31-1-2012 (農曆正月初九)
今日見得閒，就去魚餌店執幾隻蝦仔，落主場玩吓！
19:15落到去，見冇勿流，慢慢開好竿，一枝沉底搏符碌，一枝梗係半水釣鱸喇！
釣咗個幾鐘，換咗三隻蝦，半水枝竿先至有小小魚訊，條衰鱸好似怕羞咁，輕輕拉吓拉吓，咁我為有收緊少少Ｄ繩，佢又拉一拉，我又收一收，如事者過咗十幾廿秒，見條魚唔發力，咁我就收小小繩跟住一抽，中咗!!喺佢毫無還擊底下，再收幾吓就上到水面，頭威頭勢，梗係撈箕上水喇，條鱸食到入哂扣都唔郁，都唔知佢係米鱸尼嘅！跟住剪繩入埋生籠，再挷過勾繼續釣。
又過咗個幾鐘，一路都冇動靜，沉底果枝剩係比條石鳅食過一次，其餘時間郁都未郁過，我真係懷疑海底有冇魚！諗諗吓都係唔好同佢癲喇，執野早Ｄ走人去宵夜好過喇。
今晚釣番條大少少嘅鱸仔食吓。
斤鬆Ｄ都幾好食架。
28-1-2012 (農曆正月初六)
首先喺度恭喜大家發財先，由年頭爆釣到年尾，想果樣得果樣，身體健康，萬事勝意，恭喜恭喜！
龍年第一炮！師傅偉約我今晚釣魚，18:30同佢一齊去買蝦，跟住直跴主場。
一到埗就即刻鬥快開竿(唔知喺米奈冇釣魚呢)，今晚我地嘅目標魚都係花鱸，一人開咗兩枝竿，揾個靚位落好餌，跟住坐低吹吓冇釣魚呢幾日嘅趣事，吹吹吓佢枝竿響鉸喎，跟手一抽，攪幾手，佢話:「嗯!!輕哂嘅」！唔係嘛，第一條魚揾Ｄ咁野玩，講得黎我見有條鱸飛上水面打水，哈哈!!條魚快過佢收繩嘅速道，上道水面喇！呢個時候先見師傅偉快攪多幾吓控住條魚，我梗係揸定撈箕喇，龍年第一條魚我都有份上吖嘛，哈哈!!上咗黎，落埋生籠就繼續吹水。
過咗個幾鐘，呢次輪到我枝竿響鉸喇，不過當我攞起枝竿果時，又唔覺有魚訊喎，停咗一陣，我就輕輕帶起條繩先至開始感到有少少拉力，再收緊Ｄ，咬住喇!!一抽帶攪，好容易又上水，都係磅頭花鱸，今次直入冰箱，因為又夠鐘喇，見大家都開咗齋，跟住收埋Ｄ架生，齊齊開開心心去宵夜喇！
龍年第一炮中雙鱸好嘅開始
18-1-2012 (農曆十二月廿五)
呢排唔知點解，Ｄ魚好似番哂鄉下團年咁樣，個主場靜到不得了，今晚都唔例外由19:00開始釣，到22:30都係得一口，再磨落去都係冇架喇，享受完過程，早Ｄ去宵夜好過喇！
百鳥朝凰
以下係前兩次嘅釣穫，都係好疏口，又係享受過程。
13-1-2012(農曆十二月二十)
一双双一對對
14-1-2012(農曆十二月廿一)
又係一條到尾
10-1-2012 (農曆十二月十七)
今晚九點幾先轉流，所以20:00先出發釣魚；落到主場開好竿，今次又係兩枝釣鱸，開多枝釣番沉底睇有冇符碌搏吓。
擺好個陣，攪惦晒就坐定定等運到，Ｄ流開始轉果陣，其中一枝釣鱸嘅竿郁咗幾吓，我就梗係攞番起枝竿喇，竿頭一野沉落去，我就一抽，中咗！跟手想話快速攪幾吓，點知個鉸好緊，攪極都好難攪，條魚就搏命鐘，想話轉用手收繩，一不留神，唔知點樣，枝頭灯比我整甩咗，啪一聲跌落地，跟住仲碌埋落海添，唔理得咁多喇，收咗條魚上黎先，收到上水面見係斤零重嘅鱸仔，一手就掟佢上岸，解勾落生籠，跟住去睇吓個鉸做乜鬼野攪唔郁，檢查後睇怕都要等番屋企至整喇！
好彩我重有〝事啤〞頭燈，唔使黑嘛嘛；跟住等咗好奈，沉底枝竿一Ｄ都未郁過，仲有釣鱸果枝只係有一次蝦跳嘅感覺。
又到23:00！Ｄ流仲係好急吓，都係唔好磨爛蓆，執野走人去宵夜好過喇！
呢條正衰鱸，攪到我心愛枝頭燈都跌埋落海，聽日食咗你落肚。
9-1-2012 (農曆十二月十六)
前晚執靚咗個釣位，今晚落去試吓掂唔惦先；去魚餌店買咗廿隻蝦就直跴主場喇。
19:30落到去見Ｄ流慢咗，即刻開兩枝竿全釣鱸，落咗餌大約十五分鐘度，其中一枝竿有魚訊，我就執起枝竿，感覺好輕力，條魚都唔方大喇，等佢拉到較為明顯果吓我就抽竿，好易就中咗，當我收緊上黎果時，另外一枝竿響鉸添，咁我為有將收緊條魚上黎果枝竿個鉸，將個鬆繩制關閉，跟手插番落個竿架上面，嗱嗱聲衝埋去執起響鉸果枝竿，一攞起就知呢條魚比較大Ｄ，有Ｄ力水，一抽就中，條魚標咗幾吓就比我控制番，唔同佢玩喇，好快就將佢收上水面，見都有兩斤，即落撈箕上水，放低咗條魚，霖霖聲再攞番之前中魚果枝竿，好彩條鱸仔冇乜力，好快又收埋佢上黎，攪咗一輪，氣都喘埋，抖咗一陣，將兩條魚放埋落生籠，再落餌繼續！
20:10呢個時候，師傅偉又到咗，佢話噚日晏晝都有黎，仲釣咗兩條斤零嘅鱸仔添，話口未完，我有一枝竿又響鉸喇，一抽又中，收到上水面都係兩斤左右嘅花鱸，呢次師傅偉順便同我撈埋條魚，真係唔該哂佢。
跟住两個人一路釣到21:45，成個幾鐘，四枝竿郁都未郁過，師傅偉話好冇引要走先，呢頭佢準備開車，果頭我枝竿又中魚喇，佢真係黑仔，上黎都係鱸仔，再釣多陣，又中多條；望望個錶，咁快又十點半嗱，見好就收，執埋架生，收好魚穫，早Ｄ去宵夜好過喇！
番到屋企，都係要自拍；兩條兩斤嘅鱸魚，可以拎起黎影喇掛！
須然今晚收穫都唔錯，但係玩得三四個鐘，都好似唔係幾夠皮咁。
7-1-2012 (農曆十二月十四)
今晚都唔例外，一早食咗飯就落主場，喺魚餌店執咗廿 幾隻蝦(37蚊)，預兩個人釣，如果喺街市買果Ｄ簊圍蝦 ，一斤要成70蚊，廿隻起碼要五六十蚊，都係魚餌店果 Ｄ低買。
19:15落到去，流水啱啱開始減慢，即刻揾個得食位開 竿，嗱嗱聲落餌，諗住好似噚晚咁一落就中，點知釣到 轉流Ｄ魚都唔肯開口，呢個時候師傅偉又黎到，佢就喺 另外個得食位度落餌；不過大家都係呆等。
21:20終於我中第一條鱸仔喇，收到上水面果陣，又唔 小心勾住咗Ｄ棚網，攪咗一輪先至撈番條魚；過咗冇奈 再中第二條，呢次又係勾網，好彩水退，有個釣友喺棚 架下面釣緊，咁佢就同我解開勾住條魚Ｄ鐵網，條魚先 至出番黎，上水入埋冰箱，呢個時候，師傅偉喺埋便中 番條唔使龜，再喺幾呎水中多條鱸B，我就中第三條喇 ，可惜又勾網，呢次冇咁好彩喇，攪得奈比條魚爆咀走 咗，谷鬼氣爬落棚底，將Ｄ鐵網凸出嘅部份，屈番哂入 去，等下次中魚時唔使咁論盡。
時間過得好快，又係時候講拜拜，我地執埋Ｄ架生，又 去宵夜喇！
幾經辛苦先釣到四條花鱸仔。
6-1-2012 (農曆十二月十三)
今晚又同師傅偉落主場儍吓，18:30我先到，今次開番兩枝竿，除咗釣鱸，再開枝沉底搏符碌！
好快就擺好個陣，落哂餌諗往坐番陣，點知見釣鱸果枝竿已經有魚訊喇，拎起枝竿等咗幾秒，一抽就中，上水係斤幾嘅花鱸仔，再落餌唔夠十呎，又有魚接餌，好快又攪掂埋佢，詁唔到咁快就中咗兩條，跟住師傅偉黎到，釣咗一陣佢又中魚，之後梅花間竹，輪流起魚，釣到23:00就執野走人去宵夜喇。
今晚有六條花鱸仔同三條石狗。
5-1-2012 (農曆十二月十二)
今晚霖出門口去釣魚果時，望出窗外見落緊雨，想話釣少晚，呢個時候師傅偉來電，問我今晚咁凍，夠唔夠胆落去釣魚，我梗係唔衰得，一口答應喇，即刻標出門口，仲唔使去買蝦添，因為師傅偉買咗，跟住落停車場攞車，直飛主場。
落到去師傅偉以經起咗兩條鱸，我見Ｄ鱸開口就嗱嗱聲開竿落餌；呢幾次都係剩釣鱸，所以只係開一枝竿。
落餌唔夠十分鐘就中第一條，再落餌又中，不過呢條有Ｄ麻煩，條魚標咗埋Ｄ棚架度勾住，好彩經一輪收放，佢又游番出黎，收上黎、落生籠、再落餌，呢次就冇魚咬喇，師傅偉聽日要做，所以走先，我見Ｄ流水咁正，就留低再釣多陣，佢走咗冇奈，我就收隻蝦上黎，睇使唔使換過隻落去，點知收到離水面唔夠三呎時，見有一條銀影，狠狠咁一啖就趙落隻蝦度，咁佢嘅下場梗係比我釣埋上黎喇，跟住再落餌，不過Ｄ魚食得好精，一連偷咗我兩隻蝦食，但係卒知都比我釣到佢上黎，原來係條半斤都唔夠嘅鱸B。
望吓個錶，又係時候結速今晚嘅釣程喇，執埋Ｄ架生，放好Ｄ魚穫入冰箱，返屋企食宵夜喇(今晚嘅宵夜係餐肉旦麵、奶茶)！
晚晚都有幾條中吓。
同場加影
4-1-2012 (農曆十二月十一)
鱸仔幾條都唔錯。
2-1-2012 (農曆十二月初九)
今晚又執拾零隻虾落主場釣鱸，初時釣吓沉底，睇有冇符碌！半水枝鱸魚竿就梗有落喇；由快流一路釣到慢流都冇一咀似樣Ｄ嘅魚訊，咁我就收番起枝釣沉底嘅竿，剩係釣鱸，仲要去番噚晚個得食位果度。
過到去開好檔灘，跟手就落餌，唔夠兩分鐘，即中第一條，果時仲係行緊落流，點知再落餌要等咗成個鐘先至再中第二條，跟住再中埋第三同第四條，都係用咗十幾分鐘，落最後一口餌，等咗成五分鐘都冇魚咬，諗住收番上黎準備走人，點知隻蝦收到上水面，特然有條黑影由水底撲上黎，一口就擔落隻蝦度，我自然嘅反應就係抽竿喇，又中!!攪都唔使攪，一野就掟埋上岸，跟住真係執野走人去宵夜喇！
今季Ｄ小鱸都算大造。
1-1-2012 (農曆十二月初八)
噚晚釣得咁過引，意尤未盡，今晚又執廿零蚊蝦仔落主場玩吓；落到去見以經有兩個釣友喺度釣緊，我19:30開始落餌，差唔多釣咗兩三個鐘，無論沉底又好、半水又好，三枝竿郁都未郁過，心諗唔通今年第一日要打龜。
唔得！一於去另外Ｄ釣位搏吓，睇吓有冇魚先。
呢次我先收起兩枝沉底唔釣，留番一枝剩係釣鱸，勾好隻蝦放落去，通常都係釣十六七呎，點知隻蝦落到十呎左右，以經有魚搶餌喇，一兩吓動作就拉竿，我順手一抽，即中!!快手收佢上黎，斤零兩斤魚，費事落撈箕，一野掟佢上黎，跟手解勾即入冰箱，嗱嗱聲勾過隻蝦，再放落去；一放落去又有魚接餌，再中！如是者一連就中咗四條！
大戰過後就歸於平靜，望吓個錶都成11點囉喎，其他兩個釣友，各人都有幾條釣到，都係見好就收，留番下次再釣過，大家齊齊執野走人去宵夜喇。
用咗廿分鐘釣嘅鱸仔。
