獨行俠，智擒雌雄偷面包大賊

3-9-2009  (農曆七月十五)  大東風  生流

食咗晚飯，心思思又想去釣魚，我就同大人講，正話條鹽燒烏頭好唔好食呀，佢就話：都幾好食~~我話：咁就得喇！等我去釣條番黎，再整比你食吖。襯佢未黎得反應，我已經執埋架生，飛到出咗門口喇！

20:15到咗主場，好大東風，唔釣魚吹吓海風都好舒服，見得我一個人，慢慢開好竿，上咗餌就順住風掟個浮波出去，漂漂吓都去咗十幾咪，坐定定飲啖水先，特然見浮波沉咗一吓，我就放番低枝水，將虛線收緊，感覺到條魚繼續食緊餌，我就輕輕一帶，浮波就訊速消失於漆黑嘅海中，我馬上揚竿，中咗啦，見冇勿力水，知係細野，不過頭威頭勢，唔同佢玩禁多，快速收佢埋黎，成條飛佢上岸，放入冰箱，再落餌，掟番出去同一位置。

20:50第二口餌又係漂咗去十幾咪果度，見冇勿動靜，我就再放多三四咪，果然見浮波又左右擺動咗幾吓，呼一聲就唔見咗個浮波，我一提竿就已經感覺尼條友仔唔細，好有力，心諗好喇有排玩喇！果然佢發力極速出海，魚線被風吹到吱吱聲響，枝竿就滿曬弓成７字，放吓收吓五六次，足足玩咗分幾兩分鐘，最後埋到黎佢就冇哂力，我就索哂氣，見有Ｄ斤両，就用撈箕上水，跟手放埋入冰箱。

21:30見Ｄ魚都唔知去哂邊，風大浪湧，完全冇魚訊，都好有兩碌交差，跟住執埋架生，清理好釣場，早Ｄ番屋企，唔係冇下次，拜拜！ 

咁大膽，走黎偷我Ｄ面包食吖嗱！

烏頭得 One Look

2-9-2009    (農曆七月十四)   生流   大東風

食飽晚飯，冇乜好做，都係去主場吹吓海風先。

20:30落到去己經見到 Uncle 同師傅偉喺度釣緊烏頭，仲未開齋，所以我就慢慢開竿，點知此時 Uncle 大叫(有魚食餌呀)，我嗱嗱聲上好餌(麵飽)， Set 好個浮波，就向佢講嘅位置掟過去，此刻佢已經中魚收緊埋尼喇，而我個浮波就左右擺動，有魚食緊，師傅偉又中，而我個浮波也訊速消失於海面，尼次輪到我中喇，一提竿，快速攪三四手，己經滿弓，都唔細，起碼兩斤，玩咗一輪，終於上水，放落冰箱，再繼續釣，但係羣魚又唔知去哂邊，冇哂動靜。

22:00水向東流(落流)，大家吹咗一輪水，又見唔到魚蹤，既然人人有魚中，都過足引啦，所以就收執埋Ｄ架生，清理好釣場，早Ｄ番屋企喇，拜拜！

條海老烏幾靚仔！我仲請佢食麵飽添。

白果適-鹽燒烏頭

27-8-2009  (星期四)

近日 BLOG友話要知鹽燒烏頭方法喎，所以小弟就寫出【白果式鹽燒烏頭】跟大家研究吓，希望各路廚神唔好見笑。

( 1 )預備一條新鮮嘅烏頭，劏好咗，將肚內嘅黑幕同血塊都要清洗乾剩，可以打鱗或者唔打鱗，睇個人喜好，用吸水紙將魚身水份吸乾，再用海鹽擦上全身，醃佢 45 分鐘。

( 2 )將醃好嘅魚，放入焗爐，用火力 250 度(上下火)，焗佢 30 至 35 分鐘。

( 3 )將魚小心從焗爐取出，放在碟上，如果係冇打鱗嘅就用小刀义，將連鱗嘅魚皮与肉分開，如果係有打鱗嘅，就唔使上述嘅做法。

食嘅時侯，可以點Ｄ喼汁、茄汁、蒜汁、沙律汁、乜汁物汁，式隨專便。我就乜汁都唔要，就咁食就覺得鮮味Ｄ，打咗鱗就可以連皮食，脆卜卜，好香口架！

你地睇Ｄ黃油爆哂出黎，喺米好正呢！

Ｄ海鹽喺魚身上面，好似層雪花咁，真美！

因為條魚太大，所以剩係燒條烏尾黎食，一樣咁正。

冇驚喜都係老烏一碌

25-8-2008  (農曆七月初六)  生流 

話說上個禮拜五，去南丫島夏尾磯釣，打龜不特已，仲拉傷咗隻左手添，唉！真係年紀大，机器壞。今晚食飽飯，本著比大人鵝牌嘅危險(隻手好番Ｄ又去釣魚)，走落主場玩番轉先。

