17-7-2012 (農曆五月廿九)
釣金古連龜數晚，今次的起心肝，齋釣烏頭！
大人同Ｄ小學同學食飯，咁我就車咗佢落銅鑼灣先，然後先至兜番落北角，18:30落到主場，心心不忿又開竿釣金古，點知釣咗成粒鐘都係毫無魚訊，谷鬼氣執埋Ｄ架生，上橋面換過枝竿，轉埋釣組，專心釣烏頭，呢個時候，釣友Uncle啱啱到，咁就有伴一齊玩喇！
Uncle釣烏頭係有一手嘅，睇住佢左掟掟，右掟掟，過咗冇奈就見佢起魚喇，而我就重係喺度等運到，跟住又見佢中魚，我就忍唔住走去佢果邊偷釣，我一掟個浮波出去佢中魚個位置，即刻就有魚食餌喇，睇住個浮波比魚拉咗幾吓，跟住一沉，浮波消失咗，我第一時間就抽竿喇，一抽就成枝竿滿弓，磅頂又發出閱耳嘅叮叮聲，頂吓收吓，好過引，收到埋腳邊就落撈箕上水，都好！有斤零重，解勾直入冰箱，呢個時候又見Uncle上魚喇，真係犀利，以後都要跟佢學吓野至得；勾過口餌又掟出去，初時都有魚食餌，但係好精口，一食就走冇番口，過咗一陣，羣魚消失咗，算喇~有一條中吓都好開心喇，齊齊執埋架生，清理好釣場，等埋Uncle劏魚，跟住走人去宵夜喇！
詁唔到釣條烏頭都咁難！
跟住落黎呢兩個月都係靠哂佢咧！
13-7-2012 (農曆五月廿五)
連龜三日，條氣好唔順，今晚懷住再龜多次嘅心情，執埋架生落主場踎吓。
18:30落到去啱啱落大雨，只好喺車上面等一陣喇，好彩都係過雲雨，落咗五分鐘度就停哂，咁我就快手快腳搬Ｄ架生出黎，捐入碼頭底開檔，擺好個靚陣，跟手落餌等運到！
同早幾日一樣，連泥鯭都收埋口，亳無魚訊，大約悶咗大半個鐘，竿頭點咗一吓，番口食第二吓就明顯係金古喇，等咗五六秒，枝竿頭特然彈起，我梗係抽竿喇，有Ｄ重量喎，連攪幾吓，條魚開始高速咁喺水中打轉，咁就頂佢一陣喇，磅頂又叮叮響，我最鐘意聽到呢Ｄ聲架喇，等條魚一慢落黎，我就即刻再攪幾吓，條魚即時在我掌握之中，一路收到佢上水面，就用手好小心咁由條〝喇〞果度拉上黎，唔錯!!都有磅頭，解鈎落埋生籠一腳踢；跟住落餌繼續，點知一落就接餌，仲食得好狼C添，兩吓就拉竿喇，一抽就中，又係攪咗幾吓，以經發覺呢條起碼過斤，我就更加小心應附，條魚發力鐘水，磅頂又發出閱耳嘅響聲，兩三個回合就收到條魚上水面，當我想將佢揪上黎果陣，啪!!!!一聲，條金古爆咀跌番落海！
收拾好心情，飲啖水，落餌再釣；點知一路釣到22:30一口似樣Ｄ嘅魚訊都冇，屎流屎水，都係時候執野走人，去宵夜好過喇！
一條磅頭魚，夠食喇掛！
有條魚破龜都唔錯呢！
9-7-2012 (農曆五月廿一)
今日見冇乜野做，喺雪柜執兩塊麵包，擸埋架生就直跴主場喇！
落到去見Ｄ水準備想轉流咁喎，我就嗱嗱聲開好竿，落餌等運到，一路都冇魚咬，過咗半個鐘度，竿頭開始郁喇；一食埋黎以經知係金古，我梗係金睛火眼望到實，當佢食餌動作較耐果吓即刻抽竿，中咗!!上黎係半斤十両金古，即時將條魚入生籠，快手落餌，一落就有魚接，又中!!收上黎呢條就大少少，都有磅頭，放埋落生籠驚執輸咁喳喳林落餌，點知呢次要等成五分鐘先至有反應，一食就中！都係半斤十両嘅貨色；跟住Ｄ流水就開始行大咗，而魚亦都收哂口，望吓個錶都係好早喎，好!!一於換竿轉釣烏頭，不過釣到22:00都未咬過一口，我睇釣烏頭都未係時候，過多十日八日喇，可能會多Ｄ！跟住收竿執野走人喇。
一轉流就連起三條金古 ，有魚真係唔使多時間嘅。
半個鐘嘅收穫都唔錯吖。
4-7-2012 (農曆五月十六)
今日晏晝去咗食自助餐，一番到屋企就即刻執齊今晚釣烏頭Ｄ架生，因為今晚主打烏頭！
19:30落到主場，開好竿就落餌掟出去，牛咁眼睇住個浮波枝螢光棒，一路到22:00轉流都未郁過；轉個位，順住流一路放繩，放到大約廿米左右，見個浮波比魚打橫重拉咗一吓，嗯!!黎料喇，即刻落番個鉸制，跟住個浮波就沉咗入潻黑嘅海中，我快手一抽，中咗!!條烏頭都唔係善男信女，發力就衝，磅頂即時叮叮作響，頂咗幾秒我就收繩喇，烏頭嘅力同速度都驚人，展轉五六個回合，成分幾兩分鐘先至將佢收埋腳邊，梗係撈箕上水喇，解勾即入冰箱，落餌繼續睇仲有冇，等咗十分鐘度，都係冇乜動靜，見又釣到條頭季魚喇，都係執野走人，去宵夜好過！
番到屋企都係自拍；今季第一條大海烏。
條烏頭都幾肥美，過磅係兩斤十二。
