花鱸又有今年新記錄喇

1-5-2011  (農曆三月廿九)  大霧一陣陣

今日五點幾，師傅偉來電問我落唔落去釣

魚，如果落就唔使買餌！咁我橫惦冇街去，

就執埋Ｄ架生直跴主場。

七點落到去，佢就喺橋底釣緊，仲有一個釣

友(磅友其)喺度手繩釣狗公，我就搬Ｄ架生

去墩頭搏吓喇！都係開兩枝竿，一枝沉底，

一枝半水，一路都係落緊流，呢個時候，師

傅偉上番黎話啱啱斷咗口，我就叫佢努力

喇！

跟住一路都再冇動靜，到咗九點，師傅偉話

好肚餓要走先，咁佢就同磅友其去食飯，得

我一條冷喺度磨。又到十點半喇，其間特然

好大霧，海面Ｄ船都睇唔到，過咗一陣Ｄ霧

又散囉喎，咁我就諗住執野走人，呢頭起

身，果頭就見枝半水竿枝竿頭彎咗兩野，我

就即刻執起枝竿，感覺條魚已經發力，我順

勢用力一抽，好結實咁攪咗五六吓，條魚又

發力，局住比幾呎佢走吓，係咁攪吓放吓都

四五次，其間條魚仲飛出水面想洗鰓，足足

兩三分鐘我氣都嗦埋，手都開始冇力，最後

我深深吸啖氣，將枝竿往上一頂，一帶順就

使出絕招「無敵風火輪」，連攪十幾吓，一

野都唔放鬆，卒之條魚浮上水面，我左手揪

住枝竿，右手快速落撈箕，一野就張條魚上

咗黎，嘩!!唔怪之得咁鬼好力喇，條魚起碼有

十斤。望吓個錶，成十一點喇，都係執野走

嘅時候囉，夜都唔宵就直跴番屋企。

番到屋企，叫大人同我影幅靚相先。

攪到我嗦哂氣吖嗱，一陣先劏你。

2011年嘅花鱸新記錄

重量:十斤三両

長度34吋＝88cm