八號粗碳線做Ｄ大花鱸世界

4-5-2011  (農曆四月初二)  和緩東北風

噚日本來約咗同「高橋」去南丫玩番轉，點知比〝癲人臺〞老點，又話有大雷暴，又話有大東北，攪到霖時取消唔敢去，卒之成晚喺屋企張梳化度坐定定，好似傻佬咁變咗化石！

今日晏畫三點同大人落上環開茶會，五點半番到屋企，嗱嗱聲攞起Ｄ架生，跟住落街市執廿蚊虾就飛車落主場搏殺。

18:30一落到去就開兩枝竿，一枝沉底，一枝半水，放落去唔夠十分鐘，半水枝竿就響鉸喇，竿頭一彎落去我就使勁一抽，收吓放吓兩三回合就見魚，撈箕上水，人魚大戰唔使分半鐘就結速，落好生扣一腳踢！跟住繼續釣，心諗咁早中魚，今晚起碼有多條掛，點之釣到22:30轉埋流都冇魚訊，都係一條到尾。磨到23:15跟住執野走人！經過太X樓，停車行去肥婆度買兩碗車仔麵番屋企，同大人消夜喇喂！

其實次次有一條比我釣到已經好開心架喇。

呢條都唔細架，仲係好肥美添！

大人同我影相，梗係擺個型甫士喇~

花鱸 : 重六斤。
長70cm(27吋半)。

早輪有位「釣界大師」覺得小弟用咁粗線黎釣魚，冇咗幼線釣大魚果種手感同挑戰性。但係我覺得Ｄ鱸又唔係幼線先至得食Ｄ，點解要用幼線呢，佢係米想証明Ｄ乜呢！可能小弟仲未到果個景界~其實用粗線先至有得同Ｄ大魚玩吓，上到尼先至係釣到，上唔到尼就講乜都冇用。
前排見有大師傅艇釣手繩，用二號線上10斤黃立倉嘅精彩片段，証明水底冇樁冇柱，用幾幼線都得，玩幾奈都得，收放幾遠都得。但如果附近樁柱多，條魚打橫一飛已經冇得過手引喇；如果魚多嘅時候仲可以話斷幾多條都冇所謂，冇話口口都斷掛，實有Ｄ唔好彩比你釣到上黎，但當你喺〝兩三晚〞先至有一口食埋黎嘅情況，你又會唔會用二號線呢！如果堅持用嘅話，好有可能只係過兩秒手引，之後又要再等三兩晚先有得再過引個喎。

所以每個釣場，每個釣況，怎至符每個人都係一定唔同嘅，各師各法，唔會千篇一律，呢Ｄ就係釣者尋求嘅樂趣喇。