馬爾代夫、斯里蘭卡八天遊(第三日)

自然醒，全日自由吃喝玩樂。

14-12-2016  (第三日)
瞓醒覺去餐廳食個早餐。

 餐廳Ｄ架啡奶茶嘛嘛地，所以自備鐵觀音飲吓。

食過早餐，番房間等埋Ｄ老友出去環島遊！

喺房門口坐吓都幾舒服架。

今日天氣十分好，藍天白雲，我地四圍逛吓先。

 出面有冬菰亭喎，行出去睇吓先。

老婆大人快Ｄ過黎睇吓吖，有幾條魚喺度游來游去呀！

 仲有幾隻盲蟹添喎。

 海天一色，咁靚嘅景梗係要影番幾幅喇！

 行行吓就見到導遊所講嘅科莫多龍喇，其實係變色龍就真嘅。

 你睇大人幾嘆！

 我就去玩沙灘排球。

 大人話Ｄ水好清涼喎，一陣食埋午餐黎游陣水囉。

 椰子樹上有隻釣魚翁喺度。

出面果Ｄ就係水上屋喇，有錢都租唔到。

 歐美客人都好多。

 又嘆吓世界先。

 行到咁上吓又到午餐時候，輕鬆心情特別開胃。

 見Ｄ木瓜咁正就食多幾舊。

 食飽飽又再四圍逛吓，中午過後天色仲正。

 須然天氣炎熱，但穿梭於海灘中嘅椰林，份外涼快。

 隨處都有從椰樹跌落黎嘅椰子，有刀可以斬開黎飲椰青水。

 島嘅另一邊，係滑浪區，風浪比較大。

 Ｄ海浪都有六七呎高，所以禁止游泳。

 又有條變色龍喺度。

 行到咁上吓，返房換上泳裝，落水玩吓喇～

大人就喺淺水區玩水。

我就梗係要玩吓浮潛，可以欣賞吓近岸海底嘅珊瑚、水草同魚兒。

 又可以喺椰樹底坐吓，認真嘆呢！

游完水番房冲個凉，成身爽哂，跟住就去餐廳食晚餐。

游完水零舍肚餓，覺得Ｄ野特別美味。

食飽飽出海邊逛逛，今晚個月光特別圓，特別亮。

攞咗小小麵包行出碼頭餵魚。

好多魚埋黎搶食。

嘩！有鯊魚呀～好彩呢種係護士鯊，唔會咬人嘅。

睇完鯊魚再行咗一陣就番房間，酒吧又唔啱我，自己冲杯靚奶茶嘆吓，呢度又冇WiFi，睇陣電視就瞓覺喇。

聽日早上都係自由活動，晏晝離開渡假島，晚上乘飛机番斯里蘭卡。