20:30到咗主場，己見有兩三個老友釣緊烏頭，我就開好竿，同老友呀海吹緊水，特然見浮波左搖右擺，一野就唔見咗，我馬上揚竿，感到有好強嘅拉力，因為浮波同我嘅距離有成三十幾米，所以收吓放吓頂吓，足足玩咗兩三分鍾，埋到黎見條烏頭都有Ｄ斤両喎！用撈箕上水，再入冰箱。

22:30各人都有中魚，過足引，連手痛都唔記得喇，跟住見都冇勿動靜，就執埋架生，清理好釣場，齊齊去宵夜囉！

抽住條烏頭幾招積。

大海烏三斤幾。

你睇幾肥美(鹽燒就至正喇)。

烏軍未退

18-8-2009  (農曆六月廿八)

今日本來冇打算釣魚嘅，點知失咗踪幾個月嘅釣友(Uncle)特然來電，問尼輪係米有烏頭埋，我話都釣左成擔喇，佢即刻約我今晚釣多獲，我就應承咗佢喇。

20:10到咗主場，己經見佢喺度捕緊烏頭，仲有師傅偉添，我地喺平時釣開個位釣咗十零分鐘，見有魚但唔開口，就轉番出橋咀，落餌冇奈，Uncle首先中魚，斤零兩斤，費事洗撈箕，直情飛佢上黎，跟住師傅偉又中，都係斤頭，輪都輪到我喇掛，枝筏竿頭郁郁吓，我就輕輕一帶，咁就成枝竿彎曬，條友仔起碼三四斤喎，呢次唔懶得，要落撈箕上水，跟住你一條呀我一條，一人釣咗十幾碌，都係一斤左右嘅烏頭。

22:30一輪大戰，Ｄ友仔又走哂，Uncle又口中念念有詞【Ｄ魚屎Ｘ哂去邊呀，冇魚嘅？】我心諗釣咗咁多都話冇魚！嗱~我比埋最大果碌你喇，唔好鬼殺咁嘈；跟住就執埋Ｄ架生，清理好釣場，開開心心，一齊走人番屋企喇，拜拜！

兩個多小時嘅收獲！

好恐佈，膽小者勿看！

捉到兩條友仔007同零零發

13-8-2009  (農曆六月廿三)

今晚20:00落主戰場巡視吓，睇有冇烏兵再攻。到場己見我軍幾團兵力，嚴陣以代，見城外圍烏兵蠢蠢欲動，我拿拿聲較好枝浮波炮，發第一炮已見炮旦左右擺動，特然一沉，竿腰彎下，速度奇快，我即刻提竿一頂，跟住順勢收佢埋黎，有Ｄ斤両喎！用撈箕上水。立即再發第二炮，再中，但係呢條細得多，只得磅頭，成條飛佢上水，與此同時隊友都中左幾條小烏，我地再發炮，但係Ｄ烏軍又退走十哩，唔敢再黎攻。

一路守到21:30，Ｄ流水已改，再唔見到有烏軍出現，我軍再磨多三刻鐘，到22:20見冇乜動靜，就收埋架生，清理好戰場，攞埋Ｄ戰利品回家喇喂。拜拜！

比禾生擒嘅特烏007(三斤)，同埋特烏零零發(磅頭)。

後記 : 原來呢兩條友仔，係烏兵派黎刺探軍情嘅特烏，好彩比禾捉到，唔係就大近視喇。哈哈！

一網成擒

7-8-2009  (農曆六月十七)  星期五  西風  生流

今日17:00接到師傅偉來電，佢話主場被烏頭兵團大軍圍攻，速速增援，禾食埋晚飯於19:30趕到，前綫巳經炮火連天，殺聲四起，已經生擒小烏十多條。

禾嗱嗱霖開好架生就大開殺界，首先用浮波向外發炮，唔使一分鐘就打中一條，跟住連珠炮發，再下六成，但烏頭兵團魚多勢眾，己攻到埋脚邊，禾立即用筏竿作埋身肉搏，其他釣友亦殺到天昏地暗，日月無光，到咗23:00鳥頭大軍已被我軍擊退。

數數自己戰利品都有成廿碌，其地戰友收獲不計其數，我地見好就收清理好戰場，各自歸隊(回家)，拜拜！

活捉二十萬大軍！

點處置佢地好呢！