今季第一次釣鱸

30-11-2013  (農曆十月廿八)

吹咗一輪北風，今日天氣較為回暖，我睇主場Ｄ大鱸開始埋位喇掛；所以今日去街市執卅蚊生蝦去主打鱸魚。
18:30去到見未轉流，嗱嗱聲開兩枝竿，一枝近身筏仔，一枝擺遠少少嘅路亞，都係打半水釣鱸；一路釣到19:40轉埋流，兩枝竿都未郁過，咁我就轉轉位睇有冇運行至得。
又釣咗個幾鐘，當我釣到幾乎恰著嘅時候，身邊枝笩仔特然響咗下鉸，當時我仲懵盛盛，因為成半年冇釣過鱸喇，所以響鉸意適仲未番黎，過咗兩秒，當第二次響鉸嘅時候先至如夢初醒，即刻執起之笩仔，但個鉸以經係咁出線喇！我就輕輕拑番實個鉸，即時感到好強嘅拉力，冇辦法侷住要放鉸比佢走下，一慢落黎就用力抽頭，連追七八下，再抽再收，嗯!!又好似好順灘咁喎～唔通係鱸仔，一路收到見魚喇，嘩!!成條黑影喺水裏面，仲飛出水面想洗鰓添，我即刻拉番直條魚線，左右逹佢兩野，再等佢飲幾啖水，條魚即時無力反肚投降，但我都不敢怠慢，頭威頭勢，小心落撈箕，收咗上黎先至鬆一口氣，落番兩個生扣，換過剛才搏鬥時整花咗果Ｄ線，再鈎過隻生蝦落去繼續。
攪惦哂坐低飲番啖水抖番條氣先，過咗一陣，今次輪到放喺竿架上面枝路亞響啷啷喇，我用九秒九嘅速度標埋去執起枝竿，連抽帶攪，因為竿梗線粗，好容易就將條魚收到上水面，呢條就細好多，兩斤度啫，跟手撈埋上黎就即入冰箱；目標以逹，時間啱啱好，收埋Ｄ野，有魚留番聽日釣，早Ｄ番屋企宵夜喇！


番到屋企，專登大大聲嘈醒大人，等佢同我影相；大人話：「呢Ｄ先至係鱸魚吖嘛」！

今季首釣鱸魚就起雙飛。

鱸魚七斤同兩斤半，準備劏魚。

要食埋黎都冇計架

20-11-2013  (農曆十月十八)
幾日都風猛冇去釣魚，今日Ｄ風較為細咗，梗係去主場踎下過過引喇。
去到見仲係行緊大流，我就縮番入橋躉位度釣住先，落餌半個鐘就先起條斤頭細鱗，有魚打底就釣得更加輕鬆！
到咗八點幾，Ｄ流開始放慢，我就嗱嗱聲搬嘢出橋外搏殺；先黎一條坑鰜，即將佢就地正法攞番隻鈎，落餌繼續，唔夠五分鐘，竿頭就比魚拉咗幾下，我執起枝竿準備，點知等咗十幾秒都冇反應，咁我就慢慢將竿提高，特然一野重力嘴埋黎，我順勢一抽，開頭以為鈎地球，頂咗幾秒就知係中魚喇，即刻連收六七野，條魚發力往下衝，跼住比番幾呎佢走下，一慢落黎再頂，跟手快速攪咗十幾下，條友仔又點會咁順灘吖，睇住條線往右邊樁柱埋，我即刻反方向頂多陣，再收幾下，呢次條魚走番出黎，睇準呢個机會就駛出絕招「無敵風火輪」，一路頂一路收，幾個回合就將條魚收到水面，嘩!!花班班嘅，咩魚黎架？即落撈箕上水，上到黎睇清楚原來係條約兩斤嘅沙巴躉，我都係第一次釣到呢Ｄ放生躉咋；因為時間都唔早，所以將條魚直入冰箱，跟住執埋Ｄ架生鬆人，有魚都留番下次釣喇！
都係第一次釣到躉咋。










有Ｄ意外嘅收獲。










細鱗X1--斤頭。
沙巴躉X1兩斤。

個海仲有魚

14-11-2013  (農曆十月十二）

成十幾日冇釣魚，今日咁好天，唔去釣魚真係對自己唔住；喺雪柜摷番盒千年蝦仁，擸埋架生就直跴主場。
一去到見仲有Ｄ流，嗱嗱聲開兩枝竿，一枝笩竿，一枝小磯竿，都係蝦肉做餌，打沉底。
釣咗個零鐘，郁都未郁過，只係間唔中有Ｄ蟹仔黎攪攪震，Ｄ魚就唔知去哂邊；話口未完，笩仔竿頭拉咗幾野，黎料喇！我即刻執起枝竿，說時遲那時快，條魚以經搶餌，咁我就順勢一抽，連攪五六吓，反抗力都幾強吓喎，頂佢幾秒，見佢力水減弱我就毫不考慮，連攪十幾吓，條魚以經比我帶離險境，由樁柱間出咗黎，咁就定檔喇，跟住慢慢輕輕鬆鬆一路收到水面，見條細鱗都有Ｄ斤両，不敢怠慢，用撈箕上水，解鈎入埋生籠，落餌繼續。
跟住釣多個幾鐘都係冇魚訊，都係執埋Ｄ野走人喇！


都係細鱗最老友。

次次有一條都唔錯喎！

條細鱗都有兩斤。