個海仲有魚

14-11-2013  (農曆十月十二）

成十幾日冇釣魚，今日咁好天，唔去釣魚真係對自己唔住；喺雪柜摷番盒千年蝦仁，擸埋架生就直跴主場。
一去到見仲有Ｄ流，嗱嗱聲開兩枝竿，一枝笩竿，一枝小磯竿，都係蝦肉做餌，打沉底。
釣咗個零鐘，郁都未郁過，只係間唔中有Ｄ蟹仔黎攪攪震，Ｄ魚就唔知去哂邊；話口未完，笩仔竿頭拉咗幾野，黎料喇！我即刻執起枝竿，說時遲那時快，條魚以經搶餌，咁我就順勢一抽，連攪五六吓，反抗力都幾強吓喎，頂佢幾秒，見佢力水減弱我就毫不考慮，連攪十幾吓，條魚以經比我帶離險境，由樁柱間出咗黎，咁就定檔喇，跟住慢慢輕輕鬆鬆一路收到水面，見條細鱗都有Ｄ斤両，不敢怠慢，用撈箕上水，解鈎入埋生籠，落餌繼續。
跟住釣多個幾鐘都係冇魚訊，都係執埋Ｄ野走人喇！


都係細鱗最老友。

次次有一條都唔錯喎！

條細鱗都有兩斤。