都係做釣魚啦！落到北角都三點幾，開好竿又係等，但係呢次等咗五分鐘就有魚咬，好快上水，兩斤花鱸，再落再等，其間師傅偉又黎到，一落就中魚成三斤幾，真好嘢，呢次我再等咗五個鐘，路亞王子枝竿頭特然一野就彎哂，毫無先紹，我抽起枝竿，拑鉸拑到出煙，知道係大野，就唔敢放鬆，經幾個回合，大鱸乖乖入撈箕上水，詁計條鱸超過五斤，生扣都費事落，執野走人，去潤記整番碗豬膶粥，一碟菜遠牛河，食飽飽，跟住番屋企啦喂。
今年第一次中大花鱸六斤半。
雙喜臨門。
2009年3月14日 星期六
磨爛蓆先至中條衰鱸
14-3-2009(農曆二月十八)
今日成點幾先起身，食咗早餐又唔知有乜野做，都係落主場坐吓。是日五點幾轉流，所以落到去係四點半，黑仔章己經喺度釣緊，放好架生準備開竿，黑仔大叫撈箕，原來佢中左條大鱸，我就順手同佢撈埋上黎，睇落都有四五斤，之前佢已經中左條三四斤嘅鱸，合共兩條。我見咁好魚，就即刻開竿，驚死執輸，點知由樁底釣到橋面，成幾粒鐘只係斷過一口沉底，。此時黑仔走咗，得番我一個係度磨爛蓆，磨到十一點幾已經冇哂餌，得番釣緊果兩枝竿有餌，心諗釣埋就走，點知努力係有回報嘅！新果枝路亞竿有野咬，經一兩個回合就將條花鱸撈箕上水，前後唔使四十秒，好過冇，比我磨番條鱸，跟住收野走人，相都冇心情影，番到屋企至同佢影張昇盤大頭相就算數。
2009年3月12日 星期四
起番條兩斤半青班比大人食吓先！
12-3-2009(農曆二月十六)生流
今日十二點幾起床，整杯奶茶，食兩件澳門鉅記杏仁餅就當早餐，上網睇下流水表，四點轉流，好，執野落去釣陣魚先。
落到北角都三點幾，得我一個人，見咁早，仲落緊流，就捐入橋底睇有冇景先。
開好前日新買果枝筏仔打沉底，再開多枝釣鱸；時間又過咗個幾鐘，又開始起流，換隻蝦落去睇吓點，釣鱸隻虾依然咁生猛，特然沉底果枝新竿竿頭有輕微魚訊，我詁都係黑立攪攪震，執起枝竿準備，說時遲那時快，個鉸以經出緊繩，即刻拑住個鉸，唔比佢繼續出繩，再向上一抽，中呀！好強嘅拉力，佢已經飛埋樁，五號主碳線都烈烈聲，我唔敢同佢鬥，比多幾呎佢走吓，等佢已為走甩咗慢落黎，我就立即收繩，但都感覺Hi住條樁，小心翼翼一收一放，足足兩三次，條魚卒之游番出黎喇，我隻手都頂到冇力，就用肚將竿尾頂住黎收，頂呀，收呀，就上到水面，見係黃色班點嘅物体，嘩！大青班呀，立即小心攞撈箕將條青班上水，嘩！好險，個鈎只係鈎住咀唇邊，正話如果大力Ｄ拉都會爆咀，真係好彩，有食神。
索哂氣，休息咗一陣就同佢影相，跟住落生扣，再落餌等運到。又過咗一粒鐘，天色以暗，收拾好釣具及清理好現場，懷住輕鬆愉快嘅心情，揸車番屋企開餐啦喂。
(後記)即刻叫埋三位公主番黎開青班宴。
成年幾未中過嘅班班。
開心到震！
睇吓，好險，鈎住咀唇邊咋。
落咗生扣，等佢游吓水先。
番到屋企叫大人同我地影相。
昇盤比例照當然唔小得。
後得卜友釣魚男老弟証實，呢條係叫【花鬼班】，比青班名貴同好食咁話！
2009年3月11日 星期三
新買嘅路亞竿同埋筏仔
11-3-2009 陰天
今日十一點半起床，食咗大人預備比我嘅波蘿油做早餐，就遊吓BLOG河，醒起尋日新買果兩枝竿，就攞出黎睇吓，順便同佢地影番張相，果枝路亞王子橙紅色，好搶眼。枝筏仔本來唔係買呢枝，我想買紅色速攻150 ST，點之將頭蕊拉出來，見到Ｄ佳唔正，佢店內又冇新貨，只好買枝綠色速攻 135 ST 。
影全相
如果枝筏仔係紅色果枝就正。
睇佢地幾時開齋。
2009年3月9日 星期一
點解Ｄ牛牛禁快大既？
9-3-2009 (農曆二月十三)
今日瞓醒，大人買咗車仔麵比我做早餐，食完野，睇陣電視，釣魚蟲又咬身，即刻起程往主場，四點半到咗釣場，見Uncle(釣友)喺我前日中魚個位釣緊，我就去另一個位落竿，一路都冇魚訊。六點半師傅偉知風聲又黎到釣鱸。
到接近七點，我同呀海吹緊水，眼尾睇到枝竿頭郁郁下，立即攞起之竿，擺起個作戰狀態，話口未完，(搶餌)，呀海狂呼中魚，此時我已將筏仔一抽，開頭狂收幾野，死喇點解唔郁既？唔通鈎石！停頓左一秒，條友仔特然發難想過樁，我用最快嘅速度攪左六七下，但條魚冇軟到，繼續發力向下標，唔~大野，我更加小心，將拑住橫鉸隻手指鬆一鬆，比佢行幾尺，條友仔以為贏左，放慢泳速，我心諗，你重唔死，我特然往上一抽，將魚頭帶向上，攪幾野，再向左收右頂，咁樣條魚冇哂方向感，即刻冇力軟哂，水面銀光一閃，就見一條超過三斤嘅黑立，乖乖的反肚，跟住呀海幫我落撈箕，將條魚上水，梗係要影相喇。落好生扣比佢暢泳一會。
再磨多粒幾鐘，我同其他人都冇乜料到，都係時候清理好現場，執埋架生走人，番屋企吔飯。
即刻影張形仔相先。
落埋生扣比佢游下水。
剛剛有架大郵輪經過，唔知叫咩號？
直得一幅勝利手勢嘅相。
再黎一幅沙龍。
昇盤相一定唔少得。
2009年3月6日 星期五
次次中黑牛，金融海潚都唔使愁
6-3-2009 (農曆二月初十)
今日個天時陰時落微雨，本來冇打算去釣魚，係度睇睇吓呀Ben哥Ｄ外國釣大班，咁就心癢癢拿起架生出發，買好餌落到主場都係四點幾，見開始轉流就拿拿林開竿，兩枝沉底一枝釣鱸。
過左成兩個鐘都冇料到，我就轉下釣位，放咗落去大約十分鐘度，我喺度同人吹緊水，見竿頭慢慢拉下，好似蟹拖緊餌咁樣，我冇理佢，特然響鉸飛快出絲，一手提起枝筏仔，一手收繩，點知條友仔都好精飛快過樁，我心寒一寒即刻放幾手繩比佢，果然中計，順手帶番佢出黎，跟住使出天外飛仙劍法，一抽一收好容易將條友仔帶上水面，再等佢飲多兩啖水先，哈哈！反肚，見有Ｄ斤両就落撈箕上水，跟住影相、落生扣，再落餌。
再釣多個幾鍾都係冇乜動靜，釣鱸果隻虾仲生猛過我，個天又開始落雨，歡樂時光過得特別快，又時候講拜拜啦！清理好釣場就攞埋戰利品回家食飯。
形仔唔形仔呀
次次釣到大黑牛，金融海潚都唔使愁！
釣場一景
番到屋企梗係要叫大人同我影張沙龍先
過左磅係兩斤五，都唔錯。
訂閱：
文章 (Atom